ސަފާރީއެއްގައި ރޯވެ ބޭނުން ނުކުރެވޭ އަނދާ ހުލިވެއްޖެ
ސަފާރީ ރޯވެގެން ރިޕޯޓުކޮށްފައި ވަނީ އާދިއްތަ ދުވަހުގެރޭ ދަންވަރު 3:39 ހާއިރު
ހުޅުމާލެއިން ހދ ހަނިމާދޫއަށް ދަތުރުކުރި \"ނޯޓިލަސް ވަން\" ސަފާރީގައި ރޯވުން
ހުޅުމާލެއިން ފުރައިގެން ހދ. ހަނިމާދޫއަށް ދަތުރުކުރަމުންދިޔަ "ނޯޓިލަސް ވަން" ނަމަކަށް ކިޔާ ސަފާރީގައި ރޯވެ، ބޭނުން ނުކުރެވޭ ވަރަށް އަނދާ ހުލިވެއްޖެއެވެ.
އެމްއެންޑީއެފުން ބުނީ، ސަފާރީ ރޯވެގެން ރިޕޯޓުކޮށްފައި ވަނީ އާދިއްތަ ދުވަހުގެރޭ ދަންވަރު 3:39 ހާއިރު، ކ. ކާށިދޫގެ ހުޅަނގުން 13 ނޯޓިކަލް މޭލު ބޭރުން ކަމަށެވެ. އަދި އެ ވަގުތު ސަފާރީގައި 6 މީހަކު ތިބި ކަމަށާއި އެ އެންމެންވެސް މިހާރު ތިބީ ސަފާރީގެ ޑައިވިންގ ދޯނީގައި ކަމަށް އެމްއެންޑީއެފް އިން މައުލޫމާތުދެއެވެ. އޭގެ ތެރޭގައި ހިމެނެނީ 5 ދިވެހިންނާއި 1 ބިދޭސީ ފަޅުވެރިއެއް ކަމަށްވެސް އެމްއެންޑީއެފް އިން މައުލޫމާތުދެއެވެ.
އެމްއެންޑީއެފުން ބުނީ ސަފާރީގައި ރޯވެގެން ހަބަރު ލިބުމާއެކު އެމްއެންޑީއެފްގެ ފަޔަރ އެންޑް ރެސްކިއު ޓީމުގެ ލޯންޗެއް އަލިފާން ނިއްވުމަށް އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ. އަދި އަލިފާން ނިއްވަން މަސައްކަތް ކުރަމުންދަނިކޮށް 6:44 ހާއިރު، ސަފާރީ އަޑިއަށް ގޮސްފައިވާ ކަމަށެވެ.
އެމްއެންޑީއެފުން ބުނީ މިހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ.
