ޓްރާންސްފާގެ ފަހު ދުވަހު ލިވަޕޫލަށް ދެ ޑިފެންޑަރުން

ޓްރާންސްފާ ބާޒާރުގެ ފަހު ދުވަހު އިނގިރޭސި ޗެމްޕިއަން ލިވަޕޫލުން ދެ ޑިފެންޑަރުންގެ ސޮއި ހޯދައިފިއެވެ.

ލިވަޕޫލުން ގެނައީ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގެ ޕްރެސްޓަންއަށް ކުޅެމުން އައި އުމުރުން 25 އަހަރުގެ ބެން ޑޭވިސް އާއި ޖަރުމަނުގެ ޝާލްކާއަށް ކުޅެމުން އަންނަ އުމުރުން 20 އަހަރުގެ ޑިފެންޑަރު އޮޒާން ކަބަކެވެ.

މީގެތެރެއިން ޑޭވިސްގެ ސޮއި ލިވަޕޫލުން ހޯދީ ދެ މިލިޔަން ޕައުންޑުގެ އަގަކަށެވެ. އަދި އޭނާ ވަނީ ލިވަޕޫލާއެކު ދިގު މުއްދަތުގެ އެއްބަސްވުމެއް ހަދާފައެވެ. އަދި ތުރުކީގެ ޒުވާން ޑިފެންޑަރު ކަބަކް ލިވަޕޫލާ ގުޅުނީ މި ސީޒަނުގެ ނިޔަލަށް ލޯނު އެއްބަސްވުމެއްގެ ދަށުންނެވެ. ލިވަޕޫލުން ކަބަކަށް އެއް މިލިޔަން ޕައުންޑުގެ ލޯން ފީއެއް ދެއްކިއިރު، އެ ޓީމުން ބޭނުންނަމަ މި ސީޒަނަށް ފަހު 18 މިލިޔަން ޕައުންޑް ދެއްކުމަށްފަހު ކަބަކުގެ އެއްބަސްވުން ދާއިމީ ކުރެވޭނެއެވެ.

ޕްރެސްޓަންއަށް ކުޅެމުން އައި ޑޭވިސް ލިވަޕޫލާ ގުޅުނުއިރު، މިއީ އޭނާ އިނގިރޭސި ޕްރިމިއާ ލީގުގެ ކުލަބަކަށް ބަދަލުވި ފުރަތަމަ ފަހަރެވެ. މީގެ ކުރިން އޭނާ މުޅިންވެސް ކުޅެފައިވަނީ އިނގިރޭސި ދެވަނަ ޑިވިޝަނާއި ތިންވަނަ ޑިވިޝަނުގެ ކުލަބުތަކަށެވެ.

ދެން ލިވަޕޫލާ ގުޅުނު ޝާލްކާގެ ޑިފެންޑަރު ކަބަކް ވަނީ މީގެ ކުރިން ސްޓުޓްގާޓުގެ އިތުރުން ގަލަތަސަރާއީއަށްވެސް ކުޅެފައެވެ. އަދި މިދިޔަ ދެ ސީޒަނުގައި އޭނާ ޝާލްކާއަށް ކުޅުނުއިރު، މި މުއްދަތުގައި އޭނާ ވަނީ އެ ޓީމަށް 42 މެޗު ކުޅެދީ ތިން ލަނޑު ޖަހާދީފައެވެ. އަސި ޒުވާން ޑިފެންޑަރު ވަނީ މިހާތަނަށް ތުރުކީގެ ގައުމީ ފުޓްބޯޅަ ޓީމަށް ހަތް މެޗު ކުޅެދީފައެވެ.

ލިވަޕޫލުން ޓްރާންސްފާގެ ފަހު ދުވަހު ދެ ޑިފެންޑަރުން ގެނައީ މި ސީޒަނުގައި އެ ޓީމުގެ ޑިފެންޑަރުންނަށް އަނިޔާގެ ގިނަ މައްސަލަތަކެއް ކުރިމަތިވުމާ ގުޅިގެންނެވެ. އެގޮތުން ކަކުލަށް ލިބުނު އަނިޔާގެ ސަބަބުން ލިވަޕޫލުގެ ތަޖުރިބާކާރު ޑިފެންޑަރު ވާޖިލް ވެން ޑައިކާއި ޖޯ ގޯމޭޒަށް މި ސީޒަނުގައި އެނބުރި ކުޅުމަށް އާދެވޭނެ ކަމުގެ ޔަގީންކަމެއް ނެތްއިރު، ދާދި ފަހުން އެ ޓީމުގެ ޖޮއެލް މަޓިޕުގެ ތަނބިކައްޓަށް ލިބުނު އަނިޔާގެ ސަބަބުން އޭނާއަށް މި ސީޒަނުގައި ދެން ނުކުޅެވޭނެ ކަމަށް ލިވަޕޫލުން ވަނީ ބުނެފައެވެ.

ލިވަޕޫލުން ދެ ޑިފެންޑަރެއްގެ ސޮއި ހޯދިއިރު، އެ ޓީމު އޮތީ ލީގުގެ ތާވަލުގެ ތިންވަނައިގައި ކުޅުނު 21 މެޗުން ލިބުނު 40 ޕޮއިންޓާއެކުއެވެ. ލިވަޕޫލުން ލީގުގައި ދެން އެންމެ އަވަހަށް ކުޅޭ މެޗުގައި އަންނަ ބުދަ ދުވަހުގެރޭ ނުކުންނާނީ ބްރައިޓަނާ ދެކޮޅަށެވެ.