އައްޑޫ ސިޓީގައި ކޮވިޑް-19ގެ ދެ ކްލަސްޓަރ، ކޭސްތައް އިތުރު!
8 ފެބުރުއަރީ 2021 | ހޯމަ 08:57ހުޅުމީދޫއިން ކޭސް ފެނުނީ މިމަހުގެ ހަތަރު ވަނަ ދުވަހު
އައްޑޫ ސިޓީ ހުޅުމީދޫ، ކޮންމެހެން ބޭރަށް ނުކުންނަން ޖެހިގެން މެނުވީ ނުނިކުތުމަށް ވަނީ އިލްތިމާސްކޮށްފައި
އައްޑޫ ސިޓީން ކޮވިޑް-19ގެ ކޭސްތައް ފެންނަމުންދާއިރު، ދެ ކްލަސްޓަރއެއް ފެނިފައިވާ ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
އާދިއްތަ ދުވަހުގެ ރޭ އެޗް.އީ.އޯ.ސީ.ން ބޭއްވި ނޫސްވެރިންގެ ބައްދަލުވުމުގައި، އަތޮޅުތެރޭގެ ކަންކަން ކޯޑިނޭޓްކުރާ ޓީމުގައި އިސްކޮށް ހުންނަވާ އެޗް.ޕީ.އޭ.ގެ އޮފިސަރު އަބްދުލް މައުރޫފް ވިދާޅުވީ އައްޑޫ ސިޓީގެ ހުޅުމީދޫ އާއި ހިތަދޫއިން ކޭސްތައް ފެނިފައިވާތީ އިތުރަށް ބަލަން ޖެހޭ ކަންކަން މިހާރު ބަލަމުންދާ ކަމަށެވެ. އައްޑޫ ސިޓީ މިހާރު މޮނިޓަރިންއަށް ލާފައިވާއިރު، ކޮންޓެކްޓް ޓްރޭސިންގެ މަސައްކަތްތައް ކުރިއަށްދާ ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ ހިތަދޫ ކްލަސްޓަރއިން އެންމެ ފުރަތަމަ ދެމީހަކު ޕޮޒިޓިވްވީ މިމަހުގެ 5 ދުވަހު ކަމަށާއި، އެދެ މީހުންނާ ކޮންޓެކްޓުވި ދެ މީހުން މިމަހުގެ 6 ވަނަ ދުވަހު ޕްޒިޓިވްވެފައިވާ ކަމަށެވެ. މައުރޫފް ވިދާޅުވީ ހިތަދޫއިން ފުރަތަމަ ޕްޒިޓިވްވި ދެ މީހުންނާ ކޮންޓެކްޓް ވެފައިވާ އިތުރު މީހެއް ގދ. ތިނަދޫގައި ހުރުމާއެކު ސާމްޕަލް ނަގައި ޓެސްޓު ކުރުމުން އެމީހާ މި މަހުގެ 7 ވަނަ ދުވަހު ޕޮޒިޓިވްވެފައިވާ ކަމަށެވެ.
މިކޭސްއާ ގުޅިގެން ތިނަދޫ ވެސް މޮނިޓަރިންގެ ހާލަތަށް ލާފައިވާކަން ފާހަގަކުރައްވައި މައުރޫފް ވިދާޅުވީ ކޮންޓެކްޓް ޓްރޭސިންގެ މަސައްކަތްތައް ކުރަމުންދާ ކަމަށެވެ.
ހުޅުމީދޫ ކްލަސްޓަރއާ ގުޅޭ ގޮތުން މައުރޫފް ވިދާޅުވީ އެމް.ޓީ.ސީ.ސީ.ގެ ސައިޓްގައި މަސައްކަތް ކުރާ ހަތަރު މީހުން ބައްޔަށް ޕޮޒިޓިވްވެގެން ދިޔައީ ފެބްރުއަރީ މަހުގެ 4 ވަނަ ދުވަހު ކަމަށެވެ.
މިދެ ކްލަސްޓަރއާ ގުޅިގެން މުޅި ސަރަހައްދުގައި ކޮންޓެކްޓް ޓްރޭސިންގެ މަސައްކަތްތައް ކުރަމުންދާ ކަމަށާއި، އައްޑޫ ސިޓީގެ ގުޅިފައިވާ ރަށްރަށުން ކޭސްތަކުގެ ކޮންޓެކްޓުން އެބަ ތިބި ކަމަށް މައުރޫފް ފާހަގަކުރެއްވިއެވެ. އެހެންކަމުން ކްލަސްޓަރގެ ކޮންޓެކްޓެއް ވެފައިވާނަމަ އައްޑޫގައި ގާއިމުކުރެވިފައިވާ ހޮޓްލައިން ނުވަތަ ޓާސްކްފޯސްއަށް ރިޕޯޓުކުރުމަށް އޭނާ އިލްތިމާސްކުރެއްވިއެވެ. އަދި މިހާލަތުގައި ޒަރޫރީ ބޭނުމެއްގައި މެނުވީ ބޭރަށް ނުނުކުތުމަށް ވެސް އިލްތިމާސްކޮށްފައިވެއެވެ.
