ލަންކާގެ ފްރަންޓް ލައިންގައި މަސައްކަތް ކުރާ 7،500 ސިފައިންނަށް ވެކްސިން ދީފި
31 ޖެނުއަރީ 2021 | އާދީއްތަ 05:09އެންމެ ފުރަތަމަ ވެކްސިން ދޭނީ ފްރަންޓްލައިން މުވައްޒަފުންނާއި ފުލުހުންނާއި ސިފައިންނަށް
ސްރީ ލަންކާގައި ސިފައިންގެ ގަޔަށް ކޮވިޝީލްޑް ވެކްސިން ޖަހަނީ
އަވައްޓެރި ސްރީލަންކާގެ ފްރަންޓް ލައިންގައި މަސައްކަތްކުރާ 7،500 ސިފައިންނަށް ވެކްސިން ދީފައިވާ ކަމަށް އެގައުމުން ބުނެފިއެވެ.
ލަންކާގައި އިންޑިއާގެ ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިން ޖަހަން ފަށާފައިވާއިރު އިންޑިއާއިން ވަނީ ކޮވިޝީލްޑް ވެކްސިންގެ ފަސްލައްކަ ޑޯޒް ލަންކާއަށް ފޮނުވާފައެވެ.
އެގައުމުގައި އެންމެ ފުރަތަމަ ވެކްސިން ދޭނީ 1،50،000 ފްރަންޓްލައިން މުވައްޒަފުންނާއި 1،15،000 ފުލުހުންނާއި ސިފައިންނަށް ކަމަށް ލަންކާ ސަރުކާރާ ހަވާލާދީ ނޫސްތަކުން ރިޕޯޓްކޮށްފައިވެއެވެ.
ކޮވިޝީލްޑް ވެކްސިން އުފައްދާފައި ވަނީ ދުނިޔޭގައި ވެސް ވެކްސިން އުފައްދާ އެންމެ ބޮޑު ކުންފުނި ކަމަށްވާ އިންޑިއާގެ ސިރަމް ކުންފުނިންނެވެ. އެ ކުންފުނިން އުފެއްދި ކޮވިޝީލްޑް ވެކްސިން އަކީ ދުނިޔޭގެ އެންމެ ބޮޑު ދިރާސާކުރާ އެއް ޔުނިވަރސިޓީ ކަމުގައިވާ އޮކްސްފޯޑް ޔުނިވަރސިޓީ އާއި ވެކްސިން އުފެއްދުމުގެ ރޭހުގައި ކުރިއަރާފައިވާ އެސްޓްރަޒެނެކާއިން އުފެއްދި ވެކްސިން (AZD1222) ގެ ފޯމިއުލާއަކީ ސިރަމް އިންސްޓިޓިއުޓުން އުފައްދާ ވެކްސިންގައި ބޭނުންކޮށްފައިވާ ފޯމިއުލާއިން ހަދާފައިވާ ވެކްސިންއެކެވެ.
22 މިލިއަންއަށް ވުރެ ބޮޑު އާބާދީއެއް އޮންނަ ސްރީލަންކާއިން މިހާތަނަށް ރިޕޯޓްކޮށްފައިވަނީ 62,445 ކޮވިޑް-19 ކޭސްއެވެ. އޭގެ ތެރެއިން 305 މީހުން ވަނީ މަރުވެފައެވެ. އެގައުމުގައި ކޮވިޑް-19 ބޮޑަށް ފެތުރިފައި ވަނީ މިދިޔަ އޮކްޓޯބަރުގައި ކޮލަމްބޯގެ ގާމަންޓް ފެކްޓްރީއަކާއި މާރުކޭޓަކުން ބަލީގެ ކްލަސްޓަރއެއް ފެނުނު ފަހުންނެވެ.
