ދުވާލެއްގެ މައްޗަށް ޕޮޒިޓިވްވާ މީހުންގެ އަދަދު އަދިވެސް 100ން މަތީގައި
6 ފެބުރުއަރީ 2021 | ހޮނިހިރު 17:25މާލެ ސަރަހައްދުން ޕޮޒިޓިވްވީ 78 މީހުން
ކޮވިޑް-19 އަށް ސާމްޕަލް ނެގުމަށް ސިއްހީ ހިދުމަތްތެރިން ހަރަކާތްތެރިވަނީ
ރާއްޖެއިން ދުވާލެއްގެ މައްޗަށް ކޮވިޑް-19 އަށް ޕޮޒިޓިވްވާ މީހުންގެ އަދަދު އަދިވެސް 100ން މަތި ކަމަށް ހެލްތު ޕްރޮޓެކްޝަން އެޖެންސީން ހާމަކޮށްފިއެވެ.
އެޗްޕީއޭއިން އެންމެ ފަހުން އާންމުކޮށްފައިވާ މައުލޫމާތުތައް ދައްކާގޮތުން ފެބްރުއަރީ މަހުގެ ފަސް ވަނަ ދުވަހުގެ ހަވީރު 06:00ން ފެބްރުއަރީ ހަ ވަނަ ދުވަހުގެ 06:00ށް 109 މީހުން ވަނީ ކޮވިޑް-19 އަށް ޕޮޒިޓިވްވެފައެވެ.
އެއީ މާލެ ސަރަހައްދުން ޕޮޒިޓިވްވި 78 މީހުންނާއި، އަތޮޅުތެރޭގެ ރަށްރަށުން ޕޮޒިޓިވްވި 11 މީހުންގެ އިތުުރުން މިހާރު ފަތުރުވެރިންނަށް ހިދުމަތްދޭ ރިސޯޓްތަކުން ޕޮޒިޓިވްވި 20 މީހުންނެވެ.
އަލަށް ޕޮޒިޓިވްވި 109 މީހުންނާއިކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު 16،656ށް އަރާފައިވާއިރު، މިހާތަނަށް 430،513 ސާމްޕަލެއް އެޗްޕީއޭއިން ވަނީ ކޮވިޑަށް ޓެސްޓުކޮށްފައެވެ.
ރާއްޖޭގައި ކޮވިޑް-19ގެ އައު ވޭރިއަންޓެއް އުޅޭކަމަށް ހެލްތު އެމެޖެންސީ އޮޕަރޭޝަނުން ހާމަކޮށްފައިވާއިރު، އެޗްޕީއޭއިން ވަނީ ކޭސްތައް އިތުރުވަމުންދާތީ އަޅާފައިވާ ފިޔަވަޅުތައް އިތުރަށް ވަރުގަދަކޮށްފައެވެ. އަދި ހޮސްޕިޓަލްގައި އެޑްމިޓްކޮށްގެން ފަރުވާ ދެމުންދާ މީހުންގެ އަދަދު އިތުރުވާން ފަށާފައިވާއިރު، ސިއްހީ ދާއިރާގައި މަސައްކަތްކުރާ ފަރާތްތަކުން ދަނީ ސިއްހީ އިދާރާތަކަށް ނުކަތާ ވަރަށް ބަލި ފެތުރުނަނުދީ ކޮންޓްރޯލް ކުރުމަށް މަސައްކަތްކުރުމަށް ގޮވާލަމުންނެވެ.
މިހާރު ރާއްޖެއިން ކޮވިޑަށް ޕޮޒިޓިވްވެފައިވާ 207 މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާދެމުންދާއިރު، ބައްޔަށް ފަރުވާ ހޯދަމުންދަނީ 2،039 މީހުންނެވެ. ބަލި ޖެހުނު 54 މީހަކު ނިޔާވެފައިވާއިރު، ބަލި ޖެހުނު މީހުންގެ ތެރެއިން 14،556 މީހުން ވަނީ ބަލިން ރަނގަޅުވެފައެވެ.
