އައު ވޭރިއަންޓްގެ ސަބަބުން، ޕޯޗުގަލުން އިނގިރޭސިވިލާތާ ދެމެދު ކުރަމުން އަންނަ ފްލައިޓް ދަތުރުތައް ހުއްޓާލަނީ
އީޔޫގެ ގައުމުތަކުން ވަނީ އިނގިރޭސިވިލާތުން ފެނުނު ކޮވިޑްގެ އައު ވޭރިއަންޓާމެދު ކަންބޮޑުވުން ފާޅުކޮށްފައި
ޕޯޗުގަލްގެ އެއަރޕޯޓް ތެރެއިން، އިނގިރޭސިވިލާތަށް ކުރަމުން އައި ފްލައިޓް ދަތުރުތައް ހުއްޓާލުމަށް ނިންމާފައިވަނީ ހޮނިހިރު ދުވަހުން ފެށިގެން
އިނގިރޭސިވިލާތުން ފެނުނު ކޮވިޑްގެ އައު ވޭރިއަންޓާއެކު، އެގައުމުގައި ކޮވިޑް-19 ފެތުރޭ މިންވަރު އިތުރުވަމުން އަންނާތީ ޕޯޗުގަލާއި އިނގިރޭސިވިލާތާ ދެމެދު ކުރަމުން އަންނަ ފްލައިޓް ދަތުރުތައް މެދު ކަނޑާލަން ނިންމާފައިވާކަމަށް ޕޯޗުގަލް ސަރުކާރުން ބުނެފިއެވެ.
އިނގިރޭސިވިލާތަށް ކުރަމުން އަންނަ ފްލައިޓް ދަތުރުތައް ސަސްޕެންޑް ކުރަން ނިންމާފައިވާކަން ހާމަކުރައްވަމުން ޕޯޗުގަލްގެ ބޮޑު ވަޒީރު އެންޓޮނިއޯ ކޮސްޓާ ވިދާޅުވީ އިނގިރޭސިވިލާތުން ފެނުނު ކޮވިޑްގެ އައު ވޭރިއަންޓާއެކު، އެގައުމުގައި ކޮވިޑްގެ ނުރައްކާ ބޮޑުވަމުން އަންނަ ކަމަށާއި، އެހެންކަމުން ޕޯޗުގަލުން އަޅާ ރައްކާތެރިކަމުގެ ފިޔަވަޅެއްގެ ގޮތުން އިނގިރޭސިވިލާތާއި ޕޯޗުގަލާ ދެމެދު ކުރާ ފްލައިޓު ދަތުރުތައް އަންނަ ހޮނިހިރު ދުވަހުން ފެށިގެން ހުއްޓާލުމަށް ނިންމާފައިވާ ކަމަށެވެ.
ޕޯޗުގަލުން މިގޮތަށް ނިންމިއިރު ޔޫރަޕިއަން ޔޫނިއަން ކައުންސިލްއިން އެންމެ ފަހުން ބޭއްވި ބައްދަލުވުމުގައި މެމްބަރު 27 ގައުމުން ވަނީ އިނގިރޭސިވިލާތުން ފެނުނު ކޮވިޑްގެ އައު ވޭރިއަންޓާމެދު ކަންބޮޑުވުން ފާޅުކޮށްފައެވެ. އަދި ޔޫރަޕިއަން ޔޫނިއަންގެ ގައުމުތަކުން ސަލާމަތީ ގޮތުން އެޅޭނެ ފިޔަވަޅުތަކާ މެދު ވަނީ މިބައްދަލުވުމުގައި މަޝްވަރާކޮށްފައެވެ.
ކުރިޔަށް އޮތް ދުވަސްތަކުގެ ތެރޭގައި ޕޯޗުގަލްގެ އިތުރުން ޔޫރަޕްގެ އެހެން ގައުމުތަކުން ވެސް އިނގިރޭސިވިލާތަށް ކުރަމުން އަންނަ ދަތުރުތައް ހުއްޓާލުމުގެ ފުރުސަތު ބޮޑެވެ.
