ލިވަޕޫލް ބަލިވިއިރު، ސިޓީން ލީޑު ދަމަހައްޓައިފި

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ބްރައިޓަން އަތުން އެންމެ ފަހުގެ ޗެމްޕިއަން ލިވަޕޫލް ބަލިވެއްޖެއެވެ.

އަމިއްލަ ދަނޑުގައި ކުޅުނު މެޗުން ލިވަޕޫލް ބަލިވި 1-0 ގެ ނަތިޖާއަކުންނެވެ. މިއީ ލީގުގައި އަމިއްލަ ދަނޑުގައި މެޗަކުން ބަލިނުވެ 68 މެޗު ހަމަކުރުމަށްފަހު ލިވަޕޫލުން ޖެހިޖެހިގެން އަމިއްލަ ދަނޑުގައި ބަލިވި ދެވަނަ މެޗެވެ. އަދި މިއީ 1984 ވަނަ އަހަރަށްފަހު ބްރައިޓަނުން ލިވަޕޫލް ބަލިކުރި ފުރަތަމަ ފަހަރެވެ.

ލިވަޕޫލުން އަނިޔާގެ ސަބަބުން ރޭގެ މެޗުގައިވެސް ކުޅުނީ މުހިންމު ގިނަ ކުޅުންތެރިންތަކެއް ނުލައެވެ. މި މެޗުގައި ލިވަޕޫލަށް އެންމެ އެދެވޭ ކުޅުމެއް ދެއްކިފައި ނުވާއިރު، ފުރަތަމަ ހާފުގައި ލީޑު ނަގަން އެންމެ ހުސް ފުރުސަތެއް ލިބުނީ ލިވަޕޫލުގެ ފޯވާޑް މުޙައްމަދު ސަލާހަށެވެ. އެކަމަކު އޭރިއާ ތެރެއިން އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

މި މެޗުގައި ފެނުނު ހަމައެކަނި ލަނޑު ބްރައިޓަނުން ކާމިޔާބުކުރީ ދެވަނަ ހާފު ފަށައިގެން 11 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ސްޓީވެން އަލްޒާޓޭއެވެ. މި މެޗުގައި ލިވަޕޫލަށް ބްރައިޓަނުގެ ގޯލާ އަމާޒުކޮށް އެންމެ ހަމަލާއެއް ފޮނުވާލެވުނުއިރު، ދެވަނަ ހާފުގައި ބްރައިޓަނުގެ ޑިފެންޑަރުން ވަނީ ލިވަޕޫލް ހުއްޓުވުމުގައި މުހިންމު ދައުރެއް އަދާކޮށްފައެވެ.

ބުދަ ދުވަހުގެރޭ ކުޅުނު މެޗުން ލިވަޕޫލް ބަލިވިއިރު، ބާންލީ ބަލިކޮށް ތާވަލުގެ އެއްވަނައިގައި މެންޗެސްޓާ ސިޓީން ވަނީ ހަތް ޕޮއިންޓުގެ ލިޑު ދަމަހައްޓާފައެވެ. ބާންލީގެ ދަނޑުގައި ބުދަ ދުވަހުގެރޭ ކުޅުނު މެޗުން ސިޓީ މޮޅުވީ 2-0 ގެ ނަތީޖާއަކުންނެވެ. މި މޮޅާއެކު ސިޓީން ވަނީ އެންމެ ފަހުން ހުރިހާ މުބާރާތެއްގައި ކުޅުނު 13 މެޗުންވެސް މޮޅުވެފައެވެ.

މި މެޗުގައި ސިޓީން މޮޅު ކުޅުމެއް ދެއްކިއިރު، މެޗު ފަށައިގެން ތިންވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ގަބްރިއެލް ޖީސޫސްއެވެ. އަދި މެޗުގެ 38 ވަނަ މިނެޓުގައި ސިޓީއަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ ރަހީމް ސްޓާލިންގެވެ.

މި ނަތީޖާތަކާއެކު ސިޓީ އެއްވަނައިގައި އޮތީ ކުޅުނު 21 މެޗުން ލިބުނު 47 ޕޮއިންޓާއެކުއެވެ. ދެވަނައިގައި އޮތް މެންޗެސްޓާ ޔުނައިޓެޑަށް 22 މެޗުން 44 ޕޮއިންޓް ލިބިފައިވާއިރު، ބުދަ ދުވަހުގެރޭ ފުލަމް އަތުން 2-0 ން މޮޅުވި ލެސްޓާ ސިޓީ ތިންވަނައަށް ޖެހިލީ 22 މެޗުން 42 ޕޮއިންޓް ހޯދައިގެންނެވެ. އަދި ލިވަޕޫލް ހަތަރުވަނައަށް ވެއްޓުނުއިރު، އެ ޓީމަށް 22 މެޗުން ލިބިފައިވަނީ 40 ޕޮއިންޓެވެ.