މާލެ-ހުޅުމާލެ ޕަވަރ އިންޓަރ ކަނެކްޝަން ނެޓްވާރކްގެ މަސައްކަތް ހުއްޓާލީ އޭސީސީން ވަކި ގޮތެއް އަންގެންދެން: ސްޓެލްކޯ

މާލެ-ހުޅުމާލެއާ ދެމެދު ހައި ވޮލްޓޭޖް ކޭބަލް އެޅުމުގެ މަސައްކަތް ޙަވާލުކުރުން މަޑުޖައްސާލަން އޭސީސީން އަންގައިފައިވާ ނުވާ ކަމަށާއި، ނަމަވެސް އެ މަސައްކަތް ހުއްޓާލީ އޭސީސީން ކުރިއަށްގެންދާ ތަހުޤީޤް ނިންމައި ވަކި އެއްޗެއް އަންގަންދެން ކަމަށް ސްޓެލްކޯ އިން ބުނެފިއެވެ.

"މާލެ-ހުޅުމާލެއާ ދެމެދު ހައި ވޮލްޓޭޖް ކޭބަލް އެޅުމުގެ މަސައްކަތް ޙަވާލުކުރުން މަޑުޖައްސާލަން އޭސީސީން އަންގައިފި" މި ސުރުޚީގެ ދަށުން މިހާރު އޮންލައިންގައި ޝާއިރުކުރި ޚަބަރު ދޮގުކޮށް ސްޓެލްކޯ އިން އާންމުކުރި ބަޔާނެއްގައި ބުނެފައި ވަނީ މައްސަލަ އޭސީސީން ތަހުޤީޤްކުރަމުންދާ ކަމަށެވެ. އެގޮތުން 2018 ޖަނަވަރީ 07 ވަނަ ދުވަހު މަސައްކަތާގުޅޭ މުޢާމަލާތްތައް ހޯދުމަށް އެންޓި-ކޮރަޕްޝަން ކޮމިޝަނުން އެދުމުން އެ މަސައްކަތާ ގުޅޭ އެންމެހާ ޑޮކިއުމަންޓްތަކެއް އެ ކޮމިޝަނަށް ޙަވާލު ކޮށްފައިވާ ކަމަށް ސްޓެލްކޯ އިން ބުނެއެވެ. އަދި މައްސަލައިގެ ތަޙްޤީޤު ނިންމައި އެ މަޝްރޫޢުގެ މަސައްކަތް ކުރިއަށް ގެންދިއުމަށް އެކޮމިޝަނުން އަންގަންދެން، ހަމަ އެދުވަހުން ފެށިގެން މަޝްރޫޢާ ގުޅޭ ހުރިހާ މަސައްކަތެއް ހުއްޓާލާފައިވާ ކަމަށް ބަޔާނުގައި ބުނެފައިވެއެވެ.

ސްޓެލްކޯއިން ބުނީ، "ހުޅުވާލެވިފައިވާ އިންޓަރނޭޝަނަލް ޓެންޑަރއަކުން" މި މަޝްރޫޢުގެ މަސައްކަތަށް ކުރިމަތިލީ، ޗައިނާ ނެޝަނަލް އިލެޓްރިކް އިންޖިނިއަރިންގ ކޯ ލިމިޓެޑް (ސީ.އެން.އީ.އީ.ސީ) ގެ އިތުރުން ޗައިނާގެ ޑޮންފަންގ އިލެކްޓްރިކް އިންޓަރނޭޝަނަލް ކޯޕަރޭޝަން (ޑީ.އީ.ސީ) އިން ކަމަށެވެ. އެއީ ކޮންޓްރެކްޓަރ ފައިނޭންސް އުޞޫލުން މަސައްކަތް ކުރިއަށް ގެންދިއުމަށް ކަމަށް ބަޔާނުގައި ބުނެފައި ވެއެވެ.

ތަފްސީލް ހާމަކުރަމުން ސްޓެލްކޯގެ ބަޔާނުގައި ބުނެފައި ވަނީ މަސައްކަތް ހަވާލުކުރުމަށް ނިންމާފައިވާ، ޑީ.އީ.ސީ އިން މަސައްކަތުގެ އަގުގެ ގޮތުގައި ހުށަހަޅާފައި ވަނީ 44،462،087 (ސާޅީސް ހަތަރު މިލިޔަން ހަތަރުސަތޭކަ ފަސްދޮޅަސް ދެހާސް އަށްޑިހަ ހަތެއް) ޑޮލަރު، ހަތް އަހަރުން ދައްކާ ޚަލާސް ކުރާ ގޮތަށް ކަމަށް ވާއިރު، ބީލަމަށް ވާދަކުރި ސީ.އެން.އީ.އީ.ސީ އިން މަސައްކަތުގެ އަގުގެ ގޮތުގައި ހުށަހަޅާފައިވަނީ 56،640،262 (ފަންސާސް ހަ މިލިޔަން ހަސަތޭކަ ސާޅީސްހާސް ދުއިސައްތަ ފަސްދޮޅަސް ދޭއް) ޑޮލަރު، ފަސް އަހަރުން ދައްކާ ޚަލާސް ކުރާ ގޮތަށް ކަމަށެވެ. އަދި މަސައްކަތް ކުންފުންޏާއި ހަވާލުކުރެވިފައި ވަނީ ދައުލަތަށް އެންމެ ފައިދާހުރި ގޮތުގައި ކަމަށް ބަޔާނުގައި ބުނެފައި ވެއެވެ.

"ބްރިޖް މެދުވެރިކޮށް އަޅާ ހައިވޮލްޓޭޖް ކޭބްލަކީ، މިކުންފުނިން ހުޅުމާލޭގައި ޤާއިމްކުރާ 50 މެގަވޮޓް އިންޖީނުގެއިން ބްރިޖް ހުރަސްކޮށް މާލެއާއި ގުޅާލެވޭ، 132 ކިލޯވޯލްޓްގެ ހައިވޮލްޓޭޖް ކޭބަލެކެވެ. މިމަސައްކަތަކީ ބުރިޖާ އެކުއެކީ ނިމިގެން ދިއުން ނޫން ގޮތަކަށް ފަހަރެއްގައި ވެސް ކުރެވޭނެ މަސައްކަތަކަށް ނުވާތީ، ދައުލަތަށާއި މިކުންފުންޏަށް އެންމެ ފައިދާ ހުރި ގޮތަކީ ބަޔާންވެދިޔަ ގޮތަށް މަސައްކަތް ހަވާލުކުރެވި، އަދި އަވަހަށް ވެސް މަސައްކަތްކޮށް ނިންމުންކަމުގައި މިކުންފުނި ދެކޭ ވާހަކަ އެންމެހާ ފަރާތްތަކަށް ދަންނަވަމެވެ،" ސްޓެލްކޯގެ ބަޔާނުގައި ބުނެފައިވެއެވެ.