60 ގައުމެއްގައި ކޮވިޑް-19 އަށް ވެކްސިން ދިނުމުގެ މަސައްކަތްދަނީ ކުރަމުން

ދުނިޔޭގެ އެކި ކަންކޮޅުތަކުން 60 ގައުމެއްގައި ކޮވިޑް-19 އަށް ވެކްސިން ދިނުމުގެ މަސައްކަތްދަނީ ކުރަމުންނެވެ.

ބްލޫމްބަރގް އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން ވެކްސިންގެ 87.1 މިލިއަން ޑޯޒް މިހާރު ވަނީ އެކި ގައުމުތަކުގައި ދީފައެވެ. އެގޮތުން އެމެރިކާގައި އެކަނިވެސް 27.3 މިލިއަން ޑޯޒް ވަނީ ދީފައެވެ.

މީގެ އިތުރުން ޗައިނާގައި 23 މިލިއަން ޑޯޒް ދީފައިވާއިރު، ޔޫރަޕިއަން ޔޫނިއަންގެ ގައުމުތަކުގައި 11.1 މިލިއަން ޑޯޒް ވަނީ ދީފައެވެ. އަދި ޔޫކޭގައި މިހާތަނަށް 7.9 މިލިއަން ޑޯޒް ވެކްސިން ދީފައިވާ ކަމަށް ތަފާސްހިސާބުތައް ދައްކައެވެ.

މިލިއަނަކަށްވުރެ ގިނަ ވެކްސިން ޑޯޒް ދީފައިވާ ގައުމުތަކުގެ ތެރޭގައި އިސްރާއިލް، ޔޫއޭއީ، އިންޑިއާ، ޖަރުމަނު އަދި ތުރުކީގެ އިތުރުން އިޓަލީ އާއި ބްރެޒިލް ހިމެނެއެވެ. ސްޕެއިން، ފްރާންސް އަދި ޕޮލޭންޑުންވެސް ވަނީ މިލިއަނަކަށް ވުރެ ގިނަ ވެކްސިންގެ ޑޯޒް އެގައުމުތަކުގެ ރައްޔިތުންނަށް ދީފައެވެ.

މިހާތަނަށް ހުއްދަ ލިބިފައިވާ ވެކްސިންތަކަކީ ދެ ޑޯޒް ޖަހަންދޭ ވެކްސިނެވެ. އެގޮތުން މިހާތަނަށް ހުއްދަ ލިބިފައިވާ ވެކްސިން ތަކަކީ ފައިޒަރ އަދި ބައޯއެންޓެކްގެ ވެކްސިންގެ އިތުރުން، މޮޑާނާ، އެސްޓްރަޒެނެކާ އަދި ގަމަލެޔާ އިންސްޓިޓިއުޓް އާއި ސަންސީނޯ ބަޔޮލޮޖިކްސްގެ ވެކްސިންގެ އިތުރުން ސިނޮފަރމް އާއި ސިނޮވެކް ބައޯޓެކްގެ ވެކްސިނެވެ.