ސެރަމް އިންސްޓިޓިއުޓްގައި ހިނގި އަލިފާނުގެ ހާދިސާގައި މަރުވި މީހުންގެ އާއިލާތަަކަށް މިނިސްޓަރ ޝާހިދުގެ ތައުޒިޔާ
މިނިސްޓަރ ޝާހިދު ވިދާޅުވީ މި އަލިފާނުގެ ހާދިސާގެ ވާހަކަ އަޑުއެއްސެވީ ހިތާމައާއި އެކުގައި ކަމަށް
މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު
ސެރަމް އިންސްޓިޓިއުޓްގައި ހިނގި އަލިފާނުގައި ހާދިސާގައި މަރުވި މީހުންގެ އާއިލާތަަކަށް މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ތައުޒިޔާ ވިދާޅުވެއްޖެއެވެ.
ބުރާސްފަތި ދުވަހުގެ މެންދުރުގެ ވަގުތެއްގައި ދުނިޔޭގެ އެންމެ ގިނަ އަދަދަކަށް ވެކްސިން އުފައްދާ ސެރަމް އިންސްޓިޓިއުޓް އޮފް އިންޑިއާގައި ހިނގި އަލިފާނުގެ ހާދިސާގައި ފަސް މީހުން މީހުން ވަނީ މަރުވެފައެެވެ.
މިކަމާއި ގުޅިގެން މިނިސްޓަރ ޝާހިދު ކުރެއްވި ޓްވީޓެއްގައި ވިދާޅުވީ މި އަލިފާނުގެ ހާދިސާގެ ވާހަކަ އަޑުއެއްސެވީ ހިތާމައާއި އެކުގައި ކަމަށެވެ. އަދި މަރުވި ފަރާތްތަކުގެ އާއިލާއަށް ތައުޒިޔާ ދަންނަވާކަމަށް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވިދާޅުވީ މި ހާދިސާގެ ސަބަބުން އަނިޔާ ލިބުނު އެންމެހާ ފަރާތްތަކަށް އަވަސް ޝިފާއަކަށް އެދޭ ކަމަށެވެ.
މި އަލިފާނުގެ ހާދިސާއާއި ގުޅިގެން ސެރަމް އިންސްޓިޓިއުޓް އޮފް އިންޑިއާގެ ސީއީއޯ އަދަރު ޕޫނަވާލާ ވިދާޅުވީ އިނގިރޭސިވިލާތުގެ އެ އިންސްޓިޓިއުޓުން އުފައްދަމުން އަންނަ އެސްޓްރާޒެނެކާގެ ކޮވިޑް-19ގެ ވެކްސިން އުފެއްދުމަށް މި ހާދިސާގެ ސަބަބުން ބުރޫއެއް ނާރާނެ ކަމަށެވެ.
އެސްޓްރާޒެނެކާގެ ކޮވިޑް-19ގެ ވެކްސިން ނުވަތަ ކޮވިޝިލްޑް އަކީ އިންޑިއާގައި ބޭނުން ކުރަން ހުއްދަ ލިބިފައިވާ ދެ ވެކްސިންގެ ތެރެއިން އެއް ވެކްސިނެވެ. އަދި އެ ދެ ވެކްސިން މީހުންގެ ގަޔަށް ޖެހުމުގެ މަސައްކަތް އިންޑިއާއިން މިހާރު ފަށާފައިވާއިރު އޮގަސްޓު މަހުގެ ނިޔަަށް 300 މިލިއަން މީހުންނަށް ވެކްސިން ދިނުމަކީ އެގައުމުގެ އަމާޒެކެވެ.
