ބާސާ މެޗު ގާތްވެފައިވަނިކޮށް ނޭމާއަށް އަނިޔާވެއްޖެ

ޔުއެފާ ޗެމްޕިއަންސް ލީގުގެ ދެވަނަ ބުރުގައި ބާސެލޯނާ އާއި ޕީއެސްޖީ ބައްދަލުކުރަން އޮތް މެޗު ގާތްވެފައިވަނިކޮށް ބްރެޒިލުގެ ތަރި ނޭމާއަށް އަނިޔާވެއްޖެއެވެ.

ޗެމްޕިއަންސް ލީގުގެ ދެވަނަ ބުރުގެ ކުޅުން އަންނަ ހަފުތާގައި ފަށާއިރު، ބާސާގެ ދަނޑުގައި ކުޅޭ ފުރަތަމަ ލެގުގެ މެޗު ކުޅުމަށް ތާވަލުކޮށްފައިވަނީ އަންނަ އަންގާރަ ދުވަހުގެރެއެވެ.

ޗެމްޕިއަންސް ލީގުގެ ދެވަނަ ބުރުގައި ޕީއެސްޖީން ބާސާއާ ދެކޮޅަށް ނުކުންނައިރު، މިއީ 2017 ވަނަ އަހަރުގެ މާޗު މަހަށްފަހު މި ދެ ޓީމު ބައްދަލުކުރާނެ ފުރަތަމަ ފަހަރެވެ. އެ ފަހަރުވެސް މި ދެ ޓީމު ބައްދަލުކޮށްފައިވަނީ ޗެމްޕިއަންސް ލީގުގެ ދެވަނަ ބުރުގައެވެ. އެ ފަހަރު ދެވަނަ ބުރުގެ ފުރަތަމަ ލެގުގައި ޕީއެސްޖީ އަތުން 4-0 ން ބަލިވެފައިވަނިކޮށް، ދެވަނަ ލެގުގައި ބާސާ ވަނީ ޕީއެސްޖީ އަތުން 6-1 އިން މޮޅުވެ، ކުއާޓާއިން ޖާގާ ހޯދައި، ޗެމްޕިއަންސް ލީގުގެ ތާރީޚުން ޖާގަ ހޯދާފައެވެ. އެއާއެކު ބާސާ ވެފައިވަނީ ފުރަތަމަ ލެގުން 4-0 ން ބަލިވެފައިވަނިކޮށް، ދެވަނަ ލެގުގައި އެ ނަތީޖާ އަނބުރާލި ފުރަތަމަ ޓީމަށެވެ.

އޭގެ ފަހުން ދުނިޔޭގެ ރިކޯޑު އަގެއް ކަމަށްވާ 222 މިލިޔަން ޔޫރޯއަށް ނޭމާ ބާސާ ދޫކޮށް ޕީއެސްޖީއަށް ބަދަލުވިއިރު، މި ފަހަރުގެ މެޗުތައް ވެގެންދާނީ ބާސާއާ ދެކޮޅަށް ނޭމާ ނުކުންނަ ފުރަތަމަ މެޗަށެވެ.

އެކަމަކު އެ މެޗު ގާތްވެފައިވަނިކޮށް ބުދަ ދުވަހުގެރޭ ފްރެންޗް ކަޕުގައި ޕީއެސްޖީ ކުޅުނު މެޗުގެ ތެރެއިން ނޭމާއަށް ވަނީ އަނިޔާވެފައެވެ. ރަށުން ބޭރުގައި ކޯން އަތުން 1-0 ގެ ނަތީޖާއަކުން ޕީއެސްޖީ މޮޅުވި މެޗުގެ 60 ވަނަ މިނެޓުގައި ލިބުނު އަނިޔާއަކާ ގުޅިގެން ނޭމާ ވަނީ ބަދަލުކޮށްފައެވެ.

އެއަށްފަހު ނޭމާގެ މެޑިކަލް ޓެސްޓުތައް ހެދިއިރު، ރިޕޯޓުތައް ބުނާ ގޮތުން ނޭމާގެ ފައިގެ ފަލަމަސްގަނޑަށް ވަނީ އަނިޔާވެފައެވެ. އެކަމަކު އެ އަނިޔާ ސީރިއަސް ނޫން ކަމަށާއި، ބާސާ މެޗަށް ނޭމާ ފިޓުވާނެ ކަމަށްވެސް ރިޕޯޓުތައް ބުނެއެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި އަންނަ އަންގާރަ ދުވަހުގެރޭ ބާސާ އާއި ޕީއެސްޖީ ބައްދަލުކުރާއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު ކުޅޭނީ އަންނަ މާޗު މަހުގެ 11 ވަނަ ދުވަހުއެވެ.