ފުވައްމުލަކު ސިޓީއިން ނެގި ރެންޑަމް ސާމްޕަލިންގެ ތެރެއިން ދެ ސާމްޕަލެއް ކޮވިޑަށް ޕޮޒިޓިވްވުމާއެކު އެ ސިޓީގައި ރައްކާތެރިކަމުގެ ފިޔަވަޅުތައް ވަރުގަދަ ކޮށްފިއެވެ.

ފުވައްމުލަކުގައި ރެންޑަމް ސާމްޕަލިންގ ނަގާފައިވަނީ އައްޑޫ ސިޓީގައި ކޮވިޑްގެ ހާލަތު ގޯސްވުމާ ގުޅިގެންނެވެ. އެގޮތުން މިހާތަނަށް 150 މީހެއް ކޮވިޑަށް ޓެސްޓު ކޮށްފައިވާއިރު، 113 ސާމްޕަލްގެ ނަތީޖާ ވަނީ ލިބިފައެވެ. އަދި އޭގެ ތެރެއިން ދެ މީހެއް ވަނީ ކޮވިޑަށް ޕޮޒިޓިވްވެފައެވެ.

ފުވައްމުލަކުން ޕޮޒިޓިވް ދެ ކޭސް ފެނުމާއެކު އެ ސިޓީ މިހާރު ވަނީ މޮނީޓަރިންގެ ހާލަތައް ގެނަސްފައެވެ. އެއާއެކު ފުވައްމުލަކު ސިޓީ ކައުންސިލުން ވަނީ ރައްކާތެރި ކަމުގެ ފިޔަވަޅުތައް ހަރުކަށިކޮށްފައެވެ.

އެގޮތުން އަޅާފައިވާ ފިޔަވަޅުތަކަށް ބަލާއިރު، ޒަރޫރީ ބޭނުމެއްގައި ނޫނީ އެއްގެއިން އަނެއް ގެއަށް ޒިޔާރާތް ނުކުރުމާއި، ފުވައްމުލަކުގައި ގާއިމުކޮށްފައިވާ އޮފީސްތައް ބަންދުކޮށް ކޮންމެހެން ދޭން ޖެހޭ ޚިދުމަތްތައް އޮންލައިންކޮށް ދިނުމާއި، ސްކޫލްތަކާއި ކޮލެޖުތައް ބަންދުކުރުމާއި، ކެފޭ ރެސްޓޯރެންޓްތަކުން ޓޭކް އަވޭ އަދި ޑެލިވަރީގެ ޚދުމަތް ފިޔަވާ އެހެން ހިދުމަތްތައް ހުއްޓާލުމާއި، ފިހާރަތަކަށް މީހުން ވެއްދުމުގައި ވަކި އަދަދަކަށް ވުރެ އިތުރަށް މީހުން ނުވެއްދުމާއި، އާންމު މައިދާންތަކާއި ޕާކުތަކަށް އެއްނުވުމާއި، ސެލޫން އަދި ޖިމްތައް ބަންދުކުރުމާއި، ޕާޓީތަކާއި ހަފްލާތައް އަދި ބައްދަލުވުންތައް ނުބޭއްވުމާއި، ޓެކްސީ ޚިދުމަތް ފޯރުކޮށްދިނުމުގައި އެޗްޕީއޭގެ މިންގަނޑުތަކަށް ފެތޭނެހެން ޚިދުމަތް ފޯރުކޮށްދިނުމާއި، ހުރިހާ ކުޅިވަރު ހަރަކާތެއް ހުއްޓާލުން ހިމެނެއެވެ.

މީގެ އިތުރުން ފުވައްމުލަކު ހޮސްޕިޓަލުން ވަނީ ކޮންޓެކްޓް ޓްރޭސިންގ ހަދައި ނިމެންދެން އެ ހޮސްޕިޓަލުގެ އޯޕީޑީ ޚިދުމަތް ހުއްޓާލުމަށް ނިންމާފައެވެ. ފުވައްމުލަކު ހޮސްޕިޓަލުން ބުނީ އޯޕީޑީގެ ޚިދުމަތް ވަގުތީ ގޮތުން މެދު ކަނޑާލިނަމަވެސް އެމަޖެންސީ ޚިދުމަތްތައް މެދުކެނޑުމެއްނެތި 24 ގަޑިއިރު ދެމުންގެންދާނެ ކަމަށެވެ.

ފުވައްމުލަކުން ކޮވިޑްގެ ދެ ކޭސް ފެނިފައިވާއިރު، އެރަށުން ނުލިބޭ ސިއްހީ ޚިދުމަތްތައް ހޯދުމަށާއި، ވިޔަފާރިއަށް އެރަށު ރައްޔިތުން އަންނަނީ އައްޑޫއަށް ދަތުރުކުރަމުންނެވެ. ނަމަވެސް އައްޑޫ މޮނިޓަރިންގެ ހާލަތަށް ގެނެވިފައިވުމާއެކު މި ދަތުރުތައް ވެސް ވަނީ ހުއްޓުމަކަށް އައިސްފައެވެ.