ކޮމިއުނިކޭޝަންސް، ސައިންސް އެންޑް ޓެކްނޮލިޖީ މިނިސްޓަރު މަލީހު ޖަމާލުގެ އިތުބާރުނެތްކަމުގެ މައްސަލަ އެމްޑީޕީން މަޖިލީހަށް ހުށަހެޅުމާއެކު އެމްޑީޕީގެ ޕީޖީ ލީޑަރ އަލީ އާޒިމް އާއި މިނިސްޓަރ މަލީހު އާ ދެމެދު ސޯޝަލް މީޑިޔާގައި ކޯޅުންގަނޑެއް ހިނގައިފިއެވެ.
މަލީހުގެ އިތުބާރުނެތްކަމުގެ މައްސަލަ އެމްޑީޕީގެ ޕީޖީ ގްރޫޕްގެ ފަރާތުން ހުށަހެޅުއްވިކަން ހާމަކުރައްވާ މެދު ހެންވޭރު ދާއިރާގެ މެމްބަރ އަލީ އާޒިމް ވަނީ ބުދަ ދުވަހު ޓްވީޓެއްކުރައްވާފައެވެ. މައްސަލަ ބޮޑުވީ މިޓްވީޓަށް މިނިސްޓަރ މަލީހު ރައްދުދެއްވި ހިސާބުންނެވެ.
އެމްޑީޕީން މަލީހުގެ އިތުބާރުނެތްކަމަށް ހުށަހަޅަނީ ކޮމިއުނިކޭޝަންސް އޮތޯރިޓީއިން ހަދަން ޖެހޭ އެއްވެސް ގަވާއިދެއް މަގާމުގައި ހުންނަވާތާ ދެ އަހަރު ވީއިރުވެސް މިނިސްޓަރ މަލީހު ހަދާފައިނުވާ ކަމަށެވެ. އަދި ވުޒާރާއެއްގެ ވަޒީރުގެ ޒިންމާއެއް އަދާ ނުކުރެވި ހޭދަވާ ކޮންމެ ދުވަހަކީ ދައުލަތަށާއި، ރައްޔިތުންނަށް އެތަކެއް ގެއްލުންތަކެއް ކުރިމަތިކުރުވާ ކަމެއްކަން ކަށަވަރުވާ ހިނދު މިނިސްޓަރުގެ ފަރާތުން އެއްވެސް އެއްބާރުލުމެއް ދެއްވާފައި ނުވާ ކަމަށާއި އަދި އެކަމަށް ހުރަސް އަޅުއްވާފައިވާކަން ސާފުވާ ކަމަށެވެ.
އެހެންކަމުން މަލީހު އިތުރަށް ބެހެއްޓުމަކީ އެމްޑީޕީއަށް އިތުބާރު އޮތް ކަމަކަށް ނުވާތީ އާއި، ގިނަ ރައްޔިތުންތަކެއް އޭނާ މަގާމުން ވަކިކުރުމަށް ކެނޑިނޭޅި އެދުމުންދާތީ މަލީހު މަގާމުން ވަކިކުރަން ހުށައަޅާ ކަމަށެވެ.
އިތުބާރުނެތްކަމުގެ މައްސަލަ ހުށަހެޅުއްވުމުން މިނިސްޓަރ މަލީހު ކުރެއްވި ޓްވީޓްގައި ވިދާޅުވީ އަސާސެއްނެތް ކަމެއްގައި އިލްޒާމު އަޅުވާ އަދަބުދޭން އުޅުމަކީ ދުސްތޫރާ ޚިލާފުކަމެއް ކަމަށެވެ. އަދި މަލީހުގެ ޓްވީޓްގައި ވަނީ މިދިޔަ އަހަރުގެ ޑިސެމްބަރ މަހު އެޓަރނީ ޖެނެރަލް އޮފީހުގެ ލަފާފުޅަކަށް އެދި ހުށަހަޅާފައިވާ 9 ގަވާއިދު ހިމަނުއްވާފައެވެ.
މަލީހުގެ މިޓްވީޓަށް ރައްދުދެއްވާ އަލީ އާޒިމް ޓްވީޓް ކުރައްވަމުން ވިދާޅުވީ މިކަމުގައި ތިޔަހައްދަަވަނީ އިތުރުފުޅެއްކަމަށެވެ. އަވަސް އަރުވާލައިގެން ގަވާއިދު ހަދާ އޭޖީ އޮފީހަށް ފޮނުވާފައިވަނީ މަލީހުގެ އިތުބާރުނެތްކަމަށް އެމްޑީޕީގެ ޕީޖީ ގްރޫޕްގައި ނިންމިފަހުން ކަމަށެވެ.
އެކަމާއިގުޅިގެން މަލީހު ކުރެއްވި ޓްވީޓްގައި ވިދާޅުވީ ވީޓީވީގެ ގޮނޑިކޮޅު ޕްރޮގްރާމްގައި ބަރުލަމާނީ ނިޒާމަށް ތާއީދުނުކުރާކަމަށް ވިދާޅުވި ހިސާބުން އެކަން ހަޖަމުނުކުރެވިގެން އުޅުއްވާކަމަށެވެ. އަދި ހަކުރާގޭ ފެންޑާގައި އެކޮޅުކޮޅުން އެލުވިއަސް މާއްދާ 27ގެ ބޭނުން ހިއްޕަވާނެކަމަށާއި ބިރު ނުދެއްކޭނެކަމަށް ވަނީ ވިދާޅުވެފައެވެ.
ހަކުރާގޭ ފެންޑާއަކީ މަޖިލިސްކުރާ ގޭގެ ފެންޑާއެވެ. ދިވެހި ތާރީޚު ބުނާގޮތުން މަޖިލިސް ކުރާ ގެޔަކީ ކުރީގެ ހަކުރާ ގެޔާއި މާބަގީޗާގެ އެއްކޮށްލާފައި ނެގިފައިވާ ބިމެކެވެ.
މަލީހު މިމޭރުމުން ޓްވީޓްކުރެއްވުމުން އާޒިމް ވަނީ ބިރުދައްކަނީތޯ ސުވާލުކުރައްވާފައެވެ.
އެއާއެކު މަލީހު ވަނީ ޕީޖީ ލީޑަރުގެ ތާކިހާ އަޅުއްވައިގެން ހަތަރުދަމު އާޒިމް ކުރައްވާ މަސައްކަތަކީ ސަރުކާރު ބަލިކަށިކުރުން ކަމަށް ތުހުމަތު ކުރައްވާފައެވެ. އަދި ފަހަރަކު ވަޒީރަކާއި އެއްވެސް އަސާސެއްނެތި ދިމާކޮށް ޖެއްސުންކުރަމުންދާ ކަމަށް މަލީހު ވިދާޅުވިއެވެ.
އެގޮތުން މަލީހުގެ ޓްވީޓްގައި ފާހަގަކުރައްވާފައިވަނީ އިކޮނޮމިކް މިނިސްޓަރ ފައްޔާޒު އިސްމާއީލާއި ޔޫތު މިނިސްޓަރ އަހުމަދު މަޚުލޫފް އަދި ފިޝަރީޒް މިނިސްޓަރ ޒަހާ ވަހީދުގެ އިތުރުން ހޯމް މިނިސްޓަރ އިމްރާން އަބްދުﷲ އެވެ. ލިބޭނެ މޮޅެއް ނޯންނާނެކަމަށާއި ބޮޑާނުވެ ހުންނެވުމަށް މަލީހު ވަނީ ވިދާޅުވެފައެވެ.
އެމްޑީޕީގެ ޕާލަމަންޓްރީ ގްރޫޕްގެ މެމްބަރުން މީގެކުރިންވެސް މަލީހު އާ ގުޅޭގޮތުން ކުރެއްވާ ޓްވީޓްތަކަށް މިނިސްޓަރ މަލީހު ވަނީ މިމޭރުމުން ޖަވާބުދެއްވާފައެވެ.
މިނިސްޓަރ މަލީހުގެ އިތުބާރު ނެތްކަމުގެ މައްސަލަ 10 މެންބަރުންގެ ސޮޔާއެކު އެމްޑީޕީ ޕީޖީ ގްރޫޕަށް ގަލޮޅު ދެކުނު ދާއިރާގެ މެމްބަރ މީކާއިލް ނަސީމް ހުށަހެޅުއްވީ މިދިޔަ އަހަރުގެ ނޮވެމްބަރ މަހުއެވެ. މަލީހުގެ އިތުބާރުނެތްކަމަށް އެމްޑީޕީ ޕީޖީން ފާސްކޮށްފައިވަނީ ނޮވެމްބަރ މަހުގެ 22 ވަނަ ދުވަހުއެވެ.
މަލީހުގެ އިތުބާރުނެތްކަމުގެ މައްސަލަ އެމްޑީޕީގެ ޕީޖީން މަޖިލީހަށް ހުށަހެޅިނަމަވެސް އެކަމުގައި އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގޮތެއް ނުނިންމަވާކަމަށް ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެއޮފީހުގެ ތަރުޖަމާން މަބްރޫކް އަޒީޒް ވަނީ ވިދާޅުވެފައެވެ.
