މީގެ ކުރިން އައްޑޫ ސިޓީގެ ތަރައްގީއަށް ހުރަސްއަޅާފައިވަނީ ގަސްތުގައި- މޭޔަރު ޞާދިގު
24 ޖެނުއަރީ 2021 | އާދީއްތަ 08:34އައްޑޫއަކީ ހުނަރުވެރި މަސައްކަތްތެރި މީހުން ތިބި ސިޓީއެއް ކަމަށް ވިދާޅުވި
އެންމެ ފުރަތަމަ ރިސޯޓެއް ހުޅުވިގެން ދިޔައީ 2008 އަދި 2009 ހިސާބުގައި ކަމަށް ޞާދިގު ވިދާޅުވި
މީގެ ކުރިން އައްޑޫ ސިޓީގެ ތަރައްގީއަށް ހުރަސްއަޅާފައިވަނީ ގަސްތުގައި ކަމަށް އައްޑޫ ސިޓީގެ މޭޔަރު އަބްދުﷲ ޞާދިގު (ސޯބެ) ވިދާޅުވެއްޖެއެވެ.
ރާއްޖެޓީވީގެ 'ފަަލަސުރުޚީ' ޕްރޮގްރާމްގައި ވާހަކަ ދައްކަވަމުން ޞާދިގު ވިދާޅުވީ އިނގިރޭސިން ފޭބުމަށްފަހު މުޅި ރާއްޖެ ތަރައްގީވަމުން އައިއިރު އައްޑޫ އައީ ތަރައްގީގެ މަގުގައި މަޑުމަޑުން ފިރުކެމުން ކަމަށެވެ. އަދި މަޑުމަޑުން ތަރައްގީވަމުން އައިސް ލިންކްރޯޑެއް ލިބުނު ކަމަށް ޞާދިގު ވިދާޅުވިއެވެ.
މީގެ އިތުރުން އެއަރޕޯޓެއް ލިބުނު ކަމަށާއި ނަމަވެސް އެތަނުގައި ގާއިމުކުރެވުނު ހޮޓަލެއް ނުވަތަ ރިސޯޓެއް ވެސް ނެތް ކަމަށް ޞާދިގު ފާހަގަ ކުރެއްވިއެވެ. އަދި އެންމެ ފުރަތަމަ ރިސޯޓެއް ހުޅުވިގެން ދިޔައީ 2008 އަދި 2009 ހިސާބުގައި ކަމަށް ވިދާޅުވެ ޞާދިގު ވިދާޅުވީ އައްޑޫއަކީ ގިނަ ސިނާޢަތްތަކުގައި މަސައްކަތްކުރާ ހުނަރުވެރި މަސައްކަތްތެރި މީހުން ތިބި ސިޓީއެއް ކަމަށެވެ.
އެގޮތުން އައްޑޫއަކީ ރިސޯޓު ހިންގުންތެރިންނާއި، ރިސޯޓުތަކުގައި މަސައްކަތްކުރާ މީހުން އަދި މަސްވެރިންނާއި، އިންޖީނިއަރުން އަދި ޑޮކްޓަރުން ވެސް ތިބި ސިޓީއެއް ކަމަށް ޞާދިގު ވިދާޅުވިއެވެ.
އިތުރަށް ވާހަކަ ދައްކަވަމުން ޞާދިގު ވިދާޅުވީ އެ ސިޓީގެ ހޮސްޕިޓަލުގެ ހާލަތު ވެސް ކުރިން ވަރަށް ގޯސްވެގެންދިޔަ ކަމަށެވެ. އަދި އެތަން އިތުރަށް ތަރައްގީކުރުމަށް މަސައްކަތް ކޮށްފައިނުވާކަން ޞާދިގު ފާހަގަކުރެއްވިއެވެ.
އަދި އެތައް ދުވަހެއްގެ ވީރާނާ ވުމަކަށްފަހު ސާކް ސަމިޓާ ދިމާކޮށް 2011 ވަނަ އަހަރު އެ ސިޓީއަށް ކުރިއެރުންތަކެއް ލިބެން ފެށިކަމަށް ވިދާޅުވެ ޞާދިގު ވިދާޅުވީ ޕްރޮޖެކްޓްތައް ރޭވިގެން ދިޔަ ކަމަށާއި އެކިއެކި މަޝްރޫޢުތައް ހިންގަން ފެށުނު ކަމަށެވެ.
ޞާދިގު ވިދާޅުވީ ކައުންސިލް ތަކަކީ ސަރުކާރުން ކޮށްދޭ ކަންކަން ރައްޔިތުންނަށް ގެނެސްދޭން ތިބޭ ބައެއް ކަމަށެވެ. އެގޮތުން އެއަރޕޯޓު ހިންގުމާއި އިންޖީނުގެ ހިންގުން ފަދަ މަސައްކަތްތަކަކީ ސަރުކާރުން އެކަމެއް ކޮށްދިނުމުންވާ ކަންކަން ކަމުގައި ޞާދިގު ވިދާޅުވިއެވެ
ފާއިތުވި 7 އަހަރަށް ބަލާއިރު ތަރައްގީ އޮތީ މަޑުޖެހިފައި ކަމަށާއި 2012 ވަނަ އަހަރުން ފެށިގެން 2018 ވަނަ އަހަރާއި ހަމައަށް އައްޑޫ ސިޓީގެ ތަރައްގީއަށް ހަމަ އެއްވެސް ކަމެއް ނުކޮށްދެއޭ ދެންނެވިކަމުގައި ވިޔަސް ދޮގަކަށް ނުވާނެ ކަމަށް ޞާދިގު ވިދާޅުވިއެވެ.
އަދި 2013 ވަނަ އަހަރަށް ބަލާއިރު ހޮސްޕިޓަލު ތަރައްގީކުރުމަށް ބޭނުންވާ ފައިސާގެ އިތުރުން ބިމެއް ވެސް އޮތް ކަމަށް ވިދާޅުވެ ޞާދިގު ވިދާޅުވީ އެ މަސައްކަތް ވެސް ނުކުރެވި އެންމެ ފަހުން ކޮންވެންޝަން ސެންޓަރު ހޮސްޕިޓަލަށް ބަދަލު ކުރެއްވީ ކަމަށާއި އޭގެ ސަބަބުން ޖާގައިގެ ދަތިކަން އިންތިހާއަށް ކުރިމަތި ވަމުން ދާކަމަށެވެ.
ޞާދިގު ވިދާޅުވީ މަރަދޫ ބަނދަރުގެ މަޝްރޫޢުގައި ކުރީގެ ސަރުކާރުން ހިމަނާފައިވަނީ އެންމެ 100 ފޫޓު އިތުރު ކުރަން ކަމަށް ވިދާޅުވެ ޞާދިގު ވިދާޅުވީ މިހާރު މަސްވެރިންނާ މަޝްވަރާ ކުރެވި ވާހަކަ ދެކެވިގެން އެތައް ގުނައެއް ދިގުކޮށް ފުޅާ ކުރެވިފައިވާކަމަށެވެ.
ޞާދިގު ވިދާޅުވީ މި ސަރުކާރަކީ ރައްޔިތުންގެ ވާހަކަ އަޑުއަހާ، ރައްޔިތުން ބޭނުންވާ ގޮތަށް މަސައްކަތްތައް ކުރާ ސަރުކާރެއް ކަމަށެވެ.
