ވެކްސިން ބޭނުންކުރުމުގެ ހުއްދަ ދިނުމާއެކު ސިއްޙީ އިދާރާތަކުން އެކަމަށް މަރުހަބާ ކިޔައިފި
29 ޖެނުއަރީ 2021 | ހުކުރު 02:19ސިރަމް އިންސްޓިޓިއުޓް އޮފް އިންޑިއާއަކީ ދުނިޔޭގެ އެންމެ ބޮޑު ވެކްސިން އުފައްދާ ކުންފުނި
އިންޑިއާގެ ސިރަމް އިންސްޓިޓިއުޓުން ކޮވިޑް-19 އަށް އުފެއްދި ވެކްސިން
އިންޑިއާގެ ސެރަމް އިންސްޓިޓިއުޓްގެ ވެކްސިން ރާއްޖޭގައި ބޭނުންކުރުމަށް ހުއްދަ ދިނުމާއެކު އެކަމަށް ސިއްޙީ އިދާރާތަކުން މަރުހަބާ ކިޔައިފިއެވެ.
އިންޑިއާ ސަރުކާރުގެ އެހީގައި ވެކްސިންގެ އެއްލައްކަ ޑޯޒު ރާއްޖެ ގެނަސްފައިވާއިރު، މި ވެކްސިން ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީން (އެމްއެފްޑީއޭ) އިން ދީފައިވަނީ ބުރާސްފަތި ދުވަހުގެރޭގެ ވަގުތެއްގައެވެ. އެއާއެކު ސިއްޙީ އިދާރާތަކުން ވަނީ އެކަމަށް މަރުހަބާ ކިޔާފައެވެ.
އެގޮތުން މޯލްޑިވްސް މެޑިކަލް އެސޯސިއޭޝަނުން ބުނީ މިއީ ލިބުނު އުފާވެރި ޚަބަރެއް ކަމަށާއި، ވެކްސިން ވީ އެންމެ އަވަހަކަށް ފްރޮންޓްލައިންގައި މަސައްކަތް ކުރަމުން އަންނަ ސިއްޙީ ޚިދުމަތްތެރިންނަށް ދޭނެ ކަމަށް އުންމީދު ކުރާ ކަމަށެވެ.
މީގެ އިތުރުން ޑރ. އަލީ ނިޔާފް ކުރެއްވި ޓްވީޓެއްގައި ވިދާޅުވީ އެސްޓްރާ ޒެނިކާގެ ކޮވިޑް-19 ވެކްސިން (ކޮވިޝީލްޑް) ވެކްސިނާއެކު އުންމީދު އާވެފައިވާ ކަމަށާއި، މިއީ މިދިޔަ އަހަރުގެ ޖަނަވަރީ މަހުން ފެށިގެން އިންތިޒާރުކުރި ވަގުތައް ނިމުމެއް އައުން ކަމަށެވެ.
ވެކްސިން ދިނުމުގެ ހުއްދަ ދިނުމާއެކު އެޗްޕީއޭއިން ވެސް ވަނީ އެކަމަށް މަރުހަބާ ކިޔައިފައެވެ. އެގޮތުން އެޗް.ޕީ.އޭ.އިން ބުނީ މިއީ ކޮވިޑް ކޮންޓްރޯލް ކުރުމަށް ލިބުނު ބޮޑު ކުރިއެރުމެއް ކަމަށެވެ.
ސިރަމް އިންސްޓިޓިއުޓް އޮފް އިންޑިޔާ (އެސް.އައި.އައި) އިން އުފައްދާފައިވާ "ކޮވިޝީލްޑް" ވެކްސިން ދިވެހިރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ދީފައިވަނީ ޙާލަތަށް ރިޢާޔަތްކޮށް "ރެސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ގައި ބޭނުން ކުރުމަށެވެ. ދިވެހިރާއްޖޭގައި މި ވެކްސިން ބޭނުންކުރުމުގެ ހުއްދަ މި އޮތޯރިޓީން ދީފައިވަނީ، މި ކަމުގައި ބަލަންޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާކުރުމަށްފަހު، އެ އޮތޯރިޓީއަށް ފަންނީ ލަފާދޭ ޓެކްނިކަލް ބޯރޑު ކަމުގައިވާ ނޭޝަނަލް ފާރމަސޫޓިކަލް ބޯޑުގެ ލަފަޔާ މަޝްވަރާއާ އެކުގައިކަމަށް އެމް.އެފް.ޑީ.އޭ.ގެ ބަޔާނުގައި ބުނެފައިވެއެވެ.
ސިރަމް އިންސްޓިޓިއުޓް އޮފް އިންޑިއާއަކީ ދުނިޔޭގެ އެންމެ ބޮޑު ވެކްސިން އުފައްދާ ކުންފުނީގެ އިތުރުން މުޅި ދުނިޔޭގައި ކުޑަކުދިންގެ ވެކްސިންގެ 65 އިންސައްތަ ވެކްސިން އުފައްދާ ކުންފުންޏެވެ. އަދި ދުވާލެއްގެ މައްޗަށް ކޮވިޝީލްޑްގެ 50 މިލިއަން ޑޯޒް އެ ކުންފުނިން އަންނަނީ އުފައްދަމުންނެވެ.
