ސިނަމާތައް އަލުން ހުޅުވާއިރު ކާއެއްޗެހި ނުވިއްކޭގޮތަށް ބަދަލުގެނެސް ވަންނަ އެންމެންގެ މަޢުލޫމާތު އެއްކުރާގޮތަށް ހަމަޖައްސާ، "ކޮވިޑު-19 ގެ ހާލަތުގައި ރައްކާތެރިކަމާއެކު ސިނަމާ ހިންގުމާއި ސިނަމާ ހޯލްތައް ބޭނުން ކުރަންވީގޮތުގެ އުސޫލު" އާންމުކޮށްފިއެވެ.

ޖަނަވަރީ 25ން ފެށިގެން ސިނަމާތަކާއި ފިލްމް ތިއޭޓަރުތައް ހުޅުވުމުގެ ހުއްދަ ދޭން ނިންމާފައިވާކަން ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ހާމަކޮށްފައެވެ. "ކޮވިޑު-19 ގެ ހާލަތުގައި ރައްކާތެރިކަމާއެކު ސިނަމާ ހިންގުމާއި ސިނަމާ ހޯލްތައް ބޭނުން ކުރަންވީގޮތުގެ އުސޫލު"ގައި ވަނީ ސިނަމާ ހިންގާ ފަރާތްތަކުން އަމަލުކުރަންވީގޮތާއި، ސިނަމާތަކަށް ދާ ފަރާތްތަކުން އަމަލުކުރަންވީގޮތް ވަރަށް ތަފްސީލީގޮތެއްގައި ބަޔާންކޮށްފައެވެ.

އެޗްޕީއޭއިން އާންމުކުރި މި އުސޫލުގެ ދަށުން ސިނަމާ ހިންގާ ފަރާތްތަކުގެ ޒިންމާގެ ދަށުން ސިނަމާ ހިންގާ ފަރާތުން ތަނުގައި ހަމަޖައްސަންޖެހޭ އުސޫލުތަކުގެ ތެރޭގައި ވަދެ ނިކުތުމުގައި ކޮވިޑް-19 ފެތުރުން ކޮންޓްރޯލްކުރުމަށް ފިޔަވަޅުތަކެއް އެޅުމަށް ވަނީ އެކަށައަޅާފައެވެ. އެގޮތުން މާސްކް އެޅުމާއި، މަދުވެގެން 3 ފޫޓުގެ ގައިދުރުކަން ބަހައްޓަން ޖެހެއެވެ. އަދި ކޮވިޑް-19އިން ރައްކާތެރިވުމުގެ އުސޫލުތައް އާންމުކޮށް ފެންނާނެހެން ބަހައްޓަންޖެހެއެވެ. މީގެ އިތުރުން ދޮރުކައިރީގައި ސެނެޓައިޒުްކުރުމާއި އަތް ދޮވުމުގެ އިންތިޒާމު ހަމަޖައްސަން ޖެހެއެވެ.

އަލަށް އަމަލުކުރާ އުސޫލުގެ ދަށުން ސިނަމާއިން ޓިކެޓެއް ނުވިއްކޭނެއެވެ. އެހެންކަމުން ޓިކެޓް ގަތުމަށް އޮންލައިންކޮށް ނުވަތަ ފޯނުން ގުޅައިގެން އިންތިޒާމުތައް ހަމަޖައްސަންޖެހެއެވެ. އަދި ފައިސާގެ މުޢާމަލާތްތައްވެސް ކޭޝްލެސް ޕޭމަންޓް ނިޒާމަކުން ހަމަޖައްސަންޖެހޭނެއެވެ. އަދި ސިނަމާއަށް އަންނަ ކަސްޓަމަރުންނާއި ދިމާވާ މުއައްޒަފުން މާސްކާއެކު ފޭސް ޝިލްޑް އެޅުމަށް ވަނީ އަންގާފައެވެ. ސިނަމާގެ ދަންފަޅިތައް ނިމުމުން ސީޓްތައް ރަނގަޅަށް ސާފުކުރުމަށް އައު އުސޫލުގައި ހިމަނާފައިވާ އިރު، ކޮވިޑްގެ ޙާލަތުގައި ފްރީ ސީޓިންގެ ބަދަލުގައި ސީޓް ނަންބަރު ލިޔެފައި އޮންނަންޖެހޭނެއެވެ. އަދި ސިނަމާއަށްދާ ފަރާތްތަކަށް ސީޓް ބަދަލެއްވެސް ނުކުރެވޭނެއެވެ.

އައު އުސޫލުގެ ދަށުން އަމިއްލައަށް ސިނަމާތަކަށް ފެންފުޅި ފަދަ އެއްޗެއް ފިޔަވާ އެހެން އެއްވެސް ކާބޯއެއްޗެއް ނުވެއްދޭނެއެވެ. މީގެ އިތުރުން އިންޓަވަލް ގަޑީގައި އަދި އެނޫންވެސް ގަޑިއެއްގައި ތަނުގެ ތެރޭގައި ކާބޯތަކެތި ވިއްކަން ނުބެހެއްޓޭނެއެވެ. އަދި ހަމަ މިއާއެކު ކޮންމެ ޝޯއަކަށް ޓިކެޓް ނެގި މީހުންގެ ލިސްޓް (ނަމާއި، ގުޅޭނެ ނަންބަރު، ތާރީޚް އަދި ސީޓް ނަމްބަރ އެނގޭނެގޮތަށް) ލޮގްކުރަން ޖެހޭނެއެވެ. ސިނަމާއަށް ވަންނަ މީހުން ޓްރޭސްއެކީ އެޕް ބޭނުންކުރުމަށް ބާރު އެޅުމަށް ސިނަމާ ހިންގާ ފަރާތައް ވަނީ އަންގާފައެވެ.

މި އުސޫލުގެ ދަށުން ސިނަމާ ހޯލްގައި ހުންނަން ޖެހޭ ޝަރުތުތަކާއި، ތަނާއި ތަނުގައި ހުންނަ ތަކެތީގެ ޝަރުތުތައް ވަނީ ބަޔާންކޮށްފައެވެ. އެގޮތުން އެއް އާއިލާއަކުން ނުވަތަ އެއް ގްރޫޕްއަކަށް ނިސްބަތް ނުވާ މީހުންނަމަ 3 ފޫޓުގެ ދުރުމިން ދަމަހައްޓަން ޖެހޭނެއެވެ. މީގެ އިތުރުން ސިނަމާ ހޯލްގައި ވައިދައުރުވާނެހެން ދޭތެރެދޭތެރެއިން ދޮރުތައް ހުޅުވަން ޖެހެއެވެ. އަދި ސިނަމާގައި އާންމުކޮށް އަތްލާ ތަންތަން (ދޮރު، ސީޓް އަތްގަނޑު ފަދަ ތަކެތި) ސާފުކުރުމަށާއި، ޑަބަލް ކޮތަޅު ލައްވާ ރައްކާތެރިގޮތުގައި ތަނުގައި އުފެދޭ ކުނި ނައްތާލުމަށް މި އުސޫލުގެ ދަށުން ސިނަމާ ހޯލް ހިންގާ ފަރާތްތަކަށް ވަނީ އަންގާފައެވެ. މުއައްޒަފުންގެ ރައްކާތެރިކަން ކަށަވަރުކޮށް މޮނީޓަރ ކުރަމުން ދިޔުމަށްވެސް މި އުސޫލުގެ ދަށުން ސިނަމާތަކުގެ ވެރިންނަށް ޝަރުތުކުރެއެވެ.

އައު އުސޫލުގެ ދަށުން ސިނަމާތަކަށް ދާ ފަރާތްތަކުން އަމަލުކުރަންވީގޮތުގެ އުސޫލުގެ ދަށުން ކޮވިޑްގެ އެއްވެސް އަލާމާތެެއް ހުރިނަމަ ސިނަމާތަކަށް ނުދިއުމާއި، ކަރަންޓީންގައި ނުވަތަ އައިސޮލޭޝަންގައި މީހަކު ގޭގައި ހުރިނަމަ ސިނަމާތަކަށް ނުދިއުމަށް ވަނީ އަންގާފައެވެ. މީގެ އިތުރުން ސިނަމާގެ ތެރޭގައި އުޅޭ ހުރިހާ ވަގުތަކުވެސް މާސްކް އެޅުމާއި ކޮވިޑްގެ ޙާލަތާއި ގުޅިގެން ގެންނަ ބަދަލުތަކަށް އަހުލުވެރިވުމަށް ވަނީ އަންގާފައެވެ.

ފިލްމް ތިއޭޓަރުތައް ހުޅުވުމުގެ ހުއްދަ ދޭން ނިންމާފައިވާކަން ހެލްތް ޕްރޮޓެކްޝަން އޭޖެންސީން ހާމަކުރި އިއުލާންގައިވަނީ، މިގޮތަށް ނިންމާފައިވަނީ ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙީ ރައްކާތެރިކަމަށްޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 34 ވަނަމާއްދާގެ (ނ) ގެ ދަށުން ބަންދުކުރި ނަމަވެސް، ޖަނަވަރީ 25 ވަނަ ދުވަހުން ފެށިގެން ސިނަމާތައް ހުޅުވައިލުން އެންމެ ރަނގަޅުކަމުގައި އެ އޭޖެންސީއަށް ފެންނާތީކަމަށް ބުނެފައެވެ.