ކޮވިޑް-19 ޗެރިޓީ ފަންޑް ރެއިޒަރއެއް ގޮތުގައި މަޝްހޫރުވި ޓޮމް މޫރ ކޮވިޑް ޖެހިގެން އުމުރުން 100 އަހަރުގައި މަރުވެއްޖެއެވެ.

ދެވަނަ ބޮޑު ހަނގުރާމައިގެ ދުވަސްވަރުން ފެށިގެން ގިނަ ދުވަސްތަކެއް ވަންދެން އިނގިރޭސިވިލާތުގެ އަސްކަރިއްޔާއަށްވެސް ޚިދުމަތް ކުރައްވާފައިވާ ޓޮމް މޫރއަކީ އެ ޤައުމުގެ ނޭޝަނަލް ހެލްތް ސަރވިސަސް (އެންއެޗްއެސް)އަށް ފަންޑް ރެއިސް ކުރުމުގައި ޙަރަކާތްތެރިވެ، ބޮޑު މަޤުބޫލުކަމެއް ހޯދާފައިވާ މީހެކެވެ.

އޭނާ މަރުވެފައިވަނީ ކޮވިޑް-19އަށް ޕޮޒިޓިވްވެ، ފަރުވާ ހޯދަމުން ދަނިކޮށްކަމަށް ރިޕޯޓުތައް ބުނެއެވެ.

މޫރ ކޮވިޑް-19ށް ޕޮޒިޓިވްވެފައިވަނީ ނިމިދިޔަ ހަފްތާގެ ތެރޭގައެވެ. އަދި އޭރު ވެކްސިން ޖަހާފައި ނުވަނީ ނިއުމޯނިއާއަށް ފަރުވާ ހޯދަމުން ގެންދިއުމުގެ ސަބަބުން ކަމަށް އާއިލާއާ ޙަވާލާދީ ބޭރުގެ ނޫސްތަކުން ރިޕޯޓު ކޮށްފައިވެއެވެ.

"ކެޕްޓަން ޓޮމް"ގެ ނަމުން މަޝްހޫރުވެފައިވާ މޫރ ވަނީ މިހާތަނަށް 45 މިލިއަން އެމެރިކާ ޑޮލަރުގެ އެހީ އެ ޤައުމުގެ އެންއެޗްއެސްއަށް ހޯދައިދީފައެވެ. އޭނާ މަޝްހޫރުވެފައިވަނީ ގޭގެ ބަގީޗާގެ ވަށައިގެން ހިނގައި، އެންއެޗްއެސްއަށް 1000 ޕައުންޑް އެއްކުރުމުގެ އަޒުމުގައި ފެށި މަސައްކަތުންނެވެ. އެ މަސައްކަތަށް ކުޑަ ދުވަސްކޮޅެއްގެ ތެރޭގައި ގިނަ ބައެއްގެ ސަމާލުކަން ލިބިގެންގޮސް، އެންމެ ފަހުން އެކަން ޗެރިޓީ މަސައްކަތަކަށް ބަދަލުވީއެވެ.