އާޚިރަތް ދުވަސް މަތިން ގިނަގިނައިން ހަނދުމަކުރުމަށް ހުކުރު ޚުތުބާގައި ގޮވާލައިފިއެވެ.
"ތިމާކުޅަޢަމަލު ތިމާ ދެކޭ ދުވަސް'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އާޚިރަތްދުވަހާއި މެދު ގިނަގިނައިން ވާހަކަ ދެއްކުމަކީ ކުރަން ޖެހޭ ކަމެއް ކަމަށާއި އެއީ އަމުރުވެވިގެންވާ ކަމެއް ކަމަށެވެ. އަދި އެއީ ވާޖިބެއްކަން ފާހަގަކޮށް ޚުތުބާގައި ބުނީ އެ ދުވަހުގެ މަތިން ހަނދާން އައުކޮށްކޮށް ތިބެންޖެހޭނެ ކަމަށެވެ.
ޤިޔާމަތްވުމުގެ ޢަލާމާތްތައް ފާޅުވަމުންގޮސް އެންމެ ފަހުން ޤިޔާމާތްވާ ހިނދު ދުނިޔޭގައި ތިބޭނީ އެންމެ ނުބައި މީހުން ކަމަށާއި ޤިޔާމަތްވުމަށް މާތްﷲ ތަޢާލާ އިސްރާފީލުގެފާނު ޚަލްޤު ކުރައްވައި، އެ މަސްއޫލިއްޔަތު އެކަލޭގެފާނާ ޙަވާލުކުރެއްވި ދުވަހުން ފެށިގެން ތާޅަފިލި ފުމެލެވޭ ވަގުތާ ޖެހެންދެން އެކަލޭގެފާނު ހުންނަވާނީ މާތްﷲގެ އަމުރުފުޅުގެ އިންތިޒާރުގައެވެ. ފުރަތަމަ ތާޅަފިލި ފުމެލެއްވުމާއެކު ލަހެއް ފަހެއް ނުވެ ޤިޔާމަތް ޤާއިމުވެދާ ހުއްޓެވެ. ތާޅަފިލީގެ އަޑު އެންމެ ފުރަތަމަ އިވޭނީ މަޑުމަޑުން ކަމަށާއި ދެން އެއަޑު ގަދަވަމުން އަންނާނެ ކަމަށާއި، އެއަޑު ޖެހުމާއެކު މީސްތަކުން މަރުވެދާނެއެވެ. އެ އަޑު އުވުމާ މަރުވުމާ ދެމެދު ކުޑަކުޑަ ކަމެއް ކޮށްލާނެ ވަގުތު ކޮޅެއް ވެސް ނުލިބޭއިރު ތާޅަފިލި ފުމެއްލެއްވޭ ހިނދު، އެއަޑު އެހި ކޮންމެ މީހަކު ކަރު ލަނބާލާއި އުފުލާލާފައި އެއަޑަށް ކަނުލައި އަޑު އަހާނެއެވެ. އަދި އެ އަޑު އިވުމާއެކު އޭނާ މަރުވެގެން ވެއްޓޭނެއެވެ.
ޤިޔާމަތްދުވަހު މީސްތަކުން މަޙްޝަރު ކުރެއްވޭއިރު ތަފާތު ހެޔޮކަންތަކުގެ ސަބަބުން މި އުންމަތުގެ މީހުންނަށް ނޫރެއް ލިބިގެންވާނެ ކަމަށާއި މީސްތަކުން މަޙްޝަތު ކުރެއްވޭ ހުށީ ހުސްގަޔާ، ހުސްފަޔާ ދުނިޔެއަށް އުފަންކުރެއްވި ގޮތަށް، އެމީހަކު އެކަމެއްގެ މަތީގައި މަރުވިކަމެއްގެ މަތީގައިކަމަށް ވެސް ހުކުރު ޚުތުބާގައި ވަނީ ބުނެފައެވެ.
މާތްﷲ ގެ ރަހްމަތްވަންތަކަމުން އިންސާނާއަށް ސުވަރުގެ ވަދެވޭނެ ވަސީލަތަކީ އޭނާ ކޮށްފައިވާ ހެޔޮއަމަލު ކަމުގައިވީ ހިނދު ތިމާގެ އަމިއްލަ ނަފްސަށް ހެޔޮ އެދޭ މީހާ ހެޔޮ އަމަލުކުރުމުގައި ފަސްނުޖެހޭނެއެވެ. އަދި ބުއްދިވެރިޔަކީ ހެޔޮ އަމަލުކުރުމުގައި ކުރިއަރައިދާ މީހާއެވެ. ހެޔޮ އަމަލަކީ މާތްﷲ ގެ އަމަރުފުޅުތަކަށް ކިޔަމަންތެރިކަން އަދާކުރުމާއި އެކަލާނގެ މަނާކުރެއްވި އެންމެހާ ކަންތައްތަކުން ދުރުވެ ރައްކާތެރިވުން ކަމަށް ޚުތުބާގައިވެއެވެ.
ފާފަތަކުންދުރުވެ ހެޔޮއަމަލު ކުރުމުގައްޔާއި އެހެން މީހުން ވެސް ހެޔޮމަގަށް ގެނެވޭތީ ޙިކްމަތްތެރިކަމާއެކު މަސައްކަތްކޮށް، ނަރަކައަށް ބިރުވެތިވުމަށް ޚުތުބާގައި ވަނީ ނަސޭހަތްތެރިވެފައެވެ.
