އީގަލްސްގެ ކޯޗަކަށް ޝާޒްލީ ހަމަޖައްސައިފި

ކުލަބު އީގަލްސްގެ ކޯޗުގެ މަގާމަށް މުޙައްމަދު ޝާޒްލީ (ޝާޒް) ހަމަޖައްސައިފިއެވެ.

އާދީއްތަ ދުވަހުގެ ވަގުތެއްގައި އީގަލްސްއިން ވަނީ އެ ޓީމުގެ ކޯޗަކަށް ފުޓްބޯޅައިގެ އެންމެ މަތީ ކޯޗިންގ ލައިސަންސް ކަމަށްވާ އޭއެފްސީ ޕްރޯ ލައިސަންސް ހާސިލުކޮށްފައިވާ ޝާޒްލީ ހަމަޖެއްސިކަން އިއުލާން ކޮށްފައެވެ.

އީގަލްސްއިން އައު ކޯޗެއް ހަމަޖެއްސީ އެ ޓީމުގެ ކޯޗުގެ މަގާމުން މި މަހުގެ 16 ވަނަ ދުވަހު މުޙައްމަދު ޝިޔާޒް (މޯހަން) އިސްތިއުފާ ދިނުމާ ގުޅިގެންނެވެ. އެއާއެކު ދިރާގު ދިވެހި ޕްރިމިއާ ލީގުގައި އީގަލްސްއިން އެންމެ ފަހުން ކުޅުނު ދެ މެޗުގައި އެ ޓީމަށް އިރުޝާދުދީފައިވަނީ އެސިސްޓަންޓް ކޯޗު އަޙްމަދު ނިމާދު (ނިމާ) އެވެ.

އީގަލްސްއާ ޝާޒްލީ ހަވާލުވިއިރު، މީގެ ކުރިން އޭނާ އިރުޝާދު ދީފައިވަނީ ޓީސީ ސްޕޯޓްސް ކުލަބަށެވެ. އެކަމަކު މިދިޔަ ހަފުތާގެ ބުދަ ދުވަހު ޝާޒްލީ ވަނީ ކުއްލި ގޮތަކަށް އެ ޓީމުގެ ކޯޗުގެ މަގާމުން އިސްތުއފާދީފައެވެ.

ޝާޒްލީ ޓީސީ ދޫކޮށްލިއިރު، އޭނާ ޓީސީގެ ކޯޗުގެ މަގާމާ ހަވާލުވީ 2019 ވަނަ އަހަރުގެ ޑިސެމްބަރު މަހުގެ ތެރޭގައެވެ. އަދި ޝާޒްލީގެ އިރުޝާދުގެ ދަށުން މިދިޔަ އަހަރުގެ އޭއެފްސީ ކަޕުގައި ޓީސީ ވަނީ ވާދަކޮށްފައެވެ. އެކަމަކު ކޮވިޑް-19 އާ ގުޅިގެން ފަހުން އެ މުބާރާތް ކެންސަލް ކުރިއެވެ. އަދި މި ސީޒަނުގައި ޒުވާން ސްކޮޑަކާއެކު ލީގާ ކުރިމަތިލި ޓީސީން ވަނީ ޝާޒްލީގެ އިރުޝާދުގެ ދަށުން މޮޅު ކުޅުމެއް ދައްކާފައެވެ.

އީގަލްސްގެ ކޯޗުގެ މަގާމާ ޝާޒްލީ ހަވާލުވިއިރު، އެ ޓީމު އޮތީ ލީގުގެ ފުލުން ދެވަނައިގައެވެ. އެ ޓީމަށް ކުޅުނު އަށް މެޗުން ލިބިފައިވަނީ އަށް ޕޮއިންޓެވެ. ޝާޒްލީއާއެކު އީގަލްސްއިން ކުޅޭނެ ފުރަތަމަ މެޗަކީ އަންނަ ބުދަ ދުވަހުގެ ހަވީރު ސުޕަ ޔުނައިޓެޑް ސްޕޯޓްސް (ސަސް) އާ ދެކޮޅަށް ނުކުންނަ މެޗެވެ.