އައްޑޫ ސިޓީން ކޮވިޑް-19ގެ ކޭސްތައް ފެންނަމުންދާއިރު، މިހާރު އައްޑޫ ސިޓީން އިތުރު 44 މީހަކު ޕޮޒިޓިވްވެފައިވާކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
އެޗްއީއޯސީ އިން ބުނީ ހިތަދޫ ކްލަސްޓަރއިން 19 މީހަކު ޕޮޒިޓިވްވެފައިވާ ކަމަށާއި، ކޮންޓެކްޓް ޓްރޭސިންގ މަސައްކަތުގެ ދަށުން 100 މީހުން ދެނެގަނެވިފައިވާ ކަމަށެވެ. އަދި ހުޅުމީދޫ ކްލަސްޓަރއިން 25 މީހަކު ޕޮޒިޓިވްވެފައިވާ ކަމަށެވެ.
ހިތަދޫ ކްލަސްޓަރއިން އެންމެ ފުރަތަމަ ދެމީހަކު ޕޮޒިޓިވްވީ މިމަހުގެ 5 ދުވަހުއެވެ. އެ ދެ މީހުންނާ ކޮންޓެކްޓުވި ދެ މީހުން މިމަހުގެ 6 ވަނަ ދުވަހު ޕޮޒިޓިވްވެފައިވާއިރު ހިތަދޫއިން ފުރަތަމަ ޕޮޒިޓިވްވި ދެ މީހުންނާ ކޮންޓެކްޓް ވެފައިވާ އިތުރު މީހެއް ގދ. ތިނަދޫގައި ހުރުމާއެކު ސާމްޕަލް ނަގައި ޓެސްޓު ކުރުމުން އެމީހާ ވަނީ މި މަހުގެ 7 ވަނަ ދުވަހު ޕޮޒިޓިވްވެފައެވެ.
ކޮވިޑް-19ގެ ކޭސްތަކެއް ތިނަދޫން ފެނިފައިވާއިރު، އެރަށުގައި ކޮވިޑް-19 އަށް ޓެސްޓްކުރުމަށް ރެންޑަމް ސާމްޕަލްނެގުމުގެ މަސައްކަތްކުރަމުން ދެއެވެ. މަޢުލޫމާތު ލިބިފައިވާ ގޮތުގައި، މިދިޔަ ހަފުތާގައި ތިނަދޫން މާލެއަށް ދަތުރުކުރި ދެމީހަކު ކޮވިޑް-19އަށް ޕޮޒިޓިވް ވެފައިވެއެވެ. އެކަމާ ގުޅިގެން ވެސް ސާމްޕަލް ނެގުމުގެ މަސައްކަތް ކޮށްފައިވެއެވެ. އޭގެފަހުން އައްޑޫ ސިޓީ ހިތަދޫން ޕޮޒިޓިވްވި މީހަކާ ކޮންޓެކްޓްވި މީހަކު ތިނަދޫން ވެސް ޕޮޒިޓިވްވެފައިވާ ކަމަށްވެއެވެ. ރެންޑަމް ސާމްޕަލް ނެގުމުގެ މަސައްކަތާގުޅޭ ގޮތުން އެންމެ ފަހުގެ މަޢުލޫމާތު ހިއްސާކުރުމަށް ޑރ. އަބްދުއްސަމަދު މެމޯރިއަލް ހޮސްޕިޓަލުން ކުރި ފޭސްބުކް ޕޯސްޓެއްގައި ވަނީ ގދ. ތިނަދޫގައި ކޮވިޑް-19 ވައިރަސް ފެތުރިފައިވާ މިންވަރު ދެނެގަތުމަށްޓަކައި 07 ފެބްރުއަރީ 2021 ގައި ނެގުނު ރެންޑަމް ސާމްޕަލްއެއް ކޮވިޑަށް ޕޮޒިޓިވް ވެފައިވާކަން ހާމަކޮށްފައެވެ. މިއާއެކު ތިނަދޫން މިފަހަރު ޕޮޒިޓިވްވި މީހުންގެ އަދަދު ވަނީ ޖުމްލަ ތިނަކަށް އަރާފައެވެ.
ގުޅިފައިވާ ރަށްތަކުގައި ކޮންޓެކްޓުން ތިބުމުން، ހުރިހާ ރައްޔިތުން ވެސް ރައްކާތެރިކަމުގެ ފިޔަވަޅުތަކަށް ހާއްސަ ސަމާލުކަމެއް ދިނުމަށް އެޗްއީއޯސީން ވަނީ އިލްތިމާސް ކޮށްފައެވެ. އަދި ކްލަސްޓާގެ ކޮންޓެކްޓަކަށް ވާނަމަ ލަސްނުކޮށް އައްޑޫ ސިޓީގެ ހޮޓްލައިންއަށް ގުޅައި ރިޕޯޓުކުރުމަށް ވަނީ އިލްތިމާސްކޮށްފައެވެ.
އައްޑޫގެ ކޭސްތަކާ ގުޅިގެން އައްޑޫ ސިޓީ އާއި ތިނަދޫ ވެސް އޮތީ މޮނިޓަރިންގއަށް ލާފައެވެ. ކޮވިޑް-19ގެ ހާލަތު ރާއްޖޭގައި އިތުރަށް ގޯސްވެ، މާލެ ސަރަހައްދުން ގިނަ ޕޮޒިޓިވް ކޭސްތަކެއް ދަނީ ފެންނަމުންނެވެ. އަދި ބައެއް ރަށްތަކުން ވެސް ޕޮޒިޓިވް ކޭސްތައް ފެންނަމުންދާއިރު، ރިސޯޓްތަކުން ވެސް ޕޮޒިޓިވް ކޭސްތައް ދަނީ ފެންނަމުންނެވެ.
