ދިވެހިރާއްޖޭގައި ވަޒީފާ އަދާކުރަން އަންނަ ބިދޭސީގެ ވާރކް ޕާރމިޓް ހޯދުމަށްޓަކައި ހައްދަންޖެހޭ "މެޑިކަލް އެގްޒެމިނޭޝަން ފޯރ ވާރކް ޕާރމިޓް" ހެއްދުމުގެ ޚިދުމަތް ފޯރުކޮށްދޭ ފަރާތްތަކުން އަންގާރަ ދުވަހުން ފެށިގެން އިކޮނަމިކް މިނިސްޓްރީގައި ރަޖިސްޓްރީވުމަށް އަންގައިފިއެވެ.
ދިވެހިރާއްޖޭގައި ވަޒީފާ އަދާކުރަން އަންނަ ބިދެސީންގެ "ވާރކް ޕާމިޓް މެޑިކަލް އެގްޒެމިނޭޝަން" ގެ ޚިދުމަތް ފޯރުކޮށްދޭ ފަރާތްތަކާ ގުޅޭ ގޮތުން އިކޮނޮމިކް މިނިސްޓްރީން އާންމުކޮށްފައިވާ އިއުލާނެއްގައި ބުނެފައިވަނީ ވާރކް ޕާރމިޓް ހޯދުމަށްޓަކައި ހައްދަންޖެހޭ "މެޑިކަލް އެގްޒެމިނޭޝަން ފޯރ ވާރކްޕާރމިޓް" ހެއްދުމުގެ ޚިދުމަތްތައް ފޯރުކޮށްދޭ ފަރާތްތަކުގެ ކިބައިގައި ވަކި ޝަރުތުތަކެއް ފުރިހަމަ ވާންޖެހޭނެ ކަމަށެވެ.
އެގޮތުން "މެޑިކަލް އެގްޒެމިނޭޝަން ފޯރ ވާރކް ޕާރމިޓް" ގެ ޚިދުމަތް ފޯރުކޮށްދޭ ފަރާތެއް ކަމުގައި މިނިސްޓްރީ އޮފް ހެލްތް އިން ހުއްދަ ލިބިފައިވާ ފަރާތެއްކަމުގައިވުމާއި ރަޖިސްޓްރީވުމަށް އެދޭ ފޯމް ފުރިހަމަކޮށް ހުށަހަޅާއިރު މިނިސްޓްރީ އޮފް ހެލްތުން ދޫކޮށްފައިވާ "މެޑިކަލް އެގްޒެމިނޭޝަން ފޯރ ވާރކް ޕާރމިޓް" ގެ ލިޔުން ހުށަހެޅުމުގެ އިތުރުން މި ޚިދުމަތް ފޯރު ކޮށްދޭ ފަރާތްތަކުން މިނިސްޓްރީން ކަނޑައަޅާ އިންތިޒާމްގެ ތެރެއިން "މެޑިކަލް ރިޕޯޓް" މިނިސްޓްރީއާ ހިއްޞާ ކުރެވޭނޭ ފަރާތެއްކަމުގައިވާން ޖެހެއެވެ.
އިކޮނޮމިކް މިނިސްޓްރީން ބުނީ ރަޖިސްޓްރީ ވުމަށް އެދޭ ފޯމް މިނިސްޓްރީގެ ވެބްސައިޓުން ޑައުންލޯޑް ކުރެވޭނެ ކަމަށެވެ. އަދި ފޯމް ފުރިހަމަ ކުރުމަށްފަހު ހުށަހަޅަންޖެހޭ ލިޔެކިޔުންތަކާއެކު އެކްސްޕެޓް އޮންލައިން ސިސްޓަމް މެދުވެރިކޮށް، "ވަރކް ޕަރމިޓް މެޑިކަލް ސަރވިސް ޕްރޮވައިޑަރ ރެޖިސްޓްރޭޝަން އެޕްލިކޭޝަން" ހުށަހަޅައިގެން، މިނިސްޓްރީގައި ރަޖިސްޓްރީވުމަށް ވަނީ އަންގާފައެވެ.
