ފުރަތަމަ ޑިގްރީއަށް ހިލޭ ކިޔެވޭ ސްކީމްގެ ދަށުން މިހާތަނަށް 9،430 ކުދިންނަށް ފުރުޞަތުދީފި
ގައުމުގެ ތަރައްޤީއަށް ބޭނުންވަނީ ތަޢުލީމީ ޒުވާން ޖީލެއް
ރައީސް ޞާލިޙު ރިޔާސީ ބަޔާން އިއްވަވަނީ
މަތީ ތަޢުލީމު ހާސިލްކުރަން ބޭނުންވާ ކުދިންނަށް ފުރަތަމަ ޑިގްރީއަށް ހިލޭ ކިޔަވައިދިނުމުގެ ޕްރޮގްރާމުގެ ދަށުން މިހާތަނަށް 9،430 ދަރިވަރުންނަށް ފުރުސަޞަތު ފަހިކޮށްދީފައިވާ ކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ޞާލިޙު ވިދާޅުވެއްޖެއެވެ.
ބުރާސްފަތި ދުވަހު ދެއްވި ރިޔާސީ ބަޔާނުގައި ރައީސް ވިދާޅުވީ މި ސަރުކާރުން ގައުމު ތަރައްޤީކުރުމުގައި ގެންގުޅޭ ވިސްނުމަކީ ތަރައްޤީގެ ވިސްނުން ހުރި ޒުވާން ތަޢުލީމީ ޖީލެއް ބިނާކުރުން ކަމަށެވެ. އެގޮތުން މި ސަރުކާރުގެ ކުރީ ކޮޅު ހިލޭ ފުރަތަމަ ޑިގްރީއަށް ކިޔެވޭނެ ފުރުޞަތު ފަހިކޮށްދިނުމާއި މަތީ ތަޢުލީމަށް އެކި ލޯންތަކަށް ހުޅުވާލުމަކީ ވެސް އެ މަޤުޞަދުގައި ކުރެއްވި ކަންތައްތަކެއް ކަމަށް ރައީސް ވިދާޅުވިއެވެ.
ކޮވިޑް-19ގެ ދަނޑިވަޅުގައި ވެސް ދަރިވަރުންނަށް ދޫކުރި ލޯންތަކުގެ ފުރުޞަތު މެދުކަނޑާނުލައި ކުރިއަށް ގެންދިޔައީ ވެސް ހަމަ އެ ސަބަބައްޓަކާ ކަމަށް ރައީސް ވިދާޅުވި އެވެ.
މަތީ ތަޢުލީމަށް ދޫކުރާ ލޯންތަކުގެ ތެރޭގައި ޚާއްޞަ އެހީއަށް ބޭނުންވާ މީހުންނާއި ކުދިންނަށް ޚާއްޞަ ކެޓަގަރީއެއް މިހާރު ހިމަނާފައިވާކަން ފާހަގަކުރައްވައި ރައީސް ވިދާޅުވީ އެއީ ޒުވާނުން ބިނާކުރުމާއި، ގައުމު އާރާސްތުކުރުމުގައި ބައިވެރިވުމުގެ ހަމަހަމަ ފުރުޞަތު ފަހިކޮށްދިނުމުގެ ގޮތުން ނިންމި ނިންމެވުމެއް ކަމަށެވެ.
މީގެ އިތުރަށް ކޮވިޑް-19ގެ ހާލަތުގައި ވެސް ތަޢުލީމަށް އިސްކަންދީފައިވާ ވަރު ފާހަގަކުރައްވައި ރައީސް ވިދާޅުވީ މުޅި މާލެ ލޮންޑައުން ހާލަތުގައި އޮތް އިރު ވެސް ސްކޫލްތަކާއި ކޮލެޖުތަކުގެ ކިޔެވުން ހުއްޓާނުލައި އޮންލައިންކޮށާއި އެހެނިހެން ގޮތްގޮތުން ވެސް ކުރިއަށް ގެންދަން ނިންމީ ތަޢުލީމަށް ދޭ އިސްކަން ބޮޑުވީމަ ކަމަށެވެ. އަދި އެކަމަށް ސްކޫލް މުދަރިއްސުންނާއި ޚާއްޞަކޮށް ބެލެނެވެރިންގެ ކިބައިން ލިބުނު އެއްބާރުލުމަށް ރައީސް ވަނީ ޝުކުރުއަދާކުރައްވާފައެވެ.
