2 އަހަރުތެރޭ ގްރޫޕް މާރާމާރީއެއްގައި ފުރަތަމަ މަރު: މާމެންދޫ 17 އަހަރުގެ ކުއްޖެއް!

ގއ މާމެންދޫގައި ހިނގި މާރާމާރީއެއްގައި އުމުރުން 17 އަހަރުގެ ކުއްޖަކު މަރުވެއްޖެއެވެ.

ހޯމަ ދުވަހުގެރޭ ހިނގި މި ޙާދިސާއާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން މާމެންދޫ ކައުންސިލުގެ ރައީސް މުޙައްމަދު ޒައީމް ވިދާޅުވީ، ދެ ގްރޫޕެއްގެ ދެމެދުގައި ހިނގި މި މާރާމާރީ ހިނގާފައިވަނީ ހޯމަ ދުވަހުގެރޭ 09:30 ގެ ފަހުން ކަމަށެވެ. އަދި މި މާރާމާރީގައި ނިޔާވެފައިވަނީ އުމުރުން 17 އަހަރުގެ އަހުމަދު އުދައްޔު ނަމަކަށް ކިޔާ ކުއްޖެއް ކަމަށް އޭނާ ވިދާޅުވިއެވެ.

ޒައީމް ވިދާޅުވީ އޭނާ ނިޔާވެފައިވަނީ ގއ ވިލިނގިލީ ހޮސްޕިޓަލަށް ގެންގޮސް ފަރުވާދެމުން ދަނިކޮށް ކަމަށް މައުލޫމާތު ލިބޭ ކަމަށެވެ. އަދި މާރާމާރީއާ ގުޅިގެން ޒަޚަމްވި އިތުރު ކުއްޖަކު އިތުރު ފަރުވާއަށް ވިލިނގިއްޔަށް ގެންގޮސްފައިވާ ކަމަށްވެސް އޭނާ ވިދާޅުވިއެވެ.

ޒައީމް އިތުރަށް ވިދާޅުވީ، މިވަގުތު ފުލުހުންގެ ޓީމެއް ގއ މާމެންދޫގައި ޙަރަކާތްތެރިވަމުންދާ ކަމަށެވެ.

އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، މި މައުލޫމާތު ފުލުހުންނަށް ލިބިފައިވަނީ ހޯމަ ދުވަހުގެރޭ 22:10 ހާއިރު ކަމަށެވެ. އަދި މިކަން އިތުރަށް ތަހުޤީޤު ކުރަމުންދާ ކަމަށް ފުލުހުން މައުލޫމާތު ދެއެވެ. ޢަދި އުދައްޔު ނިޔާވެފައިވާކަން ވިލިނގިލީ ހޮސްޕިޓަލުން ކަށަވަރު ކޮށްދީފައިވާކަންވެސް ފުލުހުން ފާހަގަ ކޮށްފައިވެއެވެ.

އެކަމާ ގުޅޭގޮތުން ފުލުހުންގެ ކޮމިޝަނަރ މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، މި ޙާދިސާގައި އުދައްޔު ނިޔާވެފައިވާއިރު، ޒަޙަމްވި ދެވަނަ ކުއްޖާގެ ޙާލުވެސް ސީރިއަސް ކަމަށެވެ. އަދި މި މައްސަލައާ ގުޅިގެން ޝައްކު ކުރެވޭ މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަން ފާހަގަ ކުރައްވައި ޙަމީދު ވިދާޅުވީ، މި މައްސަލަ މިހާރު ބަލަމުންދަނީ ފުލުހުންގެ ސީރިއަސް އެންޑް އޮރގަނައިޒްޑް ކްރައިމް ޑިޕާޓްމަންޓުން ކަމަށެވެ.

ސީޕީ ޙަމީދު ވަނީ މި މައްސަލަ ތަހުޤީޤު ކުރުމުގައި ފުލުހުންނަށް އެއްބާރުލުން ދެއްވުމަށް އެރަށު ރައްޔިތުންގެ ކިބައިން އިލްތިމާސް ކުރައްވާފައެވެ.

މިއީ 2019 ވަނަ އަހަރުގެ ފަހުން ގްރޫޕް މާރާމާރީއެއްގައި މީހެއްގެ ފުރާނަ ދިޔަ ފުރަތަމަ ފަހަރެވެ.