އެމްޑީޕީ ބައެއް އެކްޓިވިސްޓުންވެސް އިދިކޮޅު އެއްވުންތަކާ ގުޅުމަށް ސިއްރު މަޝްވަރާތަކެއް ކުރަނީ؟
އޭގެ ތެރޭގައި އެމްޑީޕީގައި ނަގާކިޔޭ ބައެއް އިސް އެކްޓިވިސްޓުންވެސް ހިމެނޭ
ހުކުރު ދުވަހު އިދިކޮޅުން ކުރިއަށް ގެންދިޔަ މުޒާހަރާގެ ބައިވެރިން މަގުމަތީގައި މަޑުކޮށްލައިގެން ތިބި މަންޒަރެއް
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ބައެއް އެކްޓިވިސްޓުން އިދިކޮޅު ޕްރޮގްރެސިވް ކޯލިޝަންގެ އެއްވުންތަކުގައި ބައިވެރިވުމާ ގުޅޭގޮތުން ސިއްރު މަޝްވަރާތަކެއް ކުރަމުންދާ ކަމަށް އިތުބާރުހުރި މަސްދަރަކުން "ރާއްޖެއެމްވީ"އަށް މައުލޫމާތު ދީފިއެވެ.
އެފަދަ 2 ބައްދަލުވުމެއްގައި ބައިވެރިވެފައިވާ އެމްޑީޕީ އެކްޓިވިސްޓަކު ރާއްޖެއެމްވީއަށް މައުލޫމާތު ދެމުން ބުނީ، އިދިކޮޅު ޕީޕީއެމް/ޕީއެންސީން ކުރިއަށްގެންދާ އެއްވުންތަކުގައި ބައިވެރިވުމަށް އެމްޑީޕީގެ އެކްޓިވިސްޓުންގެ ތެރެއިން 300އެއްހާ މީހުން ޕީޕީއެމްއާއެކު މަޝްވަރާ ކުރަމުންދާ ކަމަށެވެ. އަދި އޭގެ ތެރޭގައި އެމްޑީޕީގައި ނަގާކިޔޭ ބައެއް އިސް އެކްޓިވިސްޓުންވެސް ހިމެނޭކަމަށް އޭނާ ބުނެއެވެ.
މި ބައްދަލުވުންތައް ކުރިއަށްގެންދާ ސަބަބާއި ގުޅޭގޮތުން އޭނާ ބުނީ، ކޮވިޑުގެ މި ބަލިމަޑުކަމުގެ ތެރޭގައި އިދިކޮޅުން ކުރަމުންދާ ކަންކަމަށްވެސް ސަރުކާރުން އެއްވެސް ފިޔަވަޅެއް ނޭޅުމާއި، ވައްކަމާއި ކޮރަޕްޝަންގެ ބޮޑެތި ތުހުމަތުތައް ކުރެވޭ މީހުން އިދިކޮޅު ކޯލިޝަންގެ މަތީފަޑީގައި މިއަދު ޙަރަކާތްތެރިވަމުން ދާއިރުވެސް، އެއްވެސް ފިޔަވަޅެއް އެޅުމެއް ނެތުމުގެ ސަބަބުން ކަމަށެވެ. އަދި އެކަންކަމުގެ ސަބަބުން ސަރުކާރަށް ނުރުހުން ފާޅުކޮށް، ފިޔަވަޅު އެޅުމަށް ބާރު އެޅުވުންވެސް މި ޙަރަކާތުގެ މަޤްސަދުތަކުގެ ތެރޭގައި ހިމެނޭކަމަށް އޭނާ ބުންޏެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ބައްދަލުވުންތައް ސިލްސިލާ ގޮތެއްގައި ކުރިއަށްދާއިރު، އިދިކޮޅު ފަރާތްތަކުން ޤާނޫނުތައް މުގުރަމުންދާއިރުވެސް އިދިކޮޅަށް "ޚާއްސަ އިމްތިޔާޒުތަކެއް" ފޯރުކޮށްދެމުންދާކަމުގެ ޝަކުވާވެސް އެމްޑީޕީ އެކްޓިވިސްޓުން ކުރެއެވެ.
އިދިކޮޅުން އެކި ނަންނަމުގައި ތަފާތު އެއްވުންތައް ބާއްވަމުންދާއިރު، ހުކުރު ދުވަހު ކުރިއަށް ގެންދިޔަ އެއްވުމުގައިވެސް މާސްކް އެޅުމެއް ނެތި އަދި ގައިދުރުކަމެއް ނެތި ގިނަ ބަޔަކު ޙަރަކާތްތެރިވި މަންޒަރުތައް ވަނީ ފެނިފައެވެ. އޭރު އެ ސަރަޙައްދުގައި ޙަރަކާތްތެރިވި ފުލުހުންވެސް އެއްވުން ހުއްޓުވުމަށް މާބޮޑު މަސައްކަތްތަކެއް ކުރި މަންޒަރު ނުފެންނަކަން އެ ސަރަޙައްދުގެ މަންޒަރުތަކުން ފެނެއެވެ. އޭގެ އިތުރުން، ސިޔާސީ ޕާޓީތަކުގެ ބެލެނިވެރި ފަރާތްކަމަށްވާ އިލެކްޝަންސް ކޮމިޝަނުންވެސް އެކަށީގެންވާ ފިޔަވަޅެއް އަޅާފައި ނުވާކަމަށް ގިނަ ބަޔަކު ބުނަމުންދާއިރު، މިހާރުވެސް ރާއްޖެ އޮތީ ކޮވިޑުގެ އެންމެ ނުރައްކާތެރި ރާޅާއި ކުރިމަތިވެފައިކަމަށް ސިއްޙީ އޮފިޝަލުން ދަނީ ބުނަމުންނެވެ.
