ޔުޓިލިޓީ ރެގިއުލޭޓަރީ އޮތޯރިޓީގެ ޗީފް އެގްޒެކެޓިވްގެ މަޤާމަށް ޔަޒީދު އަޙްމަދު ޢައްޔަންކޮށްފި
ޔަޒީދަކީ ކުރިން ޔުޓިލިޓީ ރެގިއުލޭޓަރީ އޮތޯރިޓީގެ ޑިރެކްޓަރ
ޔުޓިލިޓީ ރެގިއުލޭޓަރީ އޮތޯރިޓީގެ ޗީފް އެގްޒެކްޓިވްގެ މަޤާމަށް ޔަޒީދު ޢައްޔަންކުރެއްވުން
ކަރަންޓާއި، ފެނާއި ނަރުދަމާ އަދި ކުނި މެނޭޖްކުރުމުގެ ޚިދުމަތްތައް ރެގިއުލޭޓުކުރުމަށް ޤާނޫނުގެ ދަށުން އެކުލަވާލާފައިވާ ޔުޓިލިޓީ ރެގިއުލޭޓަރީ އޮތޯރިޓީގެ ޗީފް އެގްޒެކެޓިވްގެ މަޤާމަށް ޔަޒީދު އަޙްމަދު ސިވިލް ސަރވިސް ކޮމިޝަނުން މިއަދު ޢައްޔަނުކޮށްފިއެވެ.
ޔަޒީދަކީ ކުރިން ޔުޓިލިޓީ ރެގިއުލޭޓަރީ އޮތޯރިޓީގެ ޑިރެކްޓަރ ކަމުގެ މަޤާމުގައި ހުންނެވި ބޭފުޅާއެވެ.
އެންވަޔަރަންމަންޓް މިނިސްޓްރީން ބުނީ އޭނާ އެ މަގާމަށް ޢައްޔަނުކުރުމާ ގުޅިގެން މިނިސްޓަރ އޮފް އެންވަޔަރަންމަންޓް ޑރ. ޙުސައިން ރަޝީދު ޙަސަން އޭނާއާ ބައްދަލުކުރައްވައި ހިއްވަރުދެއްވާފައިވާ ކަމަށެވެ. އެގޮތުން ދާއިރާގެ ރެގިއުލޭޓަރީ މަސައްކަތްތައް ޔަޒީދުގެ ބެއްލެވުމުގެ ދަށުން ހަރުދަނާކޮށް ތަރައްޤީކޮށްދެއްވުމަށް މިނިސްޓަރ އެދިވަޑައިގެންނެވިއެވެ.
ޔަޒީދު އަޙްމަދަކީ، ސަރުކާރުގެ އެކި މަޤާމުތަކުގައި 17 އަހަރު ޚިދުމަތްކޮށް އޭގެ ތެރެއިން 12 އަހަރު ހިންގުމުގެ ދާއިރާގެ ސީނިއަރ މަޤާމުތަކުގައި އުޅުއްވައި ތަޖުރިބާ ލިބިވަޑައިގެންފައިވާ ބޭފުޅެކެވެ. އެގޮތުން އަދާކުރައްވާފައިވާ ވަޒީފާތަކުގެ ތެރޭގައި އެންވަޔަރަންމަންޓަލް ޕްރޮޓެކްޝަން އެޖެންސީގެ ޑިރެކްޓަރގެ މަޤާމު ހިމެނެއެވެ.
ޔަޒީދު ކިޔަވައި ވިދާޅުވެފައިވަނީ ތިމާވެށީގެ ދާއިރާއިންނާއި ފެނާއި ނަރުދަމާގެ ސިވިލް އިންޖިއަރިންގ ދާއިރާއިންނެވެ. ޔަޒީދު ވަނީ މިދާއިރާއިން މާސްޓަރސް ޑިގްރީ ޙާސިލުކުރައްވާފައެވެ.
ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނު ބުނާގޮތުން އެ އޮތޯރިޓީ ދުވަހުން ދުވަހަށް ހިންގުމުގެ އެންމެ އިސް ވެރިޔަކީ އޮތޯރިޓީގެ ޗީފް އެގްޒެކްޓިވް އެވެ.
