ސޭފަރ އިންޓަނެޓު ދުވަހާ ގުޅުވައިގެން ކުޑަކުދިންނަށް ޚާއްޞަ ކުރެހުމުގެ މުބާރާތެއް
ސޭފަރ އިންޓަނެޓު ދުވަސް ފާހަގަކުރަނީ ކޮންމެ އަހަރެއްގެ ވެސް ފެބްރުއަރީ 9 ގައި
ސޭފަރ އިންޓަނެޓު ދުވަހާއި ގުޅުވައިގެން ކުރިއަށްގެންދާ ކުރެހުމުގެ މުބާރާތުގެ ޕޯސްޓަރ
ބައިނަލްއަޤުވާމީ ސޭފަރ އިންޓަނެޓު ދުވަހާ ގުޅުވައިގެން ކުޑަކުދިންނަށް ޚާއްޞަ ކުރެހުމުގެ މުބާރާތެއްގައި ބައިވެރިވުމުގެ ފުރުޞަތު ހުޅުވާލައިފިއެވެ. މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީއިން ވަނީ 25 ޖެނުއަރީ 2021ގައި މި މުބާރާތުގައި ބައިވެރިވުމުގެ ފުރުޞަތު ހުޅުވައިލާފައެވެ.
ޓުވިޓާރ މެދުވެރިކޮށް މިކަން ހާމަކޮށް ޓެލެކޮމިއުނިކޭޝަން މިނިސްޓްރީން ކުރި ޓުވީޓްގައި ވަނީ މި މުބާރާތުގެ ތީމްއަކީ "އިންޓަނެޓްގެ ރައްކާތެރިކަން" ކަމަށް ބުނެފައެވެ. ކުރެހުން ހުށަހަޅާނީ ތިރީގައިވާ އެ މިނިސްޓްރީގެ ޓުވީޓްގައިވާ އޮންލައިން ފޯމު މެދުވެރިކޮށެވެ. އޮންލައިން ފޯމުގައި ފުރިހަމަ ނަމާއި އައި.ޑީ ކާޑުނަންބަރު، އުފަން ތާރީޙް، ގުޅޭނެ ނަންބަރު، މިހާރު ދިރިއުޅޭ އެޑްރެސް، މިހާރު ކިޔަވާ ސްކޫލް އަދި ކްލާސް ރަނގަޅަށް ފުރިހަމަކުރުމަކުރުމަށް ވަނީ ހަނދާންކޮށްދީފައެވެ.
މަޢުލުމާތު ސައްޙަ ނުވެއްޖެނަމަ ކުރެހުން ޑިސްކޮލިފައިކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ. މުބާރާތުގައި ބައިވެރިވުމަށް ތިން އުމުރުފުރާއަކުން ވަނީ ފުރުޞަތު ހުޅުވައިލާފައެވެ. އެއީ 7 އަހަރުން ދަށުގެ އުމުރުފުރާ، 7 އަހަރާއި 11 އަހަރާއި ދެމެދުގެ އުމުރުފުރާ އަދި 12 އަހަރާއި 16 އަހަރާ ދެމެދުގެ އުމުރުފުރާއެވެ. އުމުރުފުރާތައް ކަނޑައެޅުމުގައި ބަލާނީ 01 ޖަނަވަރީ 2021އަށް އަހަރު ފުރޭކަމަށް ބަލައިގެންކަމަށް ޓެލެކޮމިއުނިކޭޝަން މިނިސްޓްރީން މަޢުލޫމާތުދެއެވެ.
ކުރެހުންގެ މުބާރާތުގެ ކުރެހުންތައް ހުށަހެޅުމުގެ މުއްދަތު 4 ފެބުރުއަރީ 2021 ވާ ބުރާސްފަތި ދުވަހުގެ 16:00ގެ ނިޔަލަށް ވަނީ ހުޅުވައިލާފައެވެ. މުބާރާތުގައި ބައިވެރިވާ ކޮންމެ އުމުރުފުރާއަކުން 1ވަނަ، 2ވަނަ އަދި 3ވަނަ ހޮވުމަށް ވަނީ ހަމަޖެހިފައެވެ. މުބާރާތުން ވަނަ ހާސިލުކުރާ ކުދިން އިޢުލާނު ކުރާނީ 9 ފެބުރުވަރީ 2021 ގައެވެ.
މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޯލޮޖީ އާއި މިނިސްޓްރީގެ ދަށުން ހިންގާ ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީ އަދި ކޮމިއުނިކޭޝަން އޮތޯރިޓީ އޮފް މޯލްޑިވްސްގެ މުވައްޒަފެއްގެ ސީދާ ބެލުމުގެ ދަށުގައިވާ އާއިލާގެ މެންބަރަކަށް މި މުބާރާތުގައި ބައިވެރިއެއް ނުވެވޭނެއެވެ. މުބާރާތުގައި ހުށަހެޅޭ ކުރެހުންތައް ޖަޖުކުރާނީ މިސްޓްރީއިން ކަނޑައަޅާ ފަނޑިޔާރުންގެ ޕެނަލަކުންނެވެ. މި މުބާރާތުގެ ވަނަ ވަނައަށް ދާ ކުދިންނަށް ޚާއްޞަ އިނާމްތަކެއް ދޭން ހަމަޖެހިފައިވާކަމަށް ޓެލެކޮމިއުނިކޭޝަން މިނިސްޓްރީން ހާމަކުރައްވާފައިވާއިރު، އިނާމުތަކާ ބެހޭ އިތުރު ތަފްސީލެއް އެ މިނިސްޓްރީއިން ހާމަކޮށްފައެއް ނުވެއެވެ.
ބައިނަލްއަޤުވާމީ ސޭފަރ އިންޓަނެޓު ދުވަހަކީ ފެބްރުއަރީ މަހުގެ 9 ވަނަ ދުވަހެވެ. އެ ދުވަހަކީ އިންޓަނެޓްގެ ރައްކާތެރިކަން ކަށަވަރުކުރުމާއި، މި ވަސީލަތުގެ ބޭނުން ހެޔޮގޮތުގައި ހިފުމަށް ޒުވާން ޖީލު އަހުލުވެރިކުރުމަށް ފާހަގަކުރާ ދުވަހެކެވެ. މިއަހަރަށް ބައިނަލްއަޤުވާމީގޮތުން ސޭފަރ އިންޓަނެޓު ދުވަސް ފާހަގަކުރާތާ 18 އަހަރު ފުރޭނެއެވެ.
