ދުޅަހެޔޮ ދިރިއުޅުމެއް ޕްރޮމޯޓްކުރުމަށް މާލެ ސިޓީ ކައުންސިލުން ޔޯގާ ސެޝަންތަކެއް
ޔޯގާ ސެޝަން އޮންނާނީ ލޮނު ޒިޔާރަތް ޕާކުގެ ކަސްރަތު ފެހި މައިޒާނުގައި
މާލެ ސިޓީއިން ކުރިއަށްގެންދާ ޔޯގާ ސެޝަންގެ ތެރެއިން
ދުޅަހެޔޮ ދިރިއުޅުމެއް ޕްރޮމޯޓްކުރުމަށް މާލެ ސިޓީ ކައުންސިލުން އިންތިޒާމުކޮށްގެން ޔޯގާ ސެޝަންތަކެއް ފަށައިފިއެވެ. މާލެ ސިޓީ ކައުންސިލުން ބުނިގޮތުގައި މި ސެޝަންތަކުގައި ބައިވެރިވުމަށް އެއްވެސް ފީއެއް ނުނަގާނެކަމަށެވެ. އަދި ޖާގަ ހުރިވަރަކުން ފުރުސަތު ދެމުންދާނެކަމަށެވެ.
އަލަށް ހުޅުވި ލޮނު ޒިޔާރަތް ޕާކުގެ ކަސްރަތު ފެހި މައިޒާނުގައި ކުރިއަސްގެންދާ މި ޔޯގާ ސެޝަންތަކަކީ މާލެ ސިޓީ ކައުންސިލާއި ރާއްޖޭގައި ހުންނަ އިންޑިއަން ކަލްޗަރަލް ސެންޓަރ ގުޅިގެން ކުރިއަށްގެންދާ ހަރަކާތެކެވެ. ކޮންމެ ހަފުތާއެއްގެ ވެސް ހޯމަ، ބުދަ އަދި ހުކުރު ދުވަހު މި ސެޝަންތައް އޮންނައިރު މި ސެޝަންތައް އޮންނާނީ ކޮންމެ ދުވަހެއްގެވެސް ފަތިހު 6 އިން ހެނދުނު 7 އަށެވެ.
މިސެޝަންތަކުގައި ބައިވެރިވާން އެދޭ ފަރާތްތަކުން މާލެ ސިޓީ ކައުންސިލްއަށް އެކަން އެނގުމަށްފަހު ސެޝަން ކުރިއަށްދާ ގަޑިއަށް ޔޯގާ މެޓަކާއި ފެންފުޅިއެއް ހިފައިގެން ދިއުމަށް ވަނީ އެދިފައެވެ. އަދި މި ސެޝަންތަކަށް ދާއިރު ޕްލާސްޓިކް ބޭނުން ވީ ހާވެސް މަދުކުރުމަށް ޕްލާސްޓިކް ފުޅިއަށް ފެން އަޅައިގެން ނުގެންދިއުމަށް މާލެ ސިޓީ ކައުންސިލުން ވަނީ އެދިފައެވެ.
އަލަށް ފެށި ސެޝަންތަކަކީ ރާއްޖެއާއި އިންޑިއާގެ ގާތް ގުޅުން ހާމަކޮށްދޭކަމެއްކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ވަނީ ބުނެފައެވެ. އަދި ކުރިއަށް އޮތްތަނުގައި މިފަދަ ސެޝަންތައް އިތުރުކޮށް ރާއްޖޭގެ އެކި ކަންކޮޅުތަކުގައި ހިންގުމަށް މަސައްކަތް ކުރާނެކަމަށް ހައިކޮމިޝަނުން ވަނީ ބުނެފައެވެ.
ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހު ވެރިކަމަށް ވަޑައިގަތުމަށް ފަހު ރާއްޖެގެ ރައްޔިތުންނަކީ ދުޅަހެޔޮ ސިއްޙަތެއްގައި ތިބޭ ބަޔަކަށް ހެދުމަށް ވަނީ ގިނަ މަސައްކަތްތަކެއް ކޮށްފައެވެ. އެގޮތުން އެމަނިކުފާނު ވެރިކަމަށް ވަޑައިގެންނެވި 2018 ވަނަ އަހަރުގެ ނޮވެމްބަރު މަހުގެ 18 އިން 19އަށް ވަނަ ދުވަހު ވަނީ "ދުޅަހެޔޮ ހަށިހެޔޮ" ކުޅިވަރު ޢީދު ފެސްޓިވަލްއެއް ބާއްވާފައެވެ.
ގިނަ ކުޅިވަރުތަކަކާއެކު ކުރިއަށްގެންދާ މިހަރަކާތުގައި ރައީސް ޞާލިހުގެ އިތުރުން، ކުރީގެ ރައީސް މަޢުމޫން އަބްދުލްޤައްޔޫމާއި ކުރީގެ ރައީސް މުހައްމަދު ނަޝީދާއި، ރައްޔިތުންގެ މަޖިލީހުގެ އޭރުގެ ރައީސް އަދި މިހާރު މާމިގިލީ ދާއިރާގެ މެމްނަރު ގާސިމް އިބްރާހިމް އަދި ހޯމް މިނިސްޓަރ އިމްރާން އަބްދުﷲއާއިި ސަރުކާރުގެ އިސްވެރިންން ވަނީ ބައިވެރިވެވަޑައިގަންނަވާފައެވެ.
ކުޅިވަރު އީދުގައި ބީޗް ވޮލީ، ސާރފިން، ބޮޑީ ބޯރޑިން، ސްކޭޓިން، ފެތުމުގެ ހަރަކާތްތައް، ބައިކް ރައިޑް، ދުވުން، ފިޓްނަސް ހަރަކާތްތަކުގެ އިތުރުންވެސް ގިނަ ހަރަކާތްތަކެއް ވަނީ ކުރިއަށްގެންގޮސްފައެވެ.
