އޭވިއޭޝަން ސެކިއުރިޓި ކޮމާންޑް (އޭވްސްކޮމް) މުވައްޒަފުން އައްޑޫ ސިޓީއަށް ދިޔައީ ނެގެޓިވް ޕީސީއާރް ނަތީޖާއާއެކު ގައިޑްލައިންތަކާ އެއްގޮތަށް ކަމަށް އެ އިދާރާއިން ބުނެފިއެވެ.

މިފަދައިން އޭވިއޭޝަން ސެކިއުރިޓި ކޮމާންޑުން ބުނެފައި މި ވަނީ އައްޑޫސިޓީން 2 މީހަކު ކޮވިޑް-19 ށް ޕޮސިޓިވް ވެފައިވަނީ މާލެއިން ޚާއްޞަ ހުއްދައިގެ ދަށުން ދިޔަ ބައެއްގެ ފަރާތުން ކަމަށް ޚަބަރުތައް ފެތުރެން ފެށުމާ ގުޅިގެންނެވެ. މިކަމާ ގުޅޭގޮތުން އޭވްސްކޮމުން ނެރުނު ނޫސްބަޔާނެއްގައި ވަނީ އައްޑޫ ސިޓީގެ މޭޔަރ އަބްދުﷲ ޞާދިޤްއާ ޙަވާލާދީ ބައެއް މީޑިއާތަކުގައި ޝާއިޢުކޮށްފައިވާ ޚަބަރުގައި، އޭވިއޭޝަން ސެކިއުރިޓި ކޮމާންޑްގެ މުވައްޒަފުންގެ ފަރާތުން ކޮވިޑް-19 ފެތުރުނު ކަމަށް ތުހުމަތު ކޮށްފައިވާތީ އެކަމުގެ މަޢުލޫމާތު ސާފުކޮށްދީފައެވެ.

އޭވިއޭޝަން ސެކިއުރިޓި ކޮމާންޑުން ވަނީ އެ އިދާރާގެ ޓްރެއިނިންގ ޔުނިޓްގެ 2 މުވައްޒަފުން، އައްޑޫސިޓީގައި ކުރިޔަށް ގެންދިޔަ ޓްރެއިނިންގއަކަށް ގޮސް ފައިވަނީ 2 ފެބްރުއަރީ 2021 ވަނަދުވަހު ކަމަށް ބުނެފައެވެ. މި ޓްރެއިނިންގއަށް މުވައްޒަފުން ގޮސްފައިވާނީ، އެޗް.ޕީ.އޭގެ ގައިޑްލައިންއާ އެއްގޮތަށް ޕީ.ސީ.އާރް ޓެސްޓް ހަދައި ނެގެޓިވް ނަތީޖާ ލިބުމުން ކަމަށް އޭވްސްކޮމްއިން ވަނީ ސާފުކޮށްދީފައެވެ. މި ސަބަބައްޓަކައި މި މުވައްޒަފުންގެ ފަރާތުން މި ބަލި ފެތުރުނުކަމަށް ތުހުމަތުކޮށް ޚަބަރު ފަތުރާފައިވަނީ ޒިންމާދާރުކަން ކުޑަގޮތަކަށް ކަމުގައި އޭވްސްކޮމްއިން ވަނީ ބުނެފައެވެ.

އޭވިއޭޝަން ދާއިރާގައި މަސައްކަތް ކުރާ މުވައްޒަފުންނަކީ ޤަވާއިދުން ޓްރެއިންކުރަންޖެހޭ ބަޔެއްކަން ފާހަގަކޮށް އޭވްސްކޮމްއިންވަނީ، ކޮންމެހެން ކުރަން ޖެހޭ ޓްރެއިންގ ކުރިޔަށް ގެންދިޔުމުގައި، އެޗް.ޕީ.އޭ އިން އާއްމުކުރާ ގައިޑްލައިންތަކަށް ފުރިހަމައަށް ތަބާވެ، އޭވްސްކޮމް މުވައްޒަފުން މަސައްކަތް ކުރަނީ ޒިންމާދާރުކަމާއެކުގައި ކަމުގެ ޔަޤީންކަން ވަނީ ދީފައެވެ. އޭވްސްކޮމްއިން ވަނީ މިފަދަ ހައްސާސް މައްސަލައެއްގައި ކަންހިނގާފައިވާ ގޮތަށް ރިޢާޔަތްނުކޮށް، އެ އިދާރާގެ މުވައްޒަފުންގެ ބޮލުގައި އިލްޒާމް އަޅުވައި، އެކަމުގައި މުވައްސަސާ ބަދުނާމުކޮށް ޚަބަރުފެތުރުމަކީ ކޮމާންޑުން ބަލައިގަންނާނެ ކަންކަން ނޫން ކަމުގައި ބުނެފައެވެ.

އައްޑޫގައި ކޮވިޑް-19 ފެތުރެން ފަށާފައިވަނީ ޚާއްޞަ ހުއްދައިގެން ދަށުން މާލެ ފުރައިގެން އައްޑޫއަށް އައި މީހެއްގެ ފަރާތުން ކަމަށް ގަބޫލުކުރެވޭކަމަށް އައްޑޫ ސިޓީގެ މޭޔަރ އަބްދުﷲ ޞާދިޤާ ޙަވާލާދީ ބައެއް މީޑިއާތަކުން ވަނީ ރިޕޯޓްކޮށްފައެވެ. ޚާއްޞަ ހުއްދައިގެ ދަށުން ގިނަ ބަޔަކު ދަތުރު ކުރަމުން އަންނަ ކަމަށް އައްޑޫ ސިޓީގެ މޭޔަރ ވަނީ ވިދާޅުވެފައެވެ. އެމީހުންނަށް އޮންނަނީ ވަކި މިންގަނޑެއް ދީފައިކަން ފާހަގަކުރައްވައި އަބްދުﷲ ޞާދިޤް ވަނީ ކޮންމެ މީހަކު އުޅޭ ގޮތް ވަކިން ނުބެލޭ ކަމަށް ވިދާޅުވެފައެވެ.

ހިތަދޫގެ ފްލޫ ކްލިނިކަށް ދެއްކި ދެ މީހަކު ޕޮޒިޓިވްވުމާ ގުޅިގެން އައްޑޫ މިވަގުތު އޮތީ މޮނީޓަރިންގެ ހާލަތުގައެވެ. އެ ދެ މީހުންނާ ކޮންޓެކްޓުވި ފަސް މީހަކު މިހާތަނަށް ވަނީ ކޮވިޑަށް ޕޮޒިޓިވްވެފައެވެ.

ކޮވިޑް-19ގެ ހާލަތު ރާއްޖޭގައި އިތުރަށް ގޯސްވެ، މާލެ ސަރަޙައްދުން ގިނަ ޕޮޒިޓިވް ކޭސްތަކެއް ދަނީ ފެންނަމުންނެވެ. އަދި ބައެއް ރަށްތަކުން ވެސް ޕްޒޮޓިވް ކޭސްތައް ފެންނަމުންދާއިރު، ރިސޯޓްތަކުން ވެސް ޕޮޒިޓިވް ކޭސްތައް ދަނީ ފެންނަމުންނެވެ.