ޓީސީ ސްޕޯޓްސް ކުލަބަށް އަލުން އެނބުރި އައުން އެއީ ލިބުނު ހިތްހަމަޖެހުމެއް ކަމަށް އެ ޓީމާ ދާދި ފަހުން ހަވާލުވި މުޙައްމަދު ނިޒާމް (ނިޒާމްބެ) ބުނެފިއެވެ.
ޓީސީގެ ކޯޗުގެ މަގާމުން މިދިޔަ ހަފުތާގައި މުޙައްމަދު ޝާޒްލީ (ޝާޒް) އިސްތިއުފާދިނުމުން، ނިޒާމްބެ އެ ޓީމާ ހަވާލުވެފައިވަނީ މިދިޔަ ހުކުރު ދުވަހުއެވެ. މިއީ ނޖިޒާމްބެ ޓިސީއާ ގުޅުނު ދެވަނަ ފަހަރެވެ. މީގެ ކުރިން ނިޒާމްބެ ވަނީ ޓީސީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޓީސީން އެ ޓީމުގެ ތާރީޚުގައިވެސް ފުރަތަމަ ފަހަރަށް ދިވެހި ޕްރިމިއާ ލީގު ކާމިޔާބުކޮށްފައިވަނީ ނިޒާމްބެގެ އިރުޝާދުގެ ދަށުންނެވެ.
ދިރާގު ދިވެހި ޕްރިމިއާ ލީގުގައި އަންގާރަ ދުވަހުގެ ހަވީރު ކުލަބު ވެލެންސިއާ ދެކޮޅަށް ނުކުތުމުގެ ކުރިން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނިޒާމްބެ ބުނީ ކޮންމެ ޓީމެއްގެ ކޯޗުގެ މަގާމާ ހަވާލުވި ކަމުގައިވިޔަސް އެއީ ބޮޑު ޒިންމާއެއް ކަމަށާއި، ޓީސީން އަލުން އޭނާއަށް ހުށަހެޅުމުން އެއީ ލިބުނު ހިތްހަމަޖެހުމަކާއި ކާމިޔާބީއެއް ކަމަށެވެ.
ވެލެންސިއާ މެޗާ ބެހޭ ގޮތުން ނިޒާމްބެ ބުނީ އެ މެޗަށް ނުކުންނައިރު ޓީމުގައި އަނިޔާގެ މައްސަލަ އެބަހުރި ކަމަށާއި، އެކަމަކު ކުޅުންތެރިން މަސައްކަތް ކޮށްފިނަމަ ވެލެންސިއާ ބަލި ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އެކަމަކު ވެލެންސިއާގެ ސްކޮޑަށް ފުރިހަމައަށް އިޙުތިރާމުކުރާ ކަމަށާއި، އެ ޓީމުގައި މި ވަގުތު އޮތް ސްކޮޑަކީ ލީގުގައި މިހާރު އޮތް އެންމެ ވަރުގަދަ އެއް ސްކޮޑު ކަމަށްވެސް ނިޒާމްބެ ބުންޏެވެ.
ޓީސީ މެޗުގެ ކުރިން ވެލެންސިއާގެ ކޯޗު މުޙައްމަދު އާތިފް (އާތީ) ބުނީ މި މެޗަކީ ވެލެންސިއާއަށް ވަރަށް މުހިންމު މެޗެއް ކަމަށާއި، ލީގުގެ ރަނގަޅު ހިސާބެއްގައި އޮތުމަށް މި ތިން ޕޮއިންޓް ހޯދުން މުހިންމު ކަމަށެވެ. އަދި ލީގުގައި އަދިވެސް ވެލެންސިއާއަށް ކުރި ހޯދޭނެ ކަމުގެ ޔަގީންކަން އެބައޮތް ކަމަށާއި، މި ލީގު ވެލެންސިއާއިން ނިންމާނީ ރަނގަޅު ހިސާބެއްގައި އޮވެގެން ކަމަށްވެސް އާތީ ބުންޏެވެ.
އާތި އިތުރަށް ބުނީ ލީގުގައި ވެލެންސިއާ ޕްރެޝަރަށް ވެއްޓޭ ހިސާބަކަށް އަދި ނުދާ ކަމަށާއި، މިހާތަނަށް ވެލެންސިއާ ބަލިވި މެޗުތަކުން ބަލިވީ ފަހު ވަގުތު ހެދުނު ގޯސްތަކުގެ ސަބަބުން ކަމަށެވެ.
މި މެޗަށް ވެލެންސިއާ ނުކުންނައިރު، އެންމެ ފަހުން ލީގުގައި ކުޅުނު ހަތަރު މެޗުންވެސް ވެލެންސިއާއަށް މޮޅެއް ހޯދިފައެއް ނުވެއެވެ. އެއާއެކު ލީގު ތާވަލުގެ ތިންވަނައިގައި ވެލެންސިއާ އޮތީ ކުޅުނު އަށް މެޗުން ލިބުނު 12 ޕޮއިންޓާއެކުއެވެ. އަދި ޓީސީ އޮތީ ތާވަލުގެ ފަސްވަނައިގައި އަށް މެޗުން ނުވަ ޕޮއިންޓާއެކުއެވެ.
ލީގުގެ ދެވަނަ ބުރުގައި ޓީސީ އާއި ވެލެންސިއާ ބައްދަލުކުރާއިރު، ފުރަތަމަ ބުރުގައި މި ދެ ޓީމު ބައްދަލުކުރި މެޗު ނިމުނީ 1-1 ން ދެ ޓީމު އެއްވަރުވެގެންނެވެ. ދިރާގު ދިވެހި ޕްރިމިއާ ލީގުގައި ވެލެންސިއާ އާއި ޓީސީ ބައްދަލުކުރާ މެޗު ފަށާނީ އަންގާރަ ދުވަހުގެ ހަވީރު 16:00 ގައެވެ.
