ގަދަ 16 ގެ ޖާގައެއް ބާސާއަށް
22 ޖެނުއަރީ 2021 | ހުކުރު 08:24ކޯނެއްޔާ އަތުން ބާސާ މޮޅުވީ 2-0 ގެ ނަތީޖާއަކުން
ކޯނެއްޔާ އާއި ބާސާ ބައްދަލުކުރި މެޗުގެ ތެރެއިން: މި މެޗުން ބާސާ މޮޅުވީ 2-0 ން
ސްޕެނިޝް ކަޕުގައި ބުރާސްފަތި ދުވަހުގެރޭ ތިންވަނަ ޑިވިޝަނުގެ ކޯނެއްޔާ ބަލިކޮށް ގަދަ 16 ގެ ޖާގައެއް ބާސެލޯނާއިން ހޯދައިފިއެވެ.
ކޯނެއްޔާގެ ދަނޑުގައި ކުޅުނު މެޗުން ބާސާ މޮޅުވީ 2-0 ގެ ނަތީޖާއަކުންނެވެ.
މި މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ޖެހިފައެއް ނުވެއެވެ. އެކަމަކު ލީޑު ނަގަން ބާސާއަށް ދެ ޕެނަލްޓީއެއް ލިބުނު ނަމަވެސް، އެ ދެ ޕެނަލްޓީވެސް އެ ޓީމަށް ކާމިޔާބުކުރެވިފައެއް ނުވެއެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރިވެފައި އޮތުމުން، އިތުރު ވަގުތުގެ ދެ ހާފު ކުޅުނުއިރު، ފުރަތަމަ ހާފުގައި ބާސާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އޮސްމާނޭ ޑެމްބެލޭއެވެ. އަދި އިތުރު ވަގުތުގެ ދެވަނަ ހާފުގައި ކޯނެއްޔާގެ އަލްބާޓް އެސްޓެއްޔެސްއަށް ދެވަނަ ރީނދޫ ކާޑާއެކު ރަތް ކާޑެއް ދެއްކިއިރު، އޭގެ ތިން މިނެޓު ފަހުން މާޓިން ބްރެތުވެރިޓް ވަނީ ބާސާއަށް ލީޑު ފުޅާކޮށްދީފައެވެ.
މި މޮޅާއެކު ގަދަ 16 ގެ ޖާގައެއް ބާސާއިން ހޯދިއިރު، އެ ޓީމާ ވާދަވެރި ރެއާލް މެޑްރިޑް ވަނީ ތިންވަނަ ޑިވިޝަނުގެ ޓީމެއް ކަމަށްވާ އަލްކޮއްޔާނޯ އަތުން 2-1 ން ބަލިވެ މުބާރާތުން ކަޓާފައެވެ.
