ދައުލަތުގެ 3 ބާރުން ޔަގީންކަން ދީފި، އެވެރިން ދެން ނުކުންނާނީ ވެކްސިން ޖަހައިގެން ހުން އަންނަކަމަށް ބުނެ!

އިންޑިއާއިން ރާއްޖެއަށް ހަދިޔާކުރި ވެކްސިންގެ ޔަގީންކަން ނުލިބިގެން އިހައްދުވަހަކު ބަޔަކު މަގުމަތީގައި ރޯނާވިތަން ފެނުނެވެ. އެކި ނަންނަމުގައި މުޒާހަރާ ކުރަން ނުކުމެ ޕޯޑިއަމްގައި ހުރި މީހަކު ވާހަކަ ހުސްވެ ކުރެހުމަކީ ކަރުކެހުމޭ، ކަރުކެހުމަކީ ކުރެހުމޭ ބުނާ އުސޫލުން މަނީލޯންޑަރ ކުރެއްވި ވެރިޔަކު ސަލާމަތްކުރަން ބަޔަކު ޖެހި ސަކަރާތް ވެކްސިންގެ ވާހަކައާއި ހަމައަށްދިޔައެވެ.

އެބައި މީހުންގެ ތެރެއިން ބަޔަކު މީހުން ގޮވަމުން ދިޔައީ ފުރަތަމަ ވެކްސިން ޖަހަންވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި، ވަޒީރުންނަށް ކަމަށެވެ. ނަމަވެސް ވެރިކަމުގައި ތިބީ ގަޓު މީހުން ކަމެއް އެވެރިންނަށް ނޭނގި މައިކެއް ފެންނަ އިރަށް ދުލަށް އައިހާ އެއްޗެއް ކިޔާ ސޯޝަލް މީޑިއާ ޕްލެޓްފޯމެއް އޮތިއްޔާ ތްރެޑްތައް އަމުނަމުން ދިޔައެވެ. ނަމަވެސް ގަޓު ވެރިންގެ ގަޓު ބަހުން އެކަން ސާބިތު ކޮށްދީ މިއަދު ފެނިގެންދިޔައީ އެވެރިންގެ މޫނުގައި ފިނިގޮތަކަށް ފިރުމާލި ތަނެވެ.

ދައުލަތުގެ ތިންބާރުކަމުގައިވާ ރާއްޖޭގެ ރައީސުލް ޖުމްހޫރިއްޔާއާއި، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އުއްތަމަ ފަނޑިޔާރ މުއުތަސިމް އަދުނާން ވަނީ ވެކްސިން ޖައްސަވާފައެވެ. މީގެ އިތުރުން ފޮރިން މިނިސްޓަރ އަބްދުﷲ ޝާހިދާއި، ޑިފެންސް މިނިސްޓަރ މާރިޔާ އަހުމަދު ދީދީއާއި، ހެލްތް މިނިސްޓަރ އަހުމަދު ނަސީމްގެ އިތުރުން އެއްކަލަ އިދިކޮޅު މީހުން އެންމެ ރުޅި އަންނަ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރާއި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވެސް ހިމެނިވަޑައިގަންނަވައެވެ.

މޭކަރާނެ ބަޔަކު މިއަދު ނިކަން ގަދަޔަށް މޭކަރާނެއެވެ. ވާނީވެސް އެހެންތާއެވެ. މި ސަރުކާރަށް ނުކުރެވޭނެކަމެއް ކަމަށް ދެކިގެން ބަޔަކު ނިކަން ހަޖޫ ޖެހިއެވެ. ނަމަވެސް ކަންވީ އެހެނަކުން ނޫނެވެ. ރައީސާއި ވަޒީރުންނާއި ނުވިތާކަށް ސިއްހީ ހިދުމަތްތެރިންނާއި އިންޑިއާ ސަފީރުވެސް ވެކްސިން ޖެއްސެވީއެވެ.

ވެކްސިން ޖަހާތަން ފެނިގެން ބަޔަކު މީހުންނަށް އެއީ ކޯއްޗެއްކަންވެސް ނޭގުނެވެ. ވެކްސިން ފުޅީގެ ބޭރުގައި ފެހި ކުލައިގެ ލޭބަލް ޖަހާފައި ހުރުމުން ތަނެއް ދޮރެއް ވަކި ނުވެ ކޯރާޑިތެޔޮކަމަށްވެސް ހީކުރިއެވެ. ކޮވިޝީލްޑާއި ފައިޒާވެސް ވަކިކުރަން ނޭނގުނެވެ. އެ ހުރީ ގުޅިއެއްގައި ކަމެއް ފުޅިއްގައި ކަމެއް ނޭނގުނެވެ. ވާނީ ވެސް އެހެންތާއެވެ މޭކެރިވަރުން ހޭ ވެރިކަންވެސް ނެތީއެވެ.

ކުޑަކޮށް ތަފްސީލުކޮށްލާނަމެވެ. ކޮވިޝީލްޑް ވެކްސިން ގެ ބޭރުގައި ހުންނަނީ ފެހި ކުލައިގެ ލޭބަލެއް ޖަހާފައެވެ. އާންމުކޮށް ކުޑަކުދިންނަށް ދޭ ވެކްސިން ގޮތަށް ކޫލް ބޮކްސްއެއްގައި ވެކްސިން ބެހެއްޓެއެވެ. ވެކްސިން ބަހައްޓާނެ ފިނި ހޫނުމިނަކީ 2 ޑިގްރީއާއި 8 ޑިގްރީއާއި ދެމެދެވެ. ދެން އެވެރިން ދެ ލޮލަށް މިރުސް ދުންއެޅިގެން ބެލި ބެލުމުން ފައިޒާ ވެކްސިންހެން ހީވިއެވެ. ކޫލް ބޮކްސްގެ ބަދަލުގައި ފެނުނީ މައިނަސް ޑިގްރީގައި ހުރި ކޫލް ބޮކްސްތަކެކެވެ. އެހާވެސް ކަންކަން އޮޅުވާލަން މަސައްކަތް ކުރިއެވެ.

މިއަދަކު ދިވެހިންނެއް އިދިކޮޅުން ދައްކާ ވާހަކައަށް ދައްކާ ދަޅައަކަށް ނުހެއްލެއެވެ. ދާނެ މަންޒިލެއް ނެތި މުޒާހަރާކޮށް އެތަކެއް ދިވެހިންނަށް ދުއްތުރާ ކުރި ކުރުން ނިމުމަކަށް އައިސްފިއެވެ. ޕީޕިއެމްގެ ލެބޯޓަރީގައި އުފެއްދި ވެކްސިންގެ ފިނިހޫނުމިން ލާފައިވާ ކޮޓަރީގެ ފިނިކެނޑި ވެކްސިން ތަޣައްޔަރުވެއްޖެއެވެ. އެހެންކަމުން އެ ވެކްސިން މިއަދު ދިވެހިން ބަލައި ނުގަނެއެވެ. މިއަދު ދިވެހިން ބޭނުންވަނީ އަވަށްޓެރި އިންޑިއާގައި އުފެއްދި ވެކްސިން ޖަހާ ދުނިޔެ ދެކެމުން މިދާ ބަލިމަޑުކަމުން އަވަހަށް އަރައިގަންނާށެވެ. އެތަކެއް ހާސްބަޔަކު މިހާރުވެސް ވެކްސިން ޖަހަން ކިއުގައި ޖެހިއްޖެއެވެ. މަގުމައްޗަށް ނުކުމެ މުޒާހަރާކުރަން ބޭނުންވާ މީހުންނަށްވުރެ ވެކްސިން ޖަހަން ދަމާލާފައި އޮތް ކިއު ވެސް މާ ދިގެވެ.

ކަންކަން ވަރަށް ސާފެވެ. ދައުލަތުގެ 3 ބާރާއި، ޕެންޑަމިކާއި ހަނގުރާމަކުރަމުންދާ ސިއްހީ ހިދުމަތްތެރިން މިއަދު މިވަނީ އިދިކޮޅުގެ މޫނުގައި ތަފާއްޔެއް އަޅުވާލާ ވެކްސިންގެ ރައްކާތެރިކަން ރައްޔިތުންނަށް ކަށަވަރުކޮށްދެއްވާފައެވެ. ދެން އެވެރިން އަނެއްކާވެސް ބަހަނާއެއް ނެރޭނެއެވެ. އެއީ ވެކްސިން ޖެހީމަ ހުން އަންނަ ކަމުގެ ބަހަނާއެވެ. މަގުމައްޗަށް ބަސްނާހާ ނުކުންނަ މީހުން ދެންވެސް ބަސްއަހައިގެން ވެކްސިން ޖަހާ ބުއްދީގެ ބޭނުން ކުރުން ރަނގަޅުވާނެއެވެ. އެހެންނޫނިއްޔާ ލޭކޯރަށް އެންމެ ފަހުންދާން ބޮޑާ ހޭކި ބޯވައަށް ލޭ ނުލިބުނު އުސޫލުން ވެކްސިންކޮޅެއްވެސް ނުލިބިދާނެއެވެ. ހަތަރު އުދަރެސް ފެނު ޖެހުމުގެ ކުރިން ހުން އަންނާނެ ކަމަށް ރަޖާލުން މާރަނގަޅެވެ.