ރަޝިއާގެ އަމަލުތަކަށް ރައްދު ދިނުމުގެ ގޮތުން ގިނަ ކަންކަން އެމެރިކާ އިން ކުރަން ޖެހޭ: ޓިލާސަމް

ރަޝިއާގެ އަމަލުތަކަށް ރައްދު ދިނުމުގެ ގޮތުން ގިނަ ކަންކަން އެމެރިކާ އިން ކުރަން ޖެހޭ ރައީސް ޓްރަމްޕް، ޚާރިޖީ ވަޒީރުކަމުގެ މަގާމުން ވަކިކުރެއްވި ރެކްސް ޓިލާސަން ވިދާޅުވެއްޖެއެވެ.

މަގާމުން ވަކިކުރެއްވުމާ ގުޅިގެން ޓިލާސަން ރިޕޯޓަރުންނާ ވާހަކަ ދައްކަވަމުން ވިދާޅުވީ ރަޝިއާގެ އަމަލުތަކާ މެދު އެގައުމުން ސަމާލުވާން ޖެހޭ ކަމަށާއި އަދި ރަޝިއާ އިން ނިންމަން ޖެހޭ ނިންމުންތައް ނިންމަން ޖެހޭނީ ރަޝިއާގެ ރައްޔިތުންގެ ހައްގުގަޔާއި އަދި މުޅި ދުނިޔޭގެ މަސްލަހަތުތަކަށް ވެސް ބަލައިގެން ކަމަށެވެ.

ޓިލާސަންގެ ވާހަކައިގައި ރައީސް ޓްރަމްޕް އަށް ޝުކުރު އަދާކުރައްވައިފައި ނުވާއިރު އަދި ރައީސް ޓްރަމްޕްގެ ޕޮލިސީތަކަށް ވެސް ޝުކުރު އަދާކުރައްވާފައި ނުވެއެވެ.

ރައީސް ޓްރަމްޕް، ޓިލާސަން މަގާމުން ވަކިކުރެއްވިކަން ހާމަކޮށް ކުރެއްވި ޓްވީޓެއްގައި ވިދާޅުވެފައި ވަނީ އެމެރިކާގެ ޚާރިޖީ ވަޒީރުކަމުގެ މަގާމުގައި ހުންނަވައި ޓިލާސަން އަދާކުރެއްވި މަސައްކަތްޕުޅަށް ޝުކުރު އަދާކުރައްވާ ކަމަށެވެ. އަދި ސީއައިއޭގެ ޑައިރެކްޓަރުގެ މަގާމުގައި ހުންނެވި މައިކް ޕޮމްޕެއޯ، ސެކްރެޓަރީ އޮފް ސްޓޭޓްގެ މަގާމަށް އައްޔަންކުރެއްވިކަން ހާމަކުރައްވައި، ޕޮމްޕެއޯ "ވަރަށް ރަނގަޅު މަސައްކަތްޕުޅެއް" ކުރައްވާނެ ކަމަށް ވެސް ޓްރަމްޕް ވިދާޅުވިއެވެ.

މިދިޔަ އަހަރު ފެބްރުއަރީގައި ސެކްރެޓަރީ އޮފް ސްޓޭޓްގެ މަގާމަށް ވަޑައިގެންނެވި ރެކްސް ޓިލާސަންގެ ދައުރުގައި އެމެރިކާގެ ޚާރިޖިއްޔާ އާއި އެމެރިކާގެ ވައިޓްހައުސް އިން ދައްކާ ވާހަކަތަކުގައި ބައެއް ފަހަރު ތަފާތު ގޮތްތަކެއް ހުރިކަން ފާހަގަކުރެވިގެން ދިޔައެވެ. އަދި ބައެއް ބޮޑެތި މައްސަލަތަކުގައި ރައީސް ޓްރަމްޕާއި ޓިލާސަންއާ ދެމެދު ވިސްނުން ތަފާތުކަން ފާޅުކަން ބޮޑު ގޮތެއްގައި އެނގިގެން ދިޔައެވެ.