ހެކި އުފައްދާކަމަށް ތުހުމަތު ކުރުމުން، ދިޔާނާގެ ވަރުގަދަ އިންޒާރެއް އަލީމްއަށް
އޭގެ ތެރެއިން 24 މިލިއަން ރުފިޔާ ފާރިޝްއާ ހާވަލުކުރެއްވީ ދިޔާނާ
ކުރީގެ އެޓަރނީ ޖެނެރަލް އަދި ޖާބިރުގެ އަނބިކަނބަލުން ދިޔާނާ ސައީދު އަދި އެމްއާރްއެމްގެ ސެކެޓަރީ ޖެނެރަލް އަބްދުލް އަލީމް
ދޮގު ބަޔާން ހުށައަޅުއްވައި، ހެކި އުފައްދަވާ ކަމަށް ކުރީގެ އެޓަރނީ ޖެނެރަލް އަދި ޖާބިރުގެ އަނބިކަނބަލުން ދިޔާނާ ސައީދުގެ މައްޗަށް އެމްއާރްއެމްގެ ސެކެޓަރީ ޖެނެރަލް އަބްދުލް އަލީމް އާދަމް ކުރެއްވި ތުހުމަތާ ގުޅިގެން ދިޔާނާ އެކަމަށް ރައްދު ދެއްވައިފިއެވެ.
މި މައްސަަލައަކީ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އަތުން ނެންގެވި ފައިސާއާ ރައީސް މައުމޫންގެ ދަރިކަލުން ފާރިސް ހަވާލުވެވަޑައިގަތުމަށް ފަހު، އޭނާ އެ ފައިސާއަށް ހިޔާނާތްތެރިވެވަވަޑައިގެންފައިވާ ކަމަށް ވިދާޅުވެ ދިޔާނާ ފުލުހަށް ހުށައެޅުއްވި މައްސަލައެކެވެ. މި މައްސަލައިގައި ބަޔާނަކާއެކު ދިޔާނާ ފުލުހަށް ހެކި ހުށައަޅުއްވާފައިވާއިރު، އެ ޚަބަރު ޓްވިޓަރގައި ހިއްސާ ކުރައްވައި އަލީމް ވަނީ "ދޮގު ބަޔާނާއެކު ހެކި އުފައްދަން އެނގޭ މީހުން" ކަމަށް ވިދާޅުވެ، ޓްވީޓު ކުރައްވާފައެވެ.
އެ ޓްވީޓަށް ރައްދު ދެއްވައި ދިޔާނާވެސް ޓްވީޓު ކުރައްވާފައިވާއިރު، ދިޔާނާ ވަނީ ހެކި އުފެއްދުމަކީ ޖިނާއީ ކުށަކަށްވާއިރު، ދެވަނަ ފަހަރު އެފަދަ ތުހުމަތެއް ކުރައްވައިފިނަމަ، އަބުރުގެ ދައުވާ ކުރައްވާނެ ކަމަށް ވިދާޅުވެ ވަރުގަދަ އިންޒާރެއް ދެއްވާފައެވެ.
އެކަމާ ގުޅިގެން އަލީމް ވިދާޅުވީ، އެ ފައިސާއާ ގުޅިގެން އެކިފަހަރު އެކި މީހުންގެ މައްޗަށް ތުހުމަތު ކުރައްވާއިރު، އެކަންކަން ކުރެވޭނީ ހެކި އުފައްދައިގެން ނޫންތޯ ސުވާލު ކުރައްވާފައެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މައްޗަށް، ޖާބިރު ކުރެއްވި އެފަދަ ތުހުމަތުތަކާއި ގުޅިގެން އެންޓި ކޮރަޕްޝަން ކޮމިޝަނަށް ބަޔާން ދެއްވުމަށް ޖާބިރު ދެކޮޅު ހެއްދެވިކަންވެސް އަލީމް ފާހަގަ ކުރެއްވިއެވެ.
ދިޔާނާ ފުލުހަށް މައްސަލަ ހުށަހެޅުއްވި ސިޓީގައި ވިދާޅުވެފައިވަނީ ޖާބިރު ރައީސް މައުމޫނަށް ދެއްވި ފައިސާގެ ބޮޑުބައެއް ރައީސް މައުމޫނާއި ހަވާލުކުރެއްވުމުގެ ޒިންމާ ނެންގެވީ އޭނާ ކަމަށެވެ. އެގޮތުން ރައީސް މައުމޫންގެ އެދިވަޑައިގަތުމުގެ މަތިން 24 މިލިއަން ރުފިޔާ އެމަނިކުފާނުގެ ދަރިކަލުން ފާރިސް މައުމޫންއާ ހަވާލުކުރެއްްވި ކަމަށް ދިޔާނާ ވިދާޅުވެފައި ވެއެވެ. ނަމަވެސް ރައީސް މައުމޫނަށް އެފައިސާ ލިބިވަޑައިގެންފައިނުވާ ނަމަ އެއީ ފާރީސް އެ ފައިސާއަށް ހިޔާނާތްތެރިވީކަމަށް ވެސް ދިޔާނާ ވިދާޅުވެފައި ވެއެވެ. އަދި އެ ފައިސާއަށް ފާރިސް މައުމޫން ހެއްދެވި ގޮތެއް ބައްލަވައިދެއްވުމަށްވެސް އެދިވަޑައިގެންފައިވެއެވެ.
ދިޔާނާގެ ސިޓީގައި ވަނީ ރަހުނަކާ ނުލައި ޖާބިރު އެހާބޮޑު އަދަދެއްގެ ފައިސާ ރައީސް މައުމޫނަށް ދެއްވީ ރައީސް މައުމޫނުގެ ބަސްފުޅު ގެރެންޓީއަކަށް ފުދޭ ކަމަށް ވިދާޅުވެ ވަރަށް އިތުބާރުކުރައްވާފައި ކަމަށެވެ.
އެ މައްސަލަ ޖާބިރު ކޯޓަށްވެސް ހުށަހަޅުއްވާފައިވާއިރު އެކަމުގައި ރައިސް މައުމޫނަށް އެއްވެސް ހެއްކެއް ދެއްކިފައި ނުވާ ކަމަށާއި، ހަމައެކަނި ވިދާޅުވީ ފައިސާ ލިބިވަޑައިނުގަންނަވާކަމަށް، ކަމަށްވެސް ދިޔާނާ ވިދާޅުވި އެވެ. އަދި އެއްވެސް ހެއްކެއް ހާޒިރުކުރުމެއް ނެތި މައްސަލައިގެ ހުކުމް ކުރުމާ ހަމައަށް ގާތްވެފައިވާތީ އެކަމާ ކަންބޮޑުވެވަޑައިގަންނަވާ ކަމަށާއި ވީއެންމެ އަވަހަށް ހިޔާނާތުގެ ތަހުގީގު ފާރިސްގެ މައްޗަށް ކޮށްދެއްވުމަށްވެސް ދިޔާނާ އެދިވަޑައިގެންފައިވެއެވެ.
