ކުޅުދުއްފުށީގެ ކުނި ކޮށިން މިހާތަނަށް 400 ޓަނުގެ ކުނި ހުސްކޮށްފި
ކުޅުދުއްފުށީ ކުނިކޮށީގައި 92000 ޓަނުގެ ކުނި ހުސްކުރަން އެބަހުރި
ކުޅުދުއްފުށީ ކުނި ކޮށި
ކުޅުދުއްފުށި ސިޓީގެ ކުނި ކޮށިން މިހާތަނަށް 400 ޓަނުގެ ކުނި ހުސްކޮށް ނިމިފައިވާކަމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯއިން ހާމަކޮށްފިއެވެ. ރާއްޖޭގެ އެކި ކަންކޮޅުތަކުގައި ކުނި މެނޭޖްކުރުމަށް ކުރާ މަސައްކަތްތަކުގެ ތަފްސީލު ވެމްކޯއިން ދަނީ ހާމަކުރަމުންނެވެ.
ކުޅުދުއްދުށި ސިޓީގައި މިވަގުތު ކުރަމުންދާ މަސައްކަތްތަކުގެ މަޢުލޫމާތު ހާމަކޮށްކުރި ޓުވީޓެއްގައި ވެމްކޯއިން ވަނީ ކުޅުދުއްފުށި ސިޓީގެ ކުނި ކޮށިން ގާތްގަނޑަކަށް 400 ޓަނުގެ ކުނި ހުސްކޮށް ނިމިފައިވާކަމަށެވެ. މި މަސައްކަތް ހަލުވުކުރުމަށް މާލެއިން އިތުރު ބޯޓެއް ގެނައުމުގެ މަސައްކަތް ވެސް ވެމްކޯއިން އަންނަނީ ކުރަމުންނެވެ. ކުޅުދުއްފުށީ ކުނިކޮށީގައި ހުރި ކުނިތައް ނަގައި ސާފުކުރުމުގެ މަސައްކަތް ވެމްކޯއިން ފަށާފައިވަނީ، ފެބުރުއަރީ 7 ވަނަ ދުވަހުއެވެ. ގާތްގަނޑަކަށް ވިއްސަކަށް އަހަރުވެފައިވާ ކުޅުދުއްފުށީ ކުނިކޮށީގައި 92000 ޓަނުގެ ކުނި ހުސްކުރަން އެބަހުރިކަމަށް ވެމްކޯއިން ބުނެއެވެ.
ކުނިމެނޭޖް ކުރާނެ ނިޒާމެއްނެތި ކުނިކޮށްޓަށް ކުނިތައް އުކަންޖެހުމުގެ ސަބަބުން ކުޅުދުއްފުށީގެ ކުނިކޮށިވަނީ ބޮއްސުންލާފައެވެ. މެހިގިނަވުމާއި ކުނިކޮށިން ދުވާ ނުބައި ވަހުން މުޅި ސަރަހައްދު އޮންނަނީ ތަޣައްޔަރުވެފައެވެ. ކުޅުދުއްފުށީ ކުނިކޮއްޓާ އިންވެގެން އޮންނަ ޒޯން ސްޓޭޑިއަމްގައި އެކި ކުޅިވަރު ކުޅުމާއި އެކި ކަންކަމުގައި ހަރަކާތްތެރިވާ ފަރާތްތަކަށާއި އެތާކައިރީގައި ހުންނަ އަފީފުއްދީން ސްކޫލްގައި ތިބޭ ދަރިވަރުންނަށް ކުނިކޮށިން ދުވާ ވަހާއި ކުނިތައް އަންދަމުންދާއިރު އަރާދުމުން ވަރަށްބޮޑަށް އުނދަގޫވަމުންދެއެވެ.
ޒަމާންވީ މި މައްސަލައަށް ހައްލެއް ހޯއްދަވައި ދެއްވުމަށްޓަކައި ސަރުކާރުންވަނީ މިގޮތަށް ގިނަދުވަސްވެ ކުނި ޖަމާވެފައިވާ 20 ރަށަކުން ކުނިނަގައި ސާފުކުރުމުގެ މަސައްކަތް ވެމްކޯއާ ހަވާލުކޮށްފައެވެ. އަދި ދާއިމީ ގޮތެއްގައި ކުނި މެނޭޖްކުރެވޭނެ އިންތިޒާމް ހަމަޖެއްސުމަށްޓަކައި ރާއްޖޭގެ 3 ސަރަހައްދެއްގައި ކުނި މެނޭޖްކުރާނެ ނިޒާމްގާއިމްކުރުމުގެ މަސައްކަތް ކުރައްވަމުންގެންދަވާ ކަމަށް މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލޙް ވަނީ ވިދާޅުވެފައެވެ. މީގެ އިތުރުން މިދާއިރާއިން ކުރިއަށްއޮތް ތަނުގައި، ސަރުކާރުން އެންމެ ބޮޑު އިސްކަމެއް ދޭނީ ރަށު ފެންވަރުގައި ރައްކާތެރިކަމާއެކު ކުނި މެނޭޖްކޮށް، ކުނިން މަންފާ ހޯދޭނެ ނިޒާމެއް ޤާއިމްކޮށްދިނުމަށް ކަމަށްވެސް ރިޔާސީ ބަޔާނުގައި ރައީސުލްޖުމްހޫރިއްޔާވަނީ ވިދާޅުވެފައެވެ.
