ބަނޑުހައިހޫނުކަމުގެ ސަބަބުން ޔަމަނުގެ 5 އަހަރުން ދަށުގެ ކުޑަކުދިންގެ ތެރެއިން މަދުވެގެން ހަތަރު ލައްކަ ކުދިން މަރުވާނެކަމަށް އަދ އިން ލަފާކޮށްފިއެވެ.

ހަނގުރާމައިގެ ސަބަބުންނާއި ކޮވިޑް-19 ގެ ޕެންޑަމިކާއި ގުޅިގެން ހަތަރު ލައްކައެއްހާ ކުދިންގެ ފުރާނައަށް ނުރައްކާވެފައިވަނީ އެކަށީގެންވާ ރަނގަޅު ކާނާ އެކުދިންނަށް ނުލިބޭތީއެވެ. އަދި އެކަމަށް ހަލުވި މިނެއްގައި ރަނގަޅު ފިޔަވަޅުތަކެއް ނާޅައިފިނަމަ އެކުދިންގެ ފުރާނަ ގެއްލިގެންދާނެކަމަށް އދ އިން ބުނެއެވެ.

އދ އިން މިއިންޒާރު ދީފައިމިވަނީ ހައަހަރު ވަންދެން ޔަމަނުގައި ހިނގަމުންދާ ހަނގުރާމައިގެ ސަބަބުން ޔަމަނުގެ އާބާދީގެ 80 އިންސައްތަ މީހުން މިހާރުވެސް އިންސާނީ ހައްގުތަކަށް މަސައްކަތްކުރާ އެކި ޖަމާޢަތްތަކުން ދޭ އެހީތަކަށް ބަރޯސާވަމުން އަންނައިރުއެވެ.

އދ އިން ހުކުރު ދުވަހު ނެރެފައިވާ ރިޕޯޓެއްގައި ބުނެފައިވަނީ 2020 އަހަރާއި އަޅާބަލާއިރު ޔަމަނުގައި މިއަހަރު ރަނގަޅު ކާނާ ނުލިބޭ އުމުރުން 5 އަހަރުން ދަށުގެ ކުދިންގެ ނިސްބަތް 22 އިންސައްތަ އިތުރުވާނެއެވެ.

އޭގެ މާނައަކީ އެއްވެސް މިންވަރެއްގެ ކާނާ ނުލިބި ބަނޑުހައި ހޫނުކަން މަތީ އެކުދިން މަރުވެދިޔުންކަމަށް ރިޕޯޓްތައް ބުނެއެވެ. އެންމެ ހާލަތު ގޯސް ސަރަހައްދުގެ ތެރޭގައި އަޑެން، ތާއިޒް އަދި ސަނާ ހިމެނެއެވެ.

މިއަހަރު ތެރޭގައި އުމުރުން ފަސް އަހަރުން ދަށުގެ 2.3 މިލިއަން ކުދިންނަށް އެކަށީގެންވާ ކާނާ ނުލިބުމުގެ ދަތިތަކަން އިހުސާސްކުރާނެކަމަށް ރިޕޯޓްބުނެއެވެ. ޔަމަނުގެ ކުޑަކުދިންނާއި މަންމައިންނަށް އެކަށީގެންވާ ކާނާ ނުލިބުމުގެ މައްސަލައަކީ އަހަރުން އަހަރަށް އިތުރުވަމުން އަންނަ ސީރިއަސް މައްސަލައެކެވެ. މިކަމުގެ ސަބަބުން ބަލިތައް އިތުރުވުމުން އަންނަކަމަށް ރިޕޯޓް ބުނެއެވެ.

މިއަހަރު އެކަނިވެސް މާބަނޑު މީހުންނާއި ގާތުންދޭ މަންމައިންގެ ތެރެއިން 1.2 މިލިއަން އަންހެނުންނަށް އެކަށީގެންވާ ކާނާ ނުލިބޭނެކަމަށް އަންދާޒާކުރެވޭކަމަށް އދ ގެ ރިޕޯޓްތައް ބުނެއެވެ.

ޔަމަނަކީ މިވަގުތު ދުނިޔޭގައި އިންސާނީ ކާރިސާ އެންމެ ބޮޑަށް ދިމާވެފައިވާ ގައުމެވެ. ދިގުލައިގެން ގޮސްފައިވާ ހަނގުރާމަ އާއި ޕެންޑަމިކްގެ ސަބަބުން އިގްތިޞާދުގެ ދަތިކަން މުޅި ދުނިޔެއަށް ކުރިމަތިވެފައިވުމުގެ ސަބަބުން ބޭނުންވާ މިންވަރަށް އެހީތެރިކަން ޔަމަނަށް ފޯރުކޮށްދިނުމަށް ވަނީ ބޮޑެތި ގޮންޖެހުންތައް ކުރިމަތިވެފައެވެ.

އދ އިން ބުނެފައިވަނީ ޔަމަނަށް އެކިގޮތްގޮތުން އެހީގެ ގޮތުގައި ލިބެންޖެހޭ 3.4 ބިލިއަން ޑޮލަރުގެ ތެރެއިން ލިބިފައިވަނީ އެންމެ 1.9 ބިލިއަން ޑޮލަރުކަމަށެވެ. ޔަމަނަށް އިންސާނީގޮތުން އެހީތެރިކަން ފޯރުކޮށްދިނުމަށް ހިންގަމުންދާ ޕްރޮގްރާމްތައް ބަންދުކުރުމާއި އެހީދޭ މިންވަރު މަދުކުރަމުން އަންނަކަމަށް އދ އިން ބުނެއެވެ.

ސައުދީއަރަބިއްޔާ އާއި ގުޅިފައިވާ ބާރުތަކުން ޔަމަނަށް ހަމަލާދޭން ފަށާފައިވަނީ 2015 ވަނަ އަހަރުއެވެ. އެއީ 2014 ވަނަ އަހަރު ޔަމަނުގެ ސަރުކާރު ބަދަލުކޮށް އެގައުމުގައި ބާރުގަދަކުރަން ފެށި ހޫޘީންނާ ދެކޮޅަށެވެ. އެމީހުން ބުނަމުން އަންނަނީ އެމީހުން މަސައްކަތްކުރަމުން އަންނަނީ ކޮރަޕްޝަނާއި ދެކޮޅަށެވެ. މިހަނގުރާމައާ ހެދި ޔަމަން އަށް ވަނީ އިންސާނީ ބޮޑު ކާރިސާއެއް ކުރިމަތިވެފައެވެ.