މިޔަންމާގެ އަސްކަރީ ލީޑަރުންނާއި ދެކޮޅަށް އެމެރިކާއިން ފިޔަވަޅު އަޅަނީ

މިޔަންމާގެ އަސްކަރީ ލީޑަރުންނާއި ދެކޮޅަށް އެމެރިކާއިން ދަތިކުރުމުގެ ފިޔަވަޅުތައް އަޅާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

ބައިޑެން ވަނީ ބުދަ ދުވަހު މިޔަންމާގެ އަސްކަރީ ބަޣާވާތުގައި ބައިވެރިވި ފަރާތްތަކާއި، އެ މީހުންނާއި ގުޅުންހުރި އާއިލާ މެމްބަރުންނާއި ވިޔަފާރިތަކަށް ދަތިކުރުމުގެ ފިޔަވަޅު އެޅުމުގެ އަމުރެއްގައި ސޮއި ކުރައްވާފައެވެ. އަދި އެ ފިޔަވަޅުތައް އަޅާނެ ފަރާތްތައް އަންނަ ހަފްތާގެ ތެރޭގައި އާންމު ކުރައްވާނެކަމަށް ބައިޑެން ވަނީ ވިދާޅުވެފައެވެ.

ބައިޑެން އަޅަން ނިންމާފައިވާ ފިޔަވަޅުތަކުގެ ތެރޭގައި އެމެރިކާގައި ހުރި މިޔަންމާ ސަރުކާރުގެ އެއް ބިލިއަން ޑޮލަރު އެގައުމުގެ އަސްކަރިއްޔާއަށް ބޭނުން ކުރެވޭނެ މިންވަރު ކުޑަ ކުރުމާއި، މިޔަންމާގައި ސިއްހީ ފަރުވާދޭ މަދަނީ ޖަމިއްޔާތަކަށާއި އެގައުމުގެ ރައްޔިތުންނަށް ސީދާ ގޮތެއްގައި ފައިދާވާ ފަދަ މުދަލަށް ބުރޫ ނާރާ ގޮތަށް އެގައުމުގެ އަސްކަރިއްޔާގެ މުދާ ފްރީޒް ކުރުން ހިމެނެއެވެ.

މީގެ އިތުރުން އެމެރިކާއިން މިޔަންމާއަށް އެކްސްޕޯޓު ކުރާ ބައެއް މުދާވެސް ކޮންޓްރޯލް ކުރާނެ ކަމަށް ބައިޑެން ވަނީ ވިދާޅުވެފައެވެ.

މިޔަންމާގެ އަސްކަރިއްޔާއިން އަސްކަރީ ބަޣާވާތެއްކޮށް އެގައުމުގެ ލީޑަރު އަން ސަން ސޫކީ ހައްޔަރު ކޮށްފައިވާއިރު، އޭނާގެ މައްޗަށް ވަނީ ދައުވާވެސް އުފުލާފައެވެ. ރިޕޯޓްތައް ބުނާ ގޮތުން މިޔަންމާގައި ބަޣާވާތްކޮށް ވެރިކަން ވައްޓާލައިފައިވަނީ އިންތިހާބު އިންސާފުވެރިކޮށް ބޭއްވުމަށް ކަމަށް ބުނެއެވެ.