ބަޣާވާތަށް 9 އަހަރު ފުރުމުގެ ހަނދާން ރައީސް ނަޝީދު އައު ކުރެއްވީ ޅެން ބައިތަކުން
7 ފެބުރުއަރީ 2021 | އާދީއްތަ 14:12ޅެންބައިތެއް ހިއްސާ ކުރައްވައި އެމަނިކުފާނުގެ ޝުއޫރު ހިއްސާ ކުރެއްވި
7 ފެބްރުއަރީގައި ސަލާމަތީ ބާރުތަކުން ވެރިކަމާ ދެކޮޅަށް ނުކުތުމުން ގިނަ ބައެއްގެ ފާޑުކިއުން އަމާޒުވެގެން ދިޔަ
7 ފެބްރުއަރީގައި ބަޣާވާތަކުން ރައީސް ނަޝީދުގެ ވެރިކަން ބަދަލުވި ދުވަހުގެ ހަނދާންތައް އެމްޑީޕީގެ ރައީސް އަދި ކުރީގެ ރައީސް މުޙައްމަދު ނަޝީދު ޅެން ބައިތަކުން އައު ކުރައްވައިފިއެވެ.
އާދިއްތަ ދުވަހު ރައީސް ނަޝީދު ކުރެއްވި ޓްވީޓެއްގައި ވަނީ ޅެންބައިތެއް ހިއްސާ ކުރައްވައި އެމަނިކުފާނުގެ ޝުއޫރު ހިއްސާ ކުރައްވާފައެވެ.
" ހަނދާންތައް ހިތުގައި ވިކަމުން ގެނުވަނީ ފިލުވޭ ތަދެއް ނޫނޭ،
އަދާ ހަމައަށް މި ޙާލަތު ގެނައުމީ ކުޑަ ކުޑަ ކުށެއް ނޫނޭ،
ޒަމާންތަކަކަށް ވި ޤުރުބާނީ ފަނާވެވި ޖިސްމު އިންސާނީ،
އަމާންކަން ނެއްޓި އުދުވާނީ މައާފް ކުރާ ވަރެއް ނޫނޭ"
ރައީސް ނަޝީދުގެ މި ޅެންބައިތުގައި ސީދާ ބަޣާވާތުގެ ވާހަކަ ހިމަނުއްވާފައި ނުވި ނަމަވެސް، މިއީ 7 ފެބްރުއަރީއަށް 9 އަހަރު ފުރުމުގެ ހަނދާންތައް އައު ކުރެއްވުމަށް ހިއްސާ ކުރެއްވި ޅެމެއް ކަމަށް ގިނަ ބަޔަކު ބުނެއެވެ.
7 ފެބްރުއަރީގައި ރައީސް ނަޝީދުގެ ވެރިކަން ބަދަލުވި ގޮތް ބެލުމަށް އުފެއްދި ކޮމިޝަނުން އެ މައްސަލަ ތަހުޤީޤުކޮށް، ތަންފީޒުކުރަންޖެހޭ ކަންކަން ބަޔާން ކޮށްފައިވާއިރު، ކޯނީ ރިޕޯޓްގައި ބަޔާންކޮށްފައިވާ ފަރާތްތަކާމެދު ފިޔަވަޅުއަޅާފައި ނުވުމުން ރައީސް ނަޝީދު ވަނީ މީގެ ކުރިންވެސް ކަންބޮޑުވުން ފާޅުކުރައްވާފައެވެ. އެގޮތުން 7 ފެބްރުއަރީގައި ފުލުހުން ނުކުމެ ހިންގި ބަޣާވަތް އެއީ ނުހިނގާ ކަމެއްގެ ގޮތުގައި ދެކި ފުލުހުންގެ ޤާނޫނަށް އިސްލާޙު ގެންނަން ވިސްނައިގެން ނުވާނެ ކަމަށެވެ. އަދި އެއީ ޒަމާންތަކެއް ވަންދެން ރާއްޖެއަށް ދެވޭނެ ބޮޑު ގެއްލުމެއްގެ ގޮތުގައި ރައީސް ނަޝީދު ސިފަ ކުރެއްވިއެވެ.
ސަލާމަތީ ބާރުތަކުން އޭރު ޤައުމަށް ވެފައިވާ ޣައްދާރީ ތަކުރާރުވިޔަ ނުދިނުމަށްޓަކައި ކޯނީ ރިޕޯޓްގައި ބަޔާން ކޮށްފައިވާ ކަންކަން ތަންފީޒު ކުރަންޖެހޭ ކަމަށް ރައީސް ނަޝީދު ވަނީ މީގެ ކުރިންވެސް ވިދާޅުވެފައެވެ. އަދި އެކަންކަން ނުކުރާހާ ހިނދަކު އަނެއްކާވެސް ސަލާމަތީ ބާރުތަކުން ވެރިކަން ވައްޓާލުމަށް ނުނިކުންނާނެ ކަމަށް ވިދާޅުވަން ކެރިވަޑައިނުގަންނަވާނެ ކަމަށް ރައީސް ނަޝީދު އޭރު ވިދާޅުވިއެވެ.
ރައީސް ނަޝީދުގެ ވެރިކަން ބަދަލުވި ގޮތާމެދު، ގިނަ ބައެއްގެ, ހާއްސަކޮށް، އެމްޑީޕީއާއި އެޕާޓީގެ ސަޕޯޓަރުންގެ މެދުގައި އަބަދުވެސް ހިތްހަމަ ނުޖެހުން އޮވެއެވެ.
