ލޯނު އުސޫލުން މިނަމީނޯ ސައުތެމްޓަނަށް

ލިވަޕޫލަށް ކުޅެމުން އަންނަ ޖަޕާނުގެ ފޯވާޑް ޓަކޫމީ މިނަމީނޯ ލޯނު އެއްބަސްވުމެއްގެ ދަށުން ސައުތެމްޓަނަށް ބަދަލުވެއްޖެއެވެ.

ޓްރާންސްފާ ބާޒާރުގެ ފަހު ދުވަހު މިނަމީނޯ ސައުތެމްޓަނަށް ބަދަލުވިކަން ލިވަޕޫލުން ވަނީ ހާމަކޮށްފައެވެ. ލިވަޕޫލުން ނެރުނު ބަޔާނުގައިވާ ގޮތުން އުމުރުން 26 އަހަރުގެ ފޯވާޑް ލޯނު އުސޫލުން ސައުތެމްޓަނާ ގުޅުނީ މި ސީޒަނުގެ ނިޔަލަށެވެ.

ލޯނު އުސޫލުން މިނަމީނޯ ސައުތެމްޓަނަށް ބަދަލުވިއިރު، އޭނާ ލިވަޕޫލާ ގުޅުނީ 2019 ވަނަ އަހަރުގެ ފިނި މޫސުމުގެ ޓްރާންސްފާގައެވެ. އެކަމަކު ލިވަޕޫލަށް ބަދަލުވެ މިނަމީނޯއަށް އެންމެ އެދެވޭ ކުޅުމެއް މިހާތަނަށް ދެކެވިފައި ނުވާއިރު، ލިވަޕޫލަށް ކުޅެދިން 31 މެޗުގައި މިނަމީނޯއަށް ކާމިޔާބުކުރެވިފައިވަނީ ހަތަރު ލަނޑެވެ. އެކަމަކު މިނަމީނޯ ވަނީ ލިވަޕޫލާއެކު މިދިޔަ ސީޒަނުގެ އިނގިރޭސި ޕްރިމިއާ ލީގު ކާމިޔާބުކޮށްފައެވެ.

ލިވަޕޫލާ ގުޅުމުގެ ކުރިން މިނަމީނޯ ވިދާލާފައިވަނީ އޮސްޓްރޭލިއާގެ އާރްބީ ސާލްޒްބާގުންނެވެ. އެގޮތުން އޭނާ ވަނީ ސާލްޒްބާގަށް ކުޅެދިން 189 މެޗުގައި 64 ލަނޑު ޖަހާފައެވެ. އަދި ޖަޕާނުގެ ގައުމީ ފުޓްބޯޅަ ޓީމުންވެސް ޖާގަ ހޯދާފައިވާ މިނަމީނޯ ވަނީ ގައުމީ ޓީމަށް 26 މެޗު ކުޅެދީ 12 ލަނޑު ކާމިޔާބުކޮށްފައެވެ.

ލޯނު އެއްބަސްވުމެއްގެ ދަށުން މިނަމީނޯ ސައުތެމްޓަނާ ގުޅުނުއިރު، އެ ޓީމު އޮތީ ލީގު ތާވަލުގެ 11 ވަނައިގައި ކުޅުނު 20 މެޗުން ލިބުނު 29 ޕޮއިންޓާއެކުއެވެ. ލީގުގައި ދެން ސައުތެމްޓަނުން އެންމެ އަވަހަށް ކުޅޭ މެޗުގައި އަންނަ އަންގާރަ ދުވަހުގެރޭ ނުކުންނާނީ މެންޗެސްޓާ ޔުނައިޓެޑާ ދެކޮޅަށެވެ.