ބިންހެލުންތަކަކާއި ގުޅިގެން އޮސްޓްރޭލިއާގެ ބައެއް ސަރަޙައްދުތަކަށް ސުނާމީގެ އިންޒާރު!

ބޮޑު 2 ބިންހެލުމަކާއި ގުޅިގެން އޮސްޓްރޭލިއާގެ ބައެއް ސަރަޙައްދުތަކަށް ސުނާމީއެއް އަރާފާނެކަމުގެ އިންޒާރު ނެރެފިއެވެ.

ޑެއިލީމެއިލްގައި ރިޕޯޓު ކޮށްފައިވާ ގޮތުން ބުދަ ދުވަހުގެ ވަގުތެއްގައި ޕެސިފިކް ކަނޑަށް ބާރުގަދަ 2 ބިންހެލުމެއް އައިސްފައިވާއިރު، އެއީ ރެކްޓަރ މިންގަނޑުން 5.6 ގެ ބިންހެލުމަކާއި، 7.6 ގެ ބިންހެލުމެކެވެ. އެއާ ގުޅިގެން ސުނާމީގެ އިންޒާރު ނެރިފައިވާއިރު، ވީ އެންމެ އަވަހަށް ރައްކާތެރިކަން ހޯދުމަށް އެ ޤައުމުގެ ސުނާމީ ވޯރނިންގ ސެންޓަރުން ރައްޔިތުންނަށް ވަނީ ގޮވާލާފައެވެ.

ރިޕޯޓުތައް ބުނާ ގޮތުން އެންމެ ފުރަތަމަ ބިންހެލުން އައިސްފައިވަނީ ނިއު ކެލެޑޯނިއާގެ ދެކުނު އިރުމަތީގައިވާ "ލޯޔަލްޑީ އައިލެންޑްސް" އޮންނަ ސަރަޙައްދަކަށެވެ. އަދި މި ބިންހެލުންތަކާ ގުޅިގެން ސުނާމީއެއް އަރާފާނެކަމުގެ އިންޒާރު ދީފައިވާއިރު، ކަނޑުގެ ލޮނުގަނޑުގެ އުސްމިންތަކަށް އަންނަ ބަދަލުތަކަށް ބަލައި، ސުނާމީއެއް އެރުން ވަރަށް އެކަށީގެންވާކަމަށްވެސް ވަނީ ލަފާ ކޮށްފައެވެ.

އޭގެ އިތުރުން، މޫދާއި ކަނޑުގެ ސަރަޙައްދާ ވީހާވެސް ދުރަށްގޮސް، ރައްކާތެރި ހިސާބުތަކަށް ދިއުމަށް ގޮވާލާފައިވާއިރު، މިވަގުތު ސުނާމީގެ އިންޒާރު ނެރިފައިވަނީ ނިއު ކެލެޑޯނިއާއާ ކައިރި ސަރަޙައްދުތަކަށެވެ. އަދި އޮސްޓްރޭލިއާގެ މައި ސްޓޭޓުތަކަށް އަދި ސުނާމީގެ އިންޒާރު ނެރެފައެއް ނުވެއެވެ.

ނިއު ކެލެޑޯނިއާގެ ލޯޔަލްޓީ އައިލެންޑްސްއަކީ އޮސްޓްރޭލިއާގެ މައި ބިމާއި 1800 ކިލޯމީޓަރު ދުރުގައި އޮންނަ ރަށެކެވެ.