ރަށްރަށުގައި ތިބި ފަރާތްތަކުން މާލެ ނައިސް ސަނަދުގެ ފެންވަރު ބެލޭނެ އިންތިޒާމްތައް ހަމަޖައްސަނީ
ސަނަދުތަކުގެ ސައްހަކަން ކަށަވަރުކުރުމަށްފަހު އެމްކިއުއޭއަށް މެއިލްކުރުމަށް ހަމަޖެހިފައިވަނީ ކައުންސިލްތަކުގެ މެއިލްއިން
އެމްކިއުއޭގެ ޗީފް އެގްޒެކެޓިވް އޮފިސަރ، ޑރ. އަބްދުލް ހަންނާނު ވަހީދު
ރަށްރަށުގެ ތިބި ފަރާތްތަކުން މާލެ ނައިސް ރަށުގައި ތިބެގެން ކައުންސިލްތައް މެދުވެރިކޮށް ސަނަދުގެ ފެންވަރު ބެލޭނެ އިންތިޒާމްތައް ހަމަޖައްސަމުންދާ ކަމަށް މޯލްޑިވްސް ކޮލިފިކޭޝަން އޮތޯރިޓީން ބުނެފިއެވެ.
އެމްކިއުއޭގެ ޗީފް އެގްޒެކެޓިވް އޮފިސަރ، ޑރ. އަބްދުލް ހަންނާނު ވަހީދު ވިދާޅުވީ ކޮވިޑް-19 އާއި އެކު އައި ލޮކްޑައުންގައި ރަށްރަށުގައި ތިބި ފަރާތްތަކަށް މާލެ އައުމަށް ދިމާވި ގޮންޖެހުންތަކާއި އެކު ސަނަދުގެ ފެންވަރު ބެލުމަށް ލުއިގޮތްތަކެއް ހޯދައިދީ އެކަންތައް ހުއްޓުމެއްނެތި އެމްކިއުއޭއިން ކުރިއަށް ގެންދިޔަކަމަށެވެ.
މިކަމާގުޅޭ ގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ހަންނާނު ވިދާޅުވީ މިގޮތަށް ރަށުގައި ތިބެގެން ސަނަދުގެ ފެންވަރުބެލޭނެ އިންތިޒާމުތައް ހަމަޖެއްސުމުން ގިނަ ރައްޔިތުންނަށް ފަސޭހަވެގެން ދިޔަކަމަށާއި އެހެން ކަމުން ސަރުކާރުގެ ލާމަރުކަޒުކުރުމުގެ ވިސްނުމުގެ ދަށުން މި ހިދުމަތް ލާމަރުކަޒުކޮށް ކުރިއަށް ގެންދިއުމަށް ނިންމާފައިވާ ކަމަށެވެ.
އެގޮތުން މިހާރު މި ހިދުމަތް ރޭވިފައި އޮންނަ ގޮތުން ސަނަދުގެ ވެރިފަރާތުން ސަނަދުގެ އަސްލާއި އެކު ކޮލިފިކޭޝަން އޮތޯރިޓީއަށް އައިސް ސަނަދުގެ ފެންވަރު ބެލުމުގެ މަސައްކަތް ކުރަން ޖެހޭ ކަމަށް ހަންނާނު ފާހަގަކުރެއްވިއެވެ.
ހަންނާނު ވިދާޅުވީ ރަށްރަށުގައި ތިބެގެން މި ހިދުމަތް ހޯދާއިރު، ސަނަދުގެ ސައްހަކަން ކަށަވަރު ކުރެވޭނެ ގޮތެއް ހަމަޖައްސަން ޖެހޭ ކަމަށާއި އެގޮތުން ސަރުކާރުގެ މުއައްސަސާތަކުގެ ބޭފުޅުން ރަށްރަށުގައި ތިއްބަވާއިރު ރަށުގެ ކައުންސިލްތައް މެދުވެރިކޮށް މިކަން ކުރުމަށް ވިސްނަވައި ލޯކަލް ގަވަމެންޓް އޮތޯރިޓީއާއިއެކު ކުރެވުނު މަޝްވަރާތަކުގެ ދަށުން ކައުންސިލްތަކުން ސަނަދުގެ ސައްހަކަން ކަށަވަރު ކުރުމަށްފަހު ކައުންސިލްތަކުން އެމްކިއުއޭއަށް އެ މައުލޫމާތު ހިއްސާކުރެވޭނެ ގޮތަކަށް އިންތިޒާމްތައް ހަމަޖެއްސުމަށް ނިންމީކަމަށެވެ.
ސަނަދުތަކުގެ ސައްހަކަން ކަށަވަރުކުރުމަށް ފަހު އެމްކިއުއޭއަށް މެއިލްކުރުމަށް ހަމަޖެހިފައި ވަނީ ކައުންސިލްތަކުގެ މެއިލް އިންނެވެ. އަދި މިހާރު އެމްކިއުއޭއިން ސެޓްފިކެޓްތައް އެޓެސްޓުނުކޮށްދޭ އިރު، ކައުންސިލްތަކުންވެސް އެޓެސްޓުކޮށް ސްޓޭމްޕް ނުކުރާނެ ކަމަށް ހަންނާނު ވިދާޅުވިއެވެ.
މިކަމަށް ކައުންސިލްތަކުން ވަރަށް ބޮޑު ތަރުހީބެއް ލިބުނު ކަމަށާއި އެހެންކަމުން ކޮވިޑް-19 އާއި ގުޅިގެން ލޮކްޑައުންގެ ސަބަބުން މިކަން ތައާރަފްކުރި ނަމަވެސް މިއީ އާންމުންނަށް ބޭނުންތެރި ހިދުމަތެއް ކަމުން މިކަން ހުއްޓާނުލާ ކުރިއަށް ގެންދިއުމަށް އެމްކިއުއޭއިން ނިންމާފައިވާ ކަމަށް ވިދާޅުވިއެވެ. އަދި މިކަން ގަވަމެންޓް ބޯޑަށް ހުށައަޅައި ފާސްކުރުމުގެ މަސައްކަތްކުރާނެ ކަމަށްވެސް ހަންނާނު ވިދާޅުވިއެވެ.
