ޗައިނާގެ ސިނޮފަރމް ވެކްސިންގެ 5000 ޑޯޒް ރާއްޖެއަށް ލިބިއްޖެ
ވެކްސިނަށް ހުއްދަ ދިނުމުގެ ކުރިން މޯލްޑިވްސް ފުޑް އެންޑް ޑްރަގް އޮތޯރިޓީން ބަލަން ޖެހޭ ކަންތައްތައް ބަލާނެ
ޗައިނާގެ ސިނޮފަރމްއިން އުފައްދާފައިވާ ވެކްސިން
ޗައިނާގެ ސިނޮފާރމް ކުންފުނިން ކޮވިޑް-19 އަށް އުފައްދާފައިވާ ވެކްސިންގެ 5000 ޑޯޒް ހެޔޮއެދޭ ފަރާތަކުން ރާއްޖެއަށް ހަދިޔާ ކޮށްފައިވާކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާން ޑރ. ނަޒްލާ ރަފީގު ވިދާޅުވެއްޖެއެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ވިދާޅުވީ ހެޔޮއެދޭ ފަރާތަކުން ރާއްޖެއަށް ހަދިޔާކޮށްފައިވާ ސިނޮފަރމް ވެކްސިންގެ ޑޯޒްތައް މިވަގުތު ހުރީ ސްޓޯރޭޖްގައި ކަމަށާއި ވެކްސިނަށް ހުއްދަ ދިނުމުގެ ކުރިން މޯލްޑިވްސް ފުޑް އެންޑް ޑްރަގް އޮތޯރިޓީން ބަލަން ޖެހޭ ކަންތައްތައް ބަލާނެ ކަމަށެވެ.
ޗައިނާގެ ސިނޮފަރމްއިން ކޮވިޑް-19އަށް ދެ ވެކްސިނެއް އުފައްދާފައިވާއިރު، ރާއްޖެއަށް ލިބިފައި ވަނީ ސިނޮފަރމްގެ ކޮން އިންސްޓިޓިއުޓަކުން އުފައްދާފައިވާ ވެކްސިނެއްކަމެއް އެޗްއީއޯސީން ހާމައެއް ނުކުރެއެވެ.
ސިނޮފާރމްގެ ވޫހާން އިންސްޓިޓިއުޓް އޮފް ބަޔޮލޮޖިކަލް ރީސާރޗް އަދި ބެއިޖިން އިންސްޓިޓިއުޓް އޮފް ބަޔޮލޮޖިކަލް ރިސާރޗުން ވަނީ ކޮވިޑް-19އަށް ވެކްސިން އުފައްދާފައެވެ. އެގޮތުން ވޫހާން އިންސްޓިޓިއުޓްގެ ވެކްސިން އެމެޖެންސީކޮށް ބޭނުން ކުރުމުގެ ހުއްދަ ޗައިނާ އަދި ޔޫއޭއީން ދީފައިވާއިރު، މިވެކްސިންގެ ކްލިނިކަލް ޓްރަޔަލްގެ ފޭސް ތިނެއްގެ މަސައްކަތްތައް ދަނީ ކުރަމުންނެވެ.
ބެއިޖިން އިންސްޓިޓިއުޓުން ކޮވިޑް-19އަށް އުފައްދާފައިވާ ވެކްސިނަކީ 79 އިންސައްތަ ކާމިޔާބު ވެކްސިނެއްކަމަށް ދައްކާފައިވާ އިރު، މިވެކްސިނަކީ ދެ ޑޯޒުން ތިން ހަފްތާގެ ދުރުމިނުގައި ދޭން ޖެހޭ ވެކްސިނެކެވެ. މި ވެކްސިން ބޭނުން ކުރުމުގެ ހުއްދަ ޗައިނާ، ޔޫއޭއީ އަދި ބަހްރައިންގައި ދީފައިވާއިރު މިވެކްސިން ބޭނުން ކުރުމުގެ އެމެޖެންސީ ހުއްދަ ހަންގޭރީ، ޖޯޑަން، ޕާކިސްތާނު އަދި މިސްރުގައި ވަނީ ދީފައެވެ.
