ވެކްސިން ޖަހަން ފެށުން: 1000ށް ވުރެ ގިނަ ފްރޮންޓްލައިން މުވައްޒަފުންނަށް ބޮޑު ހިތްހަމަ ޖެހުމެއް
ވެކްސިން ޖެހި އެއްވެސް މީހެއްގެ ގައިން ނޭދެވޭ އަސަރެއް ކޮށްފައެއް ނުވޭ
އައްޑޫގައި ވެކްސިން ދިނުމުގެ ޕްރޮގްރާމްގެ ތެރެއިން
އައްޑޫ ސިޓީގައި ކޮވިޑް-19 ގެ ވެކްސިން ޖަހަންފަށައިފިއެވެ.
އައްޑޫ އިކުއެޓޯރިއަލް ހޮސްޕިޓަލުގައި ވެކްސިން ޖެހުން ފަށާފައިވަނީ ހޯމަ ދުވަހުގެ 10:15 ހާއިރެވެ.
އައްޑޫ ސިޓީގައި އެންމެ ފުރަތަމަ ވެކްސިން ޖަހާފައިވަނީ އިކުއެޓޯރިއަލް ހޮސްޕިޓަލުގެ އެކްޓިންގ މެޑިކަލް ޑިރެކްޓަރ ޑރ. އަބްދުﷲ އަބްސަރެވެ. އޭގެ ފަހުން ވެކްސިން ޖެހި 30 މީހުންގެ ތެރޭގައި 10 ނަރުހުންނާއި، 4 އެޓެންޑެންޓުންނާއި، 2 ލެބްޓެކްނީޝަނުނާއި، 5 ޑޮކްޓަރުންނާއި، 1 ރޭޑިއޮލޮޖިސްޓަކާއި، 4 މެޑިކަލް އޮފިސަރުންނާއި ދެ ރިސެޕްޝަނިސްޓުންގެ އިތުރުން އެއް ޑްރައިވަރު ވަނީ ވެކްސިން ޖަހާފައެވެ.
ވެކްސިން ޖެހުން ކުރިޔަށް ގެންގޮސްފައިވަނީ މި 30 މީހުން އެކި ގަޑިތަކަށް ބަހާލައިގެނެވެ. އަދި ވެކްސިން ޖެހުމުގެ ކުރިން ވެކްސިންއިން ފެންނާނެ ސައިޑް އިފެކްޓްތައް ވަނީ ކޮންމެ މީހަކަށް ވެސް ވަކިން ކިޔާދީފައެވެ. އަދި ވެކްސިން ޖެހުމަށްފަހު 15 މިނެޓުވަންދެން ކޮންމެ މީހަކު ވެސް އޮބްސަރވް ކޮށްފައިވެއެވެ.
އައްޑޫގައި ހޯމަ ދުވަހު ވެކްސިން ޖެހި މީހެއްގެ ގައިން އެއްވެސް ސައިޑް އިފެކްޓެއް ފެނިފައިނުވާއިރު، ހޯމަ ދުވަހު ވެކްސިން ޖެހި 30 މީހުންގެ ގަޔަށް ދެވަން ޑޯޒު ޖަހާނީ 4 ހަފްތާ ފަހުންނެވެ.
އައްޑޫ އިކުއިޓޯރިއަލް ހޮސްޕިޓަލުން ބުނީ އެ ހޮސްޕިޓަލަށް 1000 ޑޯޒު ވެކްސިން ލިބިފައިވާ ކަމަށާއި، އަދި ކުރިޔަށް އޮތް ތަނުގައި އިތުރު މީހުނަށް ވެކްސިން ދެމުން ގެންދާނެ ކަމަށެވެ.
ސިރަމް އިންސްޓިޓިއުޓް އޮފް އިންޑިޔާ (އެސް.އައި.އައި) އިން އުފައްދާފައިވާ "ކޮވިޝީލްޑް" ވެކްސިން ދިވެހިރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ވަނީ 2021 ޖަނަވަރީ 26 ވަނަ ދުވަހު ދީފައެވެ. މި ހުއްދަ ދީފައިވަނީ ޙާލަތަށް ރިޢާޔަތްކޮށް "ރެސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ގައި ބޭނުން ކުރުމަށެވެ.
ދިވެހިރާއްޖޭގައި މި ވެކްސިން ބޭނުންކުރުމުގެ ހުއްދަ މި އޮތޯރިޓީން ދީފައިވަނީ، މި ކަމުގައި ބަލަންޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާކުރުމަށްފަހު، އެ އޮތޯރިޓީއަށް ފަންނީ ލަފާދޭ ޓެކްނިކަލް ބޯރޑު ކަމުގައިވާ "ނޭޝަނަލް ފާރމަސޫޓިކަލް ބޯޑު"ގެ ލަފައާއި މަޝްވަރާއާ އެކުގައި ކަމަށް އެމް.އެފް.ޑީ.އޭ.ގެ ބަޔާނުގައި ބުނެފައިވެއެވެ.
ސެރަމް އިން އުފައްދާ ކޮވިޝީލްޑް ވެކްސިނަކީ އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން ތައްޔާރުކޮށްފައިވާ ރިސާރޗްގެ މައްޗަށް އުފައްދާ ވެކްސިނެކެވެ. މި ވެކްސިންގެ އެންމެ ފަހުގެ ކްލިނިކަލް ޓްރަޔަލްގެ ނަތީޖާ ދައްކާގޮތުން މިވެކްސިނަކީ 70 އިންސައްތަ އިފެކްޓިވް ވެކްސިނެކެވެ. ޔޫކޭގެ އިތުރުން ޔޫރަޕިއަން ޔޫނިއަން އަދި އިންޑިއާއިން ވެސް ވަނީ މި ވެކްސިން ބޭނުންކުރުމުގެ ހުއްދަދީފައެވެ.
