ރާއްޖެއިން 65 މީހަކަށް ކޮވިޑް ޖެހި، އިތުރު 48 މީހަކު ބަލިން ރަނގަޅުވެއްޖެ
ރާއްޖެއިން ކޮވިޑް ޖެހިގެން މަރުވެފައިވަނީ 50 މީހެއް
ކޮވިޑް ސާމްޕަލް ލެބޯޓަރީގައި ޓެސްޓު ކުރަނީ- ފާއިތުވި 24 ގަޑިއިރުގެ ތެރޭގައި 2882 ސާމްޕަލް ނަގާފައިވޭ
ރާއްޖެއިން އިތުރު 65 މީހަކު ކޮވިޑް-19 އަށް ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ފަހުގެ މައުލޫމާތުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި ރާއްޖެއިން ކޮވިޑަށް ޓެސްޓް ކުރުމަށް 2882 ސާމްޕަލެއް ނަގާފައިވާއިރު، އޭގެ ތެރެއިން ޕޮޒިޓިވްވެފައިވަނީ 65 މީހެކެވެ. އެއީ މާލޭ ސަރަޙައްދުން ޕޮޒިޓިވްވި 38 މީހަކާއި، މީހުން ދިރިއުޅޭ ރަށަކުން ޕޮޒިޓިވްވި މީހެއްގެ އިތުރުން، ރިސޯޓުތަކުން ޕޮޒިޓިވްވި 26 މީހެކެވެ.
އެއާއެކު، ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ ޖުމުލަ އަދަދު މިވަނީ 14،830އަށް އަރާފައެވެ. އަދި އިތުރު 48 މީހަކު ބަލިން ރަނގަޅުވެފައިވާއިރު، މިހާތަނަށް ރާއްޖެއިން ކޮވިޑް ޖެހިގެން ރަނގަޅުވި މީހުންގެ ޖުމުލަ އަދަދަކީ 13،731 އެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 1042އެވެ.
ރާއްޖެއިން ކޮވިޑަށް ޓެސްޓު ކުރުމަށް މިހާތަނަށް 379،612 ސާމްޕަލެއް ނަގާފައިވެއެވެ. އެގޮތުން އެޗްޕީއޭއިން ގެންދަނީ ކޮވިޑަށް ޓެސްޓު ކުރުމަށް ރެންޑަމް ސާމްޕަލްވެސް ނަގަމުންނެވެ. އަދި ކޮވިޑުގެ އަލާމާތްތައް ހުންނަނަމަ، އަވަހަށް ޓެސްޓް ކުރުމަށް އެޗްޕީއޭއިން އިރުޝާދު ދީފައިވެއެވެ.
މިހާތަނަށް ރާއްޖެއިން ކޮވިޑް ޖެހިގެން މަރުވެފައިވަނީ 50 މީހެކެވެ. އެންމެ ފަހުން ރާއްޖެއިން ކޮވިޑް ޖެހިގެން މަރުވެފައިވަނީ އުމުރުން 77 އަހަރުގެ ދިވެހި ފިރިހެނެކެވެ.
ރާއްޖެއިން ފާއިތުވި ދުވަސްތަކުގެ ތެރޭގައި ކޮވިޑަށް ޕޮޒިޓިވްވާ މީހުންގެ އަދަދުތައް މިވަނީ އިތުރުވެފައެވެ. އެގޮތުން މިހާރު އާންމުކޮށް ރާއްޖެއިން ފެންނަ ކޭސްތަކުގެ އަދަދު އުޅެނީ ފަންސާހުންވެސް މަތީގައެވެ.
