ޖަޕާނަށް 7.1 މެގްނިޓިޔުޑްގެ ބާރުގަދަ ބިންހެލުމެއް އަތުވެއްޖެ

ރެކްޓަރ މިންގަނޑުން 7.1ގެ ބާރުގަދަ ބިންހެލުމެއް ޖަޕާނުގެ އިރުމަތީ އައްސޭރި ސަރަހައްދަށް އަތުވެއްޖެއެވެ.

ފުކުޝީމާ އާއި ކައިރި ސަރަހައްދަށް ބިންހެލުން އަތުވެފައިވާއިރު ސުނާމީއެއް އަރާފާނެކަމުގެ އިންޒާރެއް އަދި ދީފައެއްނުވެއެވެ. އެހެންނަމަ ވެސް ބިން ހެލުމުގެ ބާރުގަދަ ކަމަށް ރިޕޯޓްތައް ބުނެއެވެ. ޖަޕާނުގެ މީޑިޔާތަކުން ރިޕޯޓްކުރާ ގޮތުގައި ބިން ހެލުމުގައި އަނިޔާވި މީހުންގެ އަދަދު ވަނީ 30ށް އަރާފައެވެ.

ބިން ހެލުން އައިސްފައިވަނީ ފުކުޝީމާ އާއި 60 މޭލު ދުރުގައި އޮންނަ އިރުމަތީ އުތުރުގެ ނަމީ ކިޔާ އައްސޭރި ހިސާބަކަށް ކަމަށް އެމެރިކާގެ ޖިއޮލޮޖިކަލް ސަރވިސް އިން ވަނީ ބުނެފައެވެ. ބިން ހެލުމުގެ ސަބަބުން އަދި މިހާތަނަށް ފުކުޝީމާގެ ނިޔުކްލިއަރ ޕްލާންޓަށް އެއްވެސް އަސަރެއް ކޮށްފައިނުވާކަމަށް ޖަޕާނުގެ ޗީފް ކެބިނެޓް ސެކެޓްރީ ވިދާޅުވިއެވެ.

އެހެންނަމަވެސް ކާޓޯ ސަރަހައްދުގެ 830،000ށް ވުރެ ގިނަ ގޭބިސީން ކަރަންޓު ކަނޑައިގެން ގޮސްފައިވާއިރު މީގެތެރޭގައި ވެރިރަށް ޓޯކިޔޯ ވެސް ހިމެނެއެވެ. ބިން ހެލުމާއި ގުޅިގެން ލިބިފައިވާ ގެއްލުންތަކާއި މީހުން ސަލާމަތްކުރުމުގެ މަސައްކަތް މިހާރު ފަށާފައިވާކަމަށް ރިޕޯޓްތައް ބުނެއެވެ.

2011 ވަނަ އަހަރުގެ މަރޗް މަހުގެ 11 ވަނަ ދުވަހު ރެކްޓަރ މިންގަނޑުން 9.0 ގެ ބާރު މިނުގައި ޖަޕާނަށް ވަނީ އައިސްފައެވެ. އެފަހަރުގެ ބިން ހެލުމުގައި 20،000ށް ގިނަ މީހުން ވަނީ މަރުވެފައި ނުވަތަ ވީނުވީއެއް ނޭނގި ގެއްލިފައެވެ. އެފަހަރުގެ ބިން ހެލުމާއެކު އައި ސުނާމީގައި އެތައް ހާސް ބައެއްގެ ގޯތި ގެދޮރު ސުންނާފަތިވިއެވެ.

އަދި ފުކުޝީމާގައި ހުރި ނިޔުކްލިއަރ ތިން ރިއެކްޓަރގައި ރޯވެ އެޕްލާންޓްތަކުން ޖައްވަށް ރޭޑިއޯއެކްޓިވް ވިހަ މާއްދާތައް ދޫވުމާއެކު އެސަރަހައްދުގައި އުޅުނު ލައްކައަކަށްވުރެ ގިނަ މީހުން ވަނީ އެހެން ހިސާބުތަކަށް ބަދަލުކޮށްފައެވެ.

އެ ބިން ހެލުން އައިތާ 10 އަހަރު ވާން ކުޑަދުވަސްކޮޅަކަށް ވެފައިވާއިރު މިއައި ބިން ހެލުމާއެކު ގިނަ ބަޔަކު އަންނަނީ 10 އަހަރު ކުރީގެ ހަނދާންތައް އައު ކުރަމުންނެވެ.