އެސްޓްރަޒެނެކާގެ ކޮވިޑް-19 ވެކްސިން ޖެހުމަށް ޑަބްލިޔުއެޗްއޯގެ މާހިރުންގެ ޓީމުން ލަފާދީފި

އެސްޓްރަޒެނިކާ އާއި އޮކްސްފޯރޑް ޔުނިވަރސިޓީ ގުޅިގެން ކޮވިޑް-19 އަށް އުފެއްދި ވެކްސިން ޖެހުމަށް، ވެކްސިންގެ ކަންކަމުގައި ދުނިޔޭގެ ސިއްހަތު ޖަމިއްޔާ(ޑަބްލިޔުއެޗްއޯ)އަށް ލަފާދޭ މާހިރުންގެ ޕެނަލުން ލަފާދީފިއެވެ.

މި ޕެނަލުން ބުނެފައިވަނީ އެސްޓްރަޒެނިކާ ވެކްސިން، އުމުރުން 65 އަހަރުން މަތީގެ މީހުން ވެސް ހިމެނޭގޮތަށް ހުރިހާ އުމުރުފުރައެއްގެ މީހުންނަށް ބޭނުންކުރުން ރަނގަޅުކަމަށެވެ. ވެކްސިންގެ ދެ ޑޯޒް ޖަހަންޖެހޭއިރު ޕެނަލުން ބުނީ ފުރަތަމަ ޑޯޒް ދިނުމަށްފަހު 8 ހަފްތާ އާއި 12 ހަފްތާ އާ ދެމެދުގައި މުއްދަތެއްގައި ދެވަނަ ޑޯޒް ދޭންވާނެ ކަމަށެވެ.

އެސްޓްރަޒެނިކާގެ ވެކްސިން ދެކުނު އެފްރިކާގެ ވޭރިއަންޓަށް މަސައްކަތްކުރާ މިންވަރު ދަށްވެފައިވާކަމަށް ބުނެ ދައްކަމުންދާ ވާހަކަތަކާ ގުޅިގެން ޕެނަލުން ބުނީ އެސްޓްރަޒެނިކާ ވެކްސިން ދެކުނު އެފްރިކާ ވޭރިއަންޓަށް ބޭނުންނުކުރަން ޖެހޭ ސަބަބެއް ނެތްކަމަށެވެ.

ދެކުނު އެފްރިކާއިން މި ހަފްތާގައި ވަނީ އެސްޓްރަޒެނިކާގެ ވެކްސިން ޖެހުން މެދުކަނޑާލާފައެވެ. އެއީ ދެކުނު އެފްރިކާގެ ވޭރިއަންޓަށް އެސްޓްރަޒެނިކާގެ ވެކްސިނުން އަސަރުނުކުރާ ކަމަށް ޑާޓާތަކަކުން ދެއްކުމުންނެވެ. އެހެންނަމަވެސް އެއީ ނިސްބަތުން މަދު ޑާޓާތަކެއް ކަމަށް މާހިރުން ބުނެއެވެ.

މިހާރު ފެނިފައިވާ ކޮވިޑްގެ އައު ވޭރިއަންޓްތަކަށް ބަލާއިރު ވެކްސިންތަކުން އަސަރުކުރާ މިންވަރު ދަށްކަމަށް މިހާތަނަށް ހޯދިފައިވާ ވޭރިއަންޓަކީ ވެސް ދެކުނު އެފްރިކާގެ ވޭރިއަންޓެވެ.

އެސްޓްރަޒެނިކާ ވެކްސިން ދުނިޔޭގެ އެކި ގައުމުތަކުގައި މިހާރު ޖަހަމުންދާއިރު ރާއްޖޭގައި ރާއްޖޭގައި މިހާރު ބޭނުންކުރަމުންދަނީ ސިރަމް އިންސްޓިޓިއުޓް އޮފް އިންޑިއާއިން އުފައްދަމުން އަންނަ އޮކްސްފޮޑް-އެސްޓްރަޒެނެކާ ވެކްސިނެވެ. މިވެކްސިން އިންޑިއާގައި އުފައްދަމުން އަންނަނީ "ކޮވިޝީލްޑް" ގެ ނަމުގައެވެ.