އެސްޓޯނިއާގެ ބޮޑުވަޒީރުކަމަށް ފުރަތަަމަ ފަހަރަށް އަންހެނަކު ޢައްޔަންކުރުމަށް ނިންމަމުންދާކަމަށް އެ ގައުމުގެ މެޖޯރިޓީ ލިބިފައިވާ ދެ ޕާޓީން ބުނެފިއެވެ.

ކޮރަޕްޝަންގެ މައްސަލަތަކެއް ފެންމަތިވުމާ ގުޅިގެން، ޖެނުއަރީ 13 ވަނަ ދުވަހު އެސްޓޯނިއާގެ ކުރީގެ ކެބިނެޓް އިސްތިޢުފާދެއްވުމާއިއެކު އުމުރުން 43 އަހަރުގެ ކާޔާ ކަލާސް އެގައުމުގެ ބޮޑުވަޒީރު ކަމުގެ މަގާމަށް ގެނައުމަށް އެގައުމުގެ އެންމެ ބޮޑު ދެ ޕާޓީ ގުޅިގެން މަޝްވަރާތައް ކޮށްފައިވާއިރު، އެދެ ޕާޓީ ގުޅިގެން އައު ޖޮއިންޓް ކެބިނެޓެއް އުފެއްދުމުގެ މަސައްކަތް އަންނަނީ ކުރަމުންނެވެ.

ރިފޯރމް ޕާޓީ އަދި ސެންޓަރ ޕާޓީ ގުޅިގެން ނެރުނު ބަޔާނެއްގައި ބުނީ ދެ ޕާޓީ ގުޅިގެން ގައުމުގެ އެންމެހާ ކަންކަން ބެލުމަށް ނިންމާފައިވާކަމަށާއި ކޮވިޑް-19 ގެ މި ހާލަތުން އަރައިގަތުމަށް އެކުގައި މަސައްކަތް ކުރައްވާނެ ކަމަށެވެ. މީގެ އިތުރުން ރައްޔިތުންނަށް ރަނގަޅު، ރައްޔިތުން ބޭނުންވާ ގޮތަށް ހުރިހާ ކަމެއް ވެގެން ދާނެ ކަމަށް ވެސް އެ ދެ ޕާޓީން ބުނެއެވެ.

ކޮންމެ ޕާޓީ އަކުން 7 މެމްބަރުން ހިމެނޭހެން ދެ ޕާޓީން މިހާރު ވަނީ މިނިސްޓަރުންގެ މަގާމަށް 14 ބޭފުޅަކު ޢައްޔަން ކުރާނެ ކަން ހާމަކޮށްފައެވެ. ދެ ޕާޓީން ގުޅިގެން މިކަން ނިންމާފައި ވީނަމަވެސް ކާޔާ ކަލާސް މަގާމަށް ރަސްމީކޮށް ޢައްޔަނު ވެގެންދާނީ ގާނޫނު ހަދާ މަޖިލީހުން އެކަން ފާސްކޮށް އެގައުމުގެ ރައީސް ކާޔާ އެމަގާމަށް ޢައްޔަނު ކުރެއްވުމުންނެވެ.