ރިޕަބްލިކަން ޕާޓީގެ ތެރެއިން ޓްރަމްޕާ ދެކޮޅު ޕާޓީއެއް އުފެދެނީ
މަޝްވަރާކުރުމަށް 120ށް ވުރެ ގިނަ މީހުން ޒޫމް މެދުވެރިކޮށް ވާހަކަދައްކާފައިވޭ
އެމެރިކާގެ ކުރީގެ ރައީސް ޑޮނަލްޑް ޓްރަމްޕް
އެމެރިކާގެ ރިޕަބްލިކަން ޕާޓީގެ ތެރޭގައި އެގައުމުގެ ކުރީގެ ރައީސް ޑޮނަލްޑް ޓްރަމްޕް އެމެރިކާގެ ޑިމޮކްރަސީ ނަގަލުމަށް ކުރެއްވި މަސައްކަތްތަކާއި ގުޅިގެން ޓްރަމްޕާ ދެކޮޅަށް އެޕާޓީގެ ތެރެއިން އައު ޕާޓީއެއް އުފެއްދުމުގެ މަސައްކަތްތައް ފަށައިފިއެވެ.
އެމަސައްކަތް ފަށާފައިވަނީ ރިޕަބްލިކަން ޕާޓީގެ ކުރީގެ އިސް މެމްބަރުންތަކެކެވެ. އައު ޕާޓީ އުފެއްދުމުގެ މަޝްވަރާތަކުގައި އުޅުއްވާ ހަތަރު ބޭފުޅަކު އެކަމާއި ގުޅޭގޮތުން ރޮއިޓަރސް އާ ވާހަކަދައްކަވަމުން ވިދާޅުވެފައިވަނީ މަޝްވަރާތަކުގައި ރިޕަބްލިކަން ޕާޓީގެ ކުރީގެ އިސް މަސްއޫލުވެރިންނާއި ރިޕަބްލިކަން ޕާޓީއަށް ނިސްބަތްވެވަޑައިގެންނެވި ކުރީގެ ރައީސުންގެ ދައުރުގައި އިސް އޮފިޝަލުންގެ ގޮތުގައި މަސައްކަތްކުރެއްވި ބޭފުޅުންނާއި ކުރީގެ ރިޕަބްލިކަން އެމްބެސަޑަރުން ހިމެނެއެވެ.
އެގޮތުން މިކަމާއި ގުޅޭގޮތުން މަޝްވަރާކުރުމަށް 120ށް ވުރެ ގިނަ މީހުން ޒޫމް މެދުވެރިކޮށް ވާހަކަދައްކާފައިވާކަމަށް ރޮއިޓަރސް އިން ވަނީ ބުނެފައެވެ.
ޓްރަމްޕްގެ ސިޔާސަތުގެ ދަށުން ރިޕަބްލިކަން ޕާޓީގެ ތެރޭގައި އުފެދެމުން ގޮސްފައިވާ ޑިމޮކްރަސީ އާއި ޚިލާފު ހައްދުފަހަނައަޅައި ދިޔުމުގެ ފިކުރާ ދެކޮޅު ގިނަ ބަޔަކު މި ޒޫމް ކޯލުގައި ބައިވެރިވެފައިވެއެވެ.
މިޓީމުގެ މައިގަނޑު މަގްސަދަކީ ރިޕަބްލިކަންގެ ތެރޭގައި އޮތް ޓްރަމްޕްގެ ބާރާއި ނުފޫޒުން ޕާޓީ ސަލާމަތްކުރުމެވެ.
ރިޕަބްލިކަން ޕާޓީގެ ތެރެއިން އައު ޕާޓީއެއް އުފެއްދުމަށް މަސައްކަތްކުރާ ވާހަކައާ ގުޅޭގޮތުން ޓްރަމްޕްގެ ސްޕޯކްސްމަން ޖޭސަން މިލަރ ވިދާޅުވެފައިވަނީ އެމީހުން ބައިޑަން އަށް ވޯޓުލީ ހިސާބުން ވެސް ރިޕަބްލިކަން ޕާޓީ ދޫކޮށްލާފައިވާކަމަށެވެ.
ޒޫމް ކޯލާ ގުޅޭގޮތުން އިތުރަށް ވާހަކަދައްކަވަމުން މެކް މުލިން ވިދާޅުވީ ކޯލުގައި ބައިވެރިވި މެމްބަރުންގެ ތެރެއިން 40 އިންސައްތަ މީހުން ބޭނުންވަނީ އައު ޕާޓީއެއް އުފެއްދުމަށެވެ. ނަމަވެސް ޕާޓީގެ ތެރޭގައި ވަކި ފެކްޝަނެއް ހަދައިގެން މަސައްކަތްކުރާ ގޮތަށް ވެސް މަޝްވަރާކުރެވުނު ކަމަށް މެކް މުލިން ވިދާޅުވިއެވެ.
ރިޕަބްލިކަންގެ ތެރެއިން އައު ޕާޓީއެއް އުފައްދަން އުޅޭވާހަކަތައް ފެންމަތިވެގެން މިއައީ ޓްރަމްޕްގެ އިމްޕީޗްމަންޓް ޓްރެއަލް ސެނެޓްގައި ކުރިޔަށްދަނިކޮށެވެ. ޓްރެއަލްގައި ހައުސްގެ މެނޭޖަރުން ވަނީ ޖެނުއަރީ މަހުގެ 6 ވަނަ ދުވަހު ކެޕިޓޮލްގެ ތެރޭގައި ހިނގާދިޔަ ހަމަނުޖެހުންތަކުގެ ތަފްސީލީ ހެކިތައް ހުށަހަޅަމުންނެވެ.
