މިއަދު ކޮވިޑް-19އަށް ޕޮޒިޓިވްވީ 100 މީހުން
10 ފެބުރުއަރީ 2021 | ބުދަ 17:16މިއަދު 100 މީހުން ޕޮޒިޓިވްވީ 3،703 ސާމްޕަލްގެ ތެރެއިން
މާލެ ސަރަހައްދުގައި ރެންޑަމް ސާމްޕަލް ނަގަނީ
ފާއިތުވި 24 ގަޑިއިރު ރާއްޖެއިން ކޮވިޑް-19އަށް ޕޮޒިޓިވްވީ 100 މީހުން ކަމަށް އެޗްޕީއޭއިން ބުނެފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން އަންގާރަ ދުވަހުގެ އިރު އޮއްސި ހަޔަކުން ބުދަ ދުވަހުގެ އިރު އޮއްސި ހަޔަކާ ހަމައަށް ނެގި 3،703 ސާމްޕަލްގެ ތެރެއިން ޕޮޒިޓިވްވީ 100 މީހުންނެވެ. އޭގެ ތެރެއިން 75 ކޭސް އަކީ މާލެ ސަރަހައްދުން ފެނުނު ކޭސްތަކެވެ. އަދި އަތޮޅުތެރެއިން 10 ކޭސް އާއި ރިސޯޓުތަކުން 15 ކޭސް ފެނިފައިވާ ކަމަށް ވެސް އެޗްޕީއޭއިން ބުނެފައިވެއެވެ.
މި 100 ކޭސްއާއެކު ރާއްޖޭގެ ޕޮޒިޓިވް ކޭސްތަކުގެ ޖުމްލަ އަދަދު ވަނީ 17،201ށް އަރާފައެވެ. އޭގެ ތެރެއިން މިހާރު 14،978 މީހުން ބަލިން ރަނގަޅުވެފައިވާއިރު މިހާރު ފަރުވާދެމުން އަންނަނީ 2،160 މީހުންނަށެވެ. މި ބަލީގައި ރާއްޖެއިން މިހާތަނަށް 56 މީހުން ވަނީ މަރުވެފައެވެ.
