ހޯމަ ދުވަހު އިތުރު 126 މީހުން ކޮވިޑް-19 އަށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭއިން) އާންމުކޮށްފައިވާ ފަހުގެ ތަފާސްހިސާބުތައް ދައްކާ ގޮތުން ހޯމަ ދުވަހު އިތުރު 126 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރޭގައި ހިމެނެނީ މާލެ ސަރަޙައްދުން ޕޮޒިޓިވްވި 98 މީހަކާއި، ރަށްރަށުން ޕޮޒިޓިވްވި 19 މީހެއްގެ އިތުރުން، ރިސޯޓުތަކުން ޕޮޒިޓިވްވި 9 މީހެކެވެ. އެއާއެކު، މިހާތަނަށް ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 16،909ށް އަރާފައެވެ.

އެޗްޕީއޭގެ ތަފާސްހިސާބުތައް ދައްކާގޮތުން ފާއިތުވި 24 ގަޑިއިރުގެ ތެރޭގައި އިތުރު 168 މީހަކު ބަލިން ރަނގަޅުވެފައިވާއިރު، މިވަގުތުގެ އެކްޓިވް ކޭސްތަކުގެ އަދަދުވެސް މިވަނީ ދަށްވެފައެވެ. އެގޮތުން މިހާރު ރާއްޖޭގެ އެކްޓިވް ކޭސްތަކުގެ އަދަދަކީ 2075 އެވެ.

ރާއްޖެއިން މިހާތަނަށް ކޮވިޑަށް ޓެސްޓު ކުރުމަށް 438،240 ސާމްޕަލްއެއް ނަގާފައިވެއެވެ. އޭގެ ތެރޭގައި ފާއިތުވި 24 ގަޑިއިރު ނަގާފައިވާ 3944 ސާމްޕަލް ހިމެނެއެވެ.

އޭގެ އިތުރުން، މިވަގުތުވެސް ހޮސްޕިޓަލުގައި އެޑްމިޓް ކޮށްގެން 204 މީހަކަށް ފަރުވާދެމުންދާއިރު، މިހާތަނަށް ރާއްޖެއިން ކޮވިޑް ޖެހިގެން ނިޔާވެފައިވަނީ 55 މީހެއްކަމަށް އެޗްޕީއޭގެ އެންމެ ފަހުގެ ތަފާސްހިސާބުތަކުން ދައްކައެވެ.