ކަކުލަށް ލިބުނު އަނިޔާއިން ރަނގަޅުވެ ލިވަޕޫލުގެ ފަރިތަކުރުންތަކުގައި ޕޯޗުގަލުގެ ޒުވާން ފޯވާޑް ޑިއޯގޯ ޔޮޓާ ބައިވެރިވާން ފަށައިފިއެވެ.

އުމުރުން 24 އަހަރުގެ ޔޮޓާއަށް އަނިޔާވީ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ޑިސެމްބަރު މަހުގެ ނުވަވަނަ ދުވަހު ރަށުން ބޭރުގައި މިޗީލޭންޑާ 1-1 ގެ ނަތީޖައަކުން ލިވަޕޫލް އެއްވަރުވި މެޗުގައެވެ. އެ މެޗުގައި ލިބުނު އަނިޔާގެ ސަބަބުން މެޗު ނިމެން ތިން މިނެޓަށް ވެފައި ވަނިކޮށް ޔޮޓާ ވަނީ ބަދަލުކޮށްފައެވެ.

އެ އަނިޔާއާ ގުޅިހެން ޔޮޓާއަށް ވަނީ ލިވަޕޫލުން އެންމެ ފަހުން ކުޅުނު 12 މެޗު ގެއްލިފައެވެ. އެކަމަކު އަނިޔާއިން ރަނގަޅުވެ ބުދަ ދުވަހު ޔޮޓާ ވަނީ އެކަނި ތަމްރީނުތައް ކުރަން ފަށާފައެވެ. އަދި މުޅިން އެއްކޮށް ފިޓްވުމާއެކު ޓީމު ފަރިތަކުރުންތަކުގައި ޔޮޓާ ބައިވެރިވާނެ ކަމަށް ރިޕޯޓުތައް ބުނެއެވެ.

މިދިޔަ ޑިސެމްބަރު މަހު ޔޮޓާއަށް އަނިޔާވިއިރު، މިދިޔަ އަހަރުގެ ހޫނު މޫސުމުގައި ލިވަޕޫލާ ގުޅުނު ފޯވާޑް ވަނީ އެ ޓީމުގައި ތަފާތު މޮޅު ކުޅުމެއް ދައްކާފައެވެ. އެގޮތުން ވުލްވްސް ދޫކޮށް ލިވަޕޫލަށް ބަދަލުވުމަށްފަހު އޭނާ ވަނީ އެ ޓީމަށް ކުޅެދިން 17 މެޗުގައި ނުވަ ލަނޑު ޖަހާފައެވެ. އަދި އިނގިރޭސި ޕްރިމިއާ ލީގުގައި ޔޮޓާ ލިވަޕޫލަށް ނުވަ މެޗު ކުޅެދީފައިވާއިރު، އޭނާ ވަނީ ފަސް ލަނޑު ޖަހާފައެވެ.

ކަކުލަށް ލިބުނު އަނިޔާއިން ޔޮޓާ ރަނގަޅުވުމަކީ އަނިޔާގެ ގިނަ މައްސަލަތަކެއް ކުރިމަތިވެފައިވާ ލިވަޕޫލަށް ލިބޭނެ ހިތްހަމަޖެހުމެކެވެ. އެގޮތުން މިހާރުވެސް އެ ޓީމުގެ ގިނަ ޑިފެންޑަރުންތަކެއް ތިބީ އަނިޔާގައި ކުޅުމާ ދުރުގައެވެ. އެގޮތުން ކަކުލަށް ލިބުނު އަނިޔާގެ ސަބަބުން ލިވަޕޫލުގެ ތަޖުރިބާކާރު ޑިފެންޑަރު ވާޖިލް ވެން ޑައިކާއި ޖޯ ގޯމޭޒަށް މި ސީޒަނުގައި އެނބުރި ކުޅުމަށް އާދެވޭނެ ކަމުގެ ޔަގީންކަމެއް ނެތްއިރު، ދާދި ފަހުން އެ ޓީމުގެ ޖޮއެލް މަޓިޕުގެ ތަނބިކައްޓަށް ލިބުނު އަނިޔާގެ ސަބަބުން އޭނާއަށް މި ސީޒަނުގައި ދެން ނުކުޅެވޭނެ ކަމަށް ލިވަޕޫލުން ވަނީ ބުނެފައެވެ.

މި ސީޒަނުގައި އަނިޔާގެ ގިނަ މައްސަލަތަކެއް ލިވަޕޫލަށް ކުރިމަތިވި ނަމަވެސް، އެ ޓީމުން އަންނަނީ ރަނގަޅު މި ސީޒަނުގައިވެސް ކުޅުމެއް ދައްކަމުންނެވެ. އެގޮތުން އެންމެ ފަހުގެ ޗެމްޕިއަނުން އޮތީ ޕްރިމިއާ ލީގުގެ ތިންވަނައިގައި ކުޅުނު 21 މެޗުން ލިބުނު 44 ޕޮއިންޓާއެކުއެވެ. އަދި ލިވަޕޫލުން ވަނީ މި ސީޒަނުގެ ޗެމްޕިއަންސް ލީގުގެ ދެވަނަ ބުރުން ޖާގައެއް ހޯދާފައެވެ.